SHICÜSI 34 - Kemethajüh (N) (Re-editing) Bible (BSI)

Ayyi Ggüthu

¹ Apvüwa na pi Mosa cü,

² kecükegwe hathu ha Israel nyithu ghena: “Nthu na Kanaan wi hi ayyi pi nthu kecü witsü duya lethu, nthu ggü na hathu ha.

³ Acülawa ggü na Zin ghansha wina Edom meggü waben. Tsüna Keshü Tssükedone cüla kenten nishuwa na sa waben.

⁴ Tsaseng wi acülawa sasen Akrabbim Pass kepeghewa na Zin pvüdhi sen nu acülawa Kadesh Barnea kecu. Kheneng aghawa na niduwa wi sasen Hazar Addar nu Azmon wi kecu,

⁵ Ciwi kheneng yyiketijü kepeghewa sasen Ejipt kemeggü wi nu Mediterranean nten saben.

⁶ “Niduwa ggü na Mediterranean Tssükedone saben.

⁷ Aghawa ggü na Mediterranean niewa Hor Yikha,

⁸ nu ciwi na wa Hamath Pass kecu. Tsüti sasen wa Zedad,

⁹ nu Zifron kecu, nu wa Hazar Enan wi ma sakhen saben.

¹⁰ “Nishuwa ggü na Hazar Enan niewa Shefan kecu.

¹¹ Tsüti sasen Harbel na acülawa Ain nishuwa cü, nu Galilee Ghajü katen nishuwa yyishiphon thu wi ki,

¹² tsaseng wi acülawa Jordan Ghaku niesen wa Keshü Tssükedone kecu. “Hathu na nthu yyi kemeggü mejü saben.”

¹³ Tsalina Mosa na Israel nyithu wi khi, “Hawa ha Apvüwa na ayyi pi amizza tugu nu gishü pahan kecü. Nthu na akezen wwinu tsü muyaben.

¹⁴ Reuben nu Gad mizzathu nu Manasseh mizza gishü pahan na nishuwa wi mathu shei muyadha, mathu na atheghithu kenie wina gishüyadha,

¹⁵ Jordan na nishuwa Jerikho kaghape witsü.”

Ayyi Pi Kegishü Wi Accülikesathu

¹⁶ Apvüwa na Mosa wi khi,

¹⁷ “Keqhaikediwa Eleazar nu Nun tsawa Joshua manyi na ayyi pi anyithu gishüben.

¹⁸ Amizza kesü wi accülikesa kesüsü la ssiya nu manyi kiqa nu ayyi pi gishü thsülo.”

^19-28 Anyi hathu ha Apvüwa na kessikeyathu: Amizza Aliwa Judah Jefunne tsa Kaleb Simeon Ammihud tsa Shelumiel Benjamin Khislon tsa Elidad Dan Jogli tsa Bukhi Manasseh Efod tsa Hanniel Efraim Shiftan tsa Kemuel Zebulun Parnak tsa Elizafan Issakhar Azzan tsa Paltiel Asher Shelomi tsa Ahihud Naftali Ammihud tsa Pedahel

Amizza Aliwa

²⁹ Anyi hathu ha Apvüwa na Kanaan yyi wi mathu ya ayyi pi Israel nyithu gishü thsü.