SHICÜSI 27 - Kemethajüh (N) (Re-editing) Bible (BSI)

Zelofehad Ngathu

¹ Mahla, Noah, Hogla, Milka, nu Tirzah hathu na Hefer tsawa Zelofehad ngathu. Hefer na Gilead tsa, Gilead na Makhir tsa, Makhir na Manasseh tsa, Manasseh na Josef tsa.

² Mathu na wa Apvüwa ketenpen Nithsüjjen kedulen wi Mosa, keqhaikediwa Eleazar, ccülikesathu, nu azitenti tuwi ngan nu khi,

³ “Ikhang ba na atsa nmila aghansha wi shüa. Korah senkeniethu na Apvüwa matangla shun kesa witsü ma nmi; ma ketanla ma kesami ghena shü.

⁴ Ma atsa nkemi ghena ketan khe mangkesa na Israel ja wi ikhang ba nyan nmila nu? Keben-keyeng pi ikhang ba theghithu ikhang la cülo.”

⁵ Mosa na mathu cüki tsüpi Apvüwa kiza,

⁶ nu Apvüwa na ma wi khi,

⁷ “Zelofehad ngathu khi keben tsüna meshon le; keben-keyeng pi mathu ba theghithu cülo. Ma keben ya mathu ja wi ketsi waya thsülo.

⁸ Anyi kesü na atsa nmila shü lethu ma nga yala ma keben ghongya thsülo kesa Israel nyithu kizalo.

⁹ Keujüla ma nga nmi lethu ma cünyuthu ya tsü ghongya thsülo.

¹⁰ Keujüla ma acünyu nmi lethu ma ba cünyuthu ya tsü ghongya thsülo.

¹¹ Keujüla ma acünyuthu nyelela abizathu nmi lethu, ma theghi ghatsan ntsawa ya tsü ghongya thsü nu ma tsüpi ma keben saya thsülo. Hi Apvüwa, no kekiza ti Israel nyithu na hapi nsathu keyishü ayen kesü sa nieben.”

Joshua Kessi pi Mosa Kutisakeya

¹² Apvüwa na Mosa kiza, “Abarim Yikha wi ki nu hi ayyi pi Israel nyithu cü ketenwa tsü ghang chilo.

¹³ No tsü kemu seng wi no la nbi Aaron ti shüaben,

¹⁴ kepaghenanye nshinyi qho Zin ghansha wi iyenkhukechi tsü matangla shun kesalina. Meriba wi azitenti mabenla leben-nkaghajüh khi nu hi keshun wi nshinyi na mathu tuwi hi kemetha kekhangwa tsü nkechü ghe sala hhaghe.” (Meriba na Zin ghansha wi Kadesh wi tssükebvüpen kesü.)

¹⁵ Mosa na kekhie sa,

¹⁶ “Apvüwa Anyiza, kahang tsüdi bvüwa, anyithu ssiya kemehai nyi kesü kessiyalo,

¹⁷ isathu ma aghi wi mathu lentsütsonya mehai, isanu n-nyi zitenti ya khaghaneni kehiewa nkemi ti nsa thsüle kesalina.”

¹⁸ Apvüwa na Mosa wi khi, “Nun tsa Joshua aghamu na ma miwi kebenwa tsü ssiya nu nkwen chang pi ma miwi chilo.

¹⁹ Ma pi keqhaikediwa Eleazar nu azitenti maben tuwi ngan thsü nu mathu tsüdi tuwi na ma nkuti kesawa le thang chilo.

²⁰ No kekhang pahan pi ma cülo, isanu Israel nyi zitenti mabenla ma jühkina thsüle kesalina.

²¹ Ma keqhaikediwa Eleazar na Urim nu Thummim sen nu hi kemeshen chükeyawa tsü nondiden. Hatinu Eleazar na Israel nyi zitenti maben ghena alentagha wila Joshua lentsütsonben.”

²² Mosa na Apvüwa ma kekiza ti sa. Ma Joshua pi keqhaikediwa Eleazar nu azitenti maben tuwi ngan thsü.

²³ Apvüwa na kekhi ti Mosa na ma kwen chang pi Joshua miwi chi nu Joshua na ma kuti kesawa le kesa pi thangchia.