SHICÜSI 3 - Kemethajüh (N) (Re-editing) Bible (BSI)

Aaron Tsathu

¹ Apvüwa na Sinai Yikha wi Mosa keccüneng tsü wi hathu hana Mosa nu Aaron theghithu.

² Aaron na atsa mejü ben: keqhai ntsawa na Nadab, tsaseng wi Abihu, Eleazar, nu Ithamar.

³ Adeli pi mathu nyen nu satemetha pi keqhaikedithu sa thsü,

⁴ isala Nadab nu Abihu manyi na Sinai yyikeshü wi anni nkemetha pi Apvüwa kekinyi ghena shü. Manyi na atsanga nmi, tsalina Eleazar nu Ithamar manyi na Aaron kahang tsüwi keqhaikedi kekuli sa.

Levi Nyithu Pi Keqhaikedi Kekuli Kesa thsü

⁵ Apvüwa na Mosa wi kiza,

⁶ “Levi mizza ssighola mathu pi keqhaikediwa Aaron ketsikinathu sa thsülo.

⁷ Mathu na hi ketenpen Nithsüjjen wi kekuli nsathu keyishüthu sa nu anyi maben ghena keqhaikedithu kekuli tsü sa thsülo.

⁸ Mathu na Nithsüjjen wi atsanqaithu tsüdila noncca nu Israel nyi kepathu ghena kekulithu tsü saben.

⁹ Levi nyithu duluwa tsüna Aaron nu ma tsathu kekuli kesa ketan.

¹⁰ No Aaron nu ma tsathu ya keqhaikedi kekuli sa thsü, anyi kepa wi thowa na tsüti sale sa khe ma pi shü thsüaben.”

¹¹ Apvüwa na Mosa kiza,

^12-13 “Levi nyithu na khilitsü iji sadha. Hi Ejipt nyi tsa tssütsethu tsüdi pathi kesa wi hi Israel nyi jjenku tsüdi wi atsa tssütsethu nu asahang zza tssütsethu satemetha pi iji sadha. Khilitsü Israel nyi tsa tssütsethu mithon wi Levi nyithu na iji sadha; mathu na iji sadha. Hi Apvüwa.”

Levi Nyithu Nyankezhüghu

¹⁴ Sinai yyikeshü wi Apvüwa na Mosa kiza

¹⁵ nu agei nu atheghi kenie wina Levi nyithu nyan zhüya, atsa kahang asha kesü nu tsümiwi keqhaiki tsüdila saghu,

¹⁶ nu Mosa na tsüti saya.

^17-20 Levi na atsa kecheng ben: Gershon, Kohath, nu Merari; mathu na mathu mizza bamyithu nyan keci. Gershon na atsa keni ben: Libni nu Shimei; Kohath na atsa mejü ben: Amram, Izhar, Hebron, nu Uzziel; nu Merari na atsa keni ben: Mahli, nu Mushi. Mathu na mathu bamyi nyan keci.

²¹ Gershon gei na Libni nu Shimei theghithu saghu.

²² Npvüza asha kesü nu tsümiwi keqhaiki tsüdi saghula 7,500.

²³ Agei hawa na Nithsüjjen seng wi niduwa,

²⁴ Lael tsa Eliasaf na aliwa sala kemnanpen sa.

²⁵ Mathu na Nithsüjjen, anonwa keshon, ameiwa keshon, kedulen wi keshonthsü,

²⁶ Nithsüjjen nu kekinyipen shonkevülithsü, nu ciwi kedulen keshonthsü tsüdila nonccaben. Mathu na hathu ghena kekuli tsüdila sa.

²⁷ Kohath gei na Amram, Izhar, Hebron, nu Uzziel theghithu saghu.

²⁸ Npvüza asha kesü nu tsümiwi keqhaiki tsüdi saghula 8,600.

²⁹ Agei hawa hana Nithsüjjen na acülawa kemnanpen saben.

³⁰ Uzziel tsa Elizafan na tsü gei wi aliwa sa.

³¹ Mathu na Cenkethenjüh Khitson, miz, ahula kedonpen, kekinyipen, keqhaikedithu ghena Kemetha Pen wi kesenji ahyikhuthu, nu Kemetha ntsa Pen wi kedulen keshonthsü tsüdi noncca ben. Mathu na hathu ghena kekuli tsüdila saben.

³² Levi nyithu ja wi kediwa na keqhaikediwa Aaron tsa Eleazar. Ma Kemetha Pen wi kekuli kesathu miwi kediwa.

³³ Merari gei na Mahli, nu Mushi theghithu saghu.

³⁴ Npvüza asha kesü nu tsümiwi keqhaiki tsüdi saghula 6,200.

³⁵ Agei hawa hana Nithsüjjen na aghawa Abihail tsa Zuriel na agei miwi aliwa sala kemnanpen sa.

³⁶ Mathu pi Nithsüjjen chanthu, ma khukhithu, donbvü, zenza, nu ma keghejithu tsüdi noncca thsü. Mathu na hathu ghena kekuli tsüdila sa thsü.

³⁷ Mathu na accühha ameiwa ghena ma donbvü, zenza, kecetenji, nu ali la tsüdi noncca thsü.

³⁸ Mosa, Aaron nu ma tsathu na Nithsüjjen tu nishuwa kemnanpen sa. Mathu na Kemetha Pen wi Israel nyithu ghena kekulithu tsüdi sa. Anyi kepa thowa na tsü sale sa khe ma pi shü thsüaben.

³⁹ Levi nyithu npvüza tsüdi asha kesü nu tsü miwi keqhaiki Apvüwa na Mosa kekiza ti ageithu wi nyanzhüghu keya na 22,000.

Levi Nyithu Na Atsa Tssütsethu Mithon Sayakesa

^40-41 Apvüwa na Mosa kiza, “Israel nyi tsa tssütsethu tsüdila iji. Tsalina Israel nyi tsa tssütsethu asha kesü nu tsü miwi keqhaiki tsüdi nyan zhüyalo. Isala mathu mithon wi Levi nyithu tsüdi ijile kesa hi nkaben! Hi Apvüwa le! Asahang zza tssütsethu tsüdi mithon wi Levi nyithu sahang la ijile kesa nkaben!”

⁴² Mosa na jühkina nu atsa tssütsethu tsüdi nyanzhüghuya,

⁴³ asha kesü nu tsümiwi keqhaiki tsüdi saghula 22,273.

⁴⁴ Apvüwa na Mosa kiza,

⁴⁵ “Khili Israel tsa tssütsethu tsüdi mithon wi Levi nyithu satemetha pi iji sa thsülo, nu Israel nyithu sahang zza tssütsethu mithon wi Levi nyithu sahang la satemetha chilo.

⁴⁶ Israel nyi tsa tssütsethu na 273 Levi nyithu miwi jiki kesalina nthu na atsa tssütsethu gilli tsü shüyalo.

⁴⁷ Tsü tsüwi apisa men kenie wina meshu kesü wi rükatssü manga saben,

⁴⁸ nu apisa tsüpi Aaron nu ma tsathu cülo.”

⁴⁹ Mosa na jühkina nu rükatssü

⁵⁰ 1,365 khuya,

⁵¹ nu tsüpi Aaron nu ma tsathu cüa.