SHICÜSI 36 - Kemethajüh (N) (Re-editing) Bible (BSI)

Nza N-nuwa Kesathu Shei Mukeya

¹ Josef tsa Manasseh, Manasseh tsa Makhir tsawa Gilead gei wi atheghithu ja wi accülikesathu na Mosa nu accülikesathu wi wa.

² Mathu khi, “Apvüwa na no akezen wwinu ayyi pi Israel nyithu gishülo kiza. Ma no keben pi ishinyi theghiwa Zelofehad cü nu pi ma ngathu cü thsülo la kiza.

³ Isala mathu na Israel nyi mizza kepa wi n-nuwa lethu, mathu keben tsüna amizza tsüwa ji saben, nu ikhang keben zeng kayi wabenle.

⁴ Pi Keccüneng Mapi wi, keben pi jeü kethengthu tsüdi pi ma pvüwa cü neng lethu, Zelofehad ngathu keben tsüna anuphanla mathu n-nuwa kesa mizza ji sa nu ikhang mizza na dediaben.”

⁵ Tsalina Mosa na Apvüwa wi ahza hathu pi Israel nyithu cü. Ma khi, “Manasseh mizza kekhi tsüna ntsakhiwa.

⁶ Tsalina Apvüwa na khiben, Zelofehad ngathu na mathu kenen nyi kesüle kesü wi lela n-nuwaya mehai isala mathu mizza wi ketan.

⁷ Israel nyi kesüle kesü lela ma keben tsüna ma mizza wi benben.

⁸ Israel nyi mizza wi nza kesüle kesü lela keben ghong keyawa ma tsü mizza npvüza wi n-nuwaben. Hatinu Israel nyi tsüdila ma bamyithu keben ghongben,

⁹ nu keben na amizza kesü wina kesü wi wa nben. Amizza kesüsü ma kebenwa tsü benben.”

^10-11 Tsalina Zelofehad ngathu Mahla, Tirzah, Hogla, Milka, nu Noah, mathu Apvüwa na Mosa kekiza ti mathu nyi wi n-nuwa.

¹² Mathu na Josef tsa Manasseh gei mizza wi n-nuwa, nu mathu shei na mathu ba mizza wi ben wa.

¹³ Ayen nu kekuliyen hathu ha Apvüwa na Jerikho wina Jordan Ghaku khhaka hewa Moab deshentijü wi pi Mosa wina Israel nyithu cü.