SHICÜSI 30 - Kemethajüh (N) (Re-editing) Bible (BSI)

Ayen nu Kekishen

¹ Mosa na kecükegwe hathu pi Israel nyi mizza ccülikesathu cü.

² Kusi wi anyi kesü pala pahan pi Apvüwa cüle kekishen sa nyelela pala pahan ghüle kesa ghena kishen khe ma khishi ketheng tsü npakhhila, isala ma khi ketheng tsüdila nsathu yishü.

³ Ghala kesü ma ba jjen wi hang keten tsüwi ma pala pahan pi Apvüwa cüle kishen nyelela pala pahan ghüle kesa ghena ajüh khishi lethu,

⁴ ma ba na tsü zaya lela nkekhen tsü ma kishen ketheng nyelela khishi ketheng tsüdi nsathu yishü.

⁵ Isala ma ba na tsü zaya nu ma kekishen tsü nsacen thsüle khenthu, ma tsü nsala lela mehai. Apvüwa na ma kesami teshi cüben, kepaghenanye ma ba na ma ya tsü nsa thsüla hhaghe kesalina.

⁶ Keujüla ghala kesü aghandu nyelela nkiden-keshala kishen nyelela pala pahan ghüle kesa ghena ajüh khishi theng nu n-nuwa lethu,

⁷ ma wuba na tsü zaya lela nkekhen tsü ma kishen ketheng nyelela khishi ketheng tsüdi nsathu yishü.

⁸ Isala ma wuba na tsü zaya nu ma kekishen tsü nsacen thsüle khenthu, ma tsü nsala lela mehai. Apvüwa na ma kesami teshi cüben.

⁹ Denyile nyelela nyu ma yisha kesa kesü lela ma kishen nu pala pahan ghüle kesa ghena ajüh khishi kechi tsüdila nsathu yishü.

¹⁰ Keujüla n-nuwa kesa nza kesü na ma pala pahan ghüle kesa ghena kishen nyelela ajüh khishi lethu,

¹¹ ma wuba na tsü zaya lela nkekhen tsü ma kishen ketheng nyelela khishi ketheng tsüdi nsathu yishü.

¹² Isala ma wuba na tsü zaya nu ma kekishen tsü nsacen thsüle khenthu, ma tsü nsala lela mehai. Apvüwa na ma kesami teshi cüben, kepaghenanye ma wuba na ma kishen ketheng tsü nsa thsü mvu kesalina.

¹³ Ma wuba na ma kekishen nyelela khishi ketheng tsü bheghe nyelela sale khiya mehai.

¹⁴ Isala ma wuba na dhitsüwa wi kekishen tsü zaya lela nkekhen tsü ma kishen ketheng nyelela khishi ketheng tsüdi nsathu yishü. Ma kekishen tsü zakeya ghanan wi nkekhen tsüna ma tsü salo khiben.

¹⁵ Isala npvüzawa na nkhewi kekishen tsü bheghe lethu, ma kekishen tsü nsacenla kesalina tsüghena akhhi pvüben.

¹⁶ Ayen hathu hana ghala kesü na ma ba jjen wi hang keten nyelela n-nuwa kesa nza na kekishen ghena Apvüwa na pi Mosa kecü.