SHICÜSI 28 - Kemethajüh (N) (Re-editing) Bible (BSI)

Kekinyikesa Yen

¹ Apvüwa na Mosa kiza

² nu Israel nyithu kecükegwe nu matsü wina Anyiza na nen keten atsse pi kekinyi nsathu keyishüwa tsü sa thsü.

³ Atsse pi kekinyi wi hathu hapi Apvüwa cüben: atsathangla mecang pi kekinyi ghena khaghaneni zza amapi kesü ji asüpon keni nyu ghojünkeya mangla nkemi.

⁴ Khaghaneni zza atuwa tsüpi aghanen nu keniwa tsüpi shitawa wi kinyi.

⁵ Asu pi kekinyi keni qho wi awheng kilogram kesü, oliv deli kemehai ntsa liter kesü saghu.

⁶ Hana atsathangla sa keten kekinyi mecangtha sa keten tsü atsse pi kekinyi Apvüwa na ma han kedemvu nen ketenwa tsü, hawa ha atuwa sa Sinai Yikha wi sa chi.

⁷ Kisengtssü pi khaghaneni zza atuwa gweghe kekinyi wi kisengtssü liter kesü pi kekinyi- pen wi meyisha chi.

⁸ Shitawa wi khaghaneni zza keniwa tsüpi aghanen wi kekinyi makesü sa kisengtssü pi kekinyi saghula salo. Ha la atsse pi kekinyi kesü Apvüwa na ma han tsü nen den.

Sabbath Tsathang wi Kekinyi

⁹ Sabbath tsathang wi khaghaneni zza amapi kesü ji keni nyu ghojünkeya mangla nkemi, awheng kilogram keni pi oliv deli saghu pi asu pi kekinyi nu kisengtssü pi kekinyi saben.

¹⁰ Kisengtssü pi kekinyi tsüpi atsathangla kekinyi saghula kesa miwi la Sabbath tsathang kaghapenla mecang pi kekinyi saben.

Asha wi Atsathang Atuwa wi Kekinyi

¹¹ Asha ghatsan kaghapenla mecang pi kekinyi sapi Apvüwa cülo: amesü süpon kaghani keni, khaghaneni süpon kesü, khaghaneni zza amapi kesü ji asüpon tagü tsüdila nyu ghojünkeya mangla nkemi.

¹² Asu pi kekinyi wi awheng pi oliv deli saghu khuchi: amesü süpon kesü wi awheng kilogram kecheng cheng; aneni süpon wi awheng kilogram keni;

¹³ nu khaghaneni zza kesü wi awheng kilogram kesüsü tsüti pi saghu ben. Mecang pi kekinyi hathu hana atsse pi kekinyi Apvüwa na ma han nen den.

¹⁴ Kisengtssü pi kekinyi wi sati kesa na amesü süpon kesü wi kisengtssü liter kenini; khaghaneni süpon wi kisengtssü liter kesü nu gishü pahan; nu khaghaneni zza kesü wi kisengtssü liter kesüsü tsüti pi saghu ben. Hawa ha amapi chuli asha ghatsan kaghapenla mecang pi kekinyi yenwa.

¹⁵ Kisengtssü pi kekinyi pi atsathangla mecang pi kekinyi saghu kesa miwi aneni süpon kesü pi kesami ghena kekinyi saben.

Azimi nkechi Mesa pi Kemishu Kho wi Kekinyi

¹⁶ Apvüwa kekinyikü wina Shhukeya Kho tsüna asha atuwa taghamejü ghanan wi saben.

¹⁷ Taghamanga ghanan wi keccüna kho ghanan tagü sa ketenwa tsü sa waben, tsü tsüwi azimi nkechi mesa ketan dsaben.

¹⁸ Akho tsathang atuwa wi nthu na kekinyi ghena gho saghuben, nu kekuli mangla nsala.

¹⁹ Atsse pi kekinyi sapi Apvüwa kecü sa nu mecang pi kekinyi ghena khuchi: amesü süpon kaghani keni, khaghaneni süpon kesü, nu khaghaneni zza amapi kesü ji asüpon tagü, tsüdila nyu ghojünkeya mangla nkemi yaben.

²⁰ Asu pi kekinyi oliv deli pi sati kesaghu tsü khuchi: amesü süpon kesü wi awheng kilogram kecheng cheng; khaghaneni süpon wi awheng kilogram keni,

²¹ nu khaghaneni zza kesü wi awheng kilogram kesüsü tsüti pi saghu ben.

²² Aneni süpon kesü la pi kesami ghena kekinyi sa chi, hatinu anyithu sakemetha keccüna sa chilo.

²³ Ghanen kaghapen mecang pi kekinyi sa keten miwi hathu ha salo.

²⁴ Tsüti ghanan tagü tsü atsse pi kekinyi sapi Apvüwa cü. Ma na tsü han nen den. Atsathangla mecang pi kekinyi nu kisengtssü pi kekinyi miwi la kekinyi ha salo.

²⁵ Tagü ghanan wi kekinyi ghena kemetuli nu kekuli mangla nsala.

Matheükedhi Kho wi Kekinyi

²⁶ Matheükedhi Kho tsathang atuwa wi nthu na asu ketheü pi kekinyi sapi Apvüwa cüben, nthu saghu nu kekinyi sa nu nthu kekuli mangla nsala.

²⁷ Apvüwa na ma han nen ketenwa mecang pi kekinyi tsü sa chi: amesü süpon kaghani keni, khaghaneni süpon kesü, nu khaghaneni zza amapi kesü ji asüpon tagü, tsüdila nyu ghojünkeya mangla nkemi yaben.

²⁸ Asu pi kekinyi oliv deli pi sati kesaghu tsü khuchi: amesü süpon kesü wi awheng kilogram kecheng cheng, khaghaneni süpon wi awheng kilogram keni,

²⁹ nu khaghaneni zza kesü wi awheng kilogram kesüsü tsüti pi saghu.

³⁰ Aneni süpon kesü la pi kesami ghena kekinyi sa chi, hatinu anyithu sakemetha keccüna sa chilo.

³¹ Atsathangla mecang pi kekinyi nu asu pi kekinyi miwi hathu ha nu kisengtssü pi kekinyi salo.