SHICÜSI 21 - Kemethajüh (N) (Re-editing) Bible (BSI)

Kanaan Nyithu Miwi Khangkeya

¹ Kanaan yyi acülawa keben Kanaan nyi Arad kadimiwa na Israel nyithu na Atharim len wi ghoten le kesa zakeya wi ma wa mathu ssikaghashen nu mathu pahan ghanya.

² Tsaseng wi Israel nyithu na Apvüwa wi kishen: “No ithu ya anyi hathu miwi khangya thsü lethu, ithu na mathu nu mathu nyunutithu tsü mangla nkhila satemetha pi no cü nu mathu yasatha saaben.”

³ Apvüwa na mathu kekhi ti sa cü nu mathu kiqa pi Kanaan nyithu miwi khangya thsüa. Tsalina Israel nyithu na mathu nu mathu nyunutithu yasatha sa, nu apen tsüpi Hormar cia.

Lezza Pi Amaghang Kecü

⁴ Israel nyithu na Edom yyi vü wale kesalina Hor Yikha teshi theng nu Aqaba yyitssükevüwi kewalen wiwa wa. Isala anyithu na alenca wi mathu leben minu

⁵ nu mathu na leben nkaghajüh khipi Anyiza nu Mosa shun nu khi, “Mangkesa na no Ejipt wina ithu ssi shhugho he ayyikeshü wi kedsakejjü nu atssü nkemi pen wi shü thsüale ben nu? Ithu na kedsakejjü ha kethadhau ha dsaben meyachadha!”

⁶ Apvüwa na ajikepvü amaghang kesun pi anyithu ja wi chi, nu Israel nyithu kejon mcüthi shan.

⁷ Anyithu na Mosa wi gho nu khi, “Ithu na magha nu Apvüwa keshun ghena samidha. Khili Apvüwa wi kekhie sa nu ithu wina amaghangthu ha senbvü thsülo.” Tsalina Mosa na anyithu ghena kekhie sa.

⁸ Apvüwa na Mosa kizala amighe pi amaghang kesü cüya nu pi achan miwi chiya, isanu amaghang na ma mcü-pvü kebenthu yala tsü ghang nu mehaiya thsüle kesalina.

⁹ Tsalina Mosa na lezza pi amaghang kesü cüya nu pi achan miwi chiya. Anyi kesüle kesü lela amaghang na ma mcü-pvü kebenwa na lezza pi kesa amaghang tsü ghang chi nu mehaiya.

Hor Yikha wina Moab nyithu Yyiketijü wi Kewa

¹⁰ Israel nyithu na apen ketsen sen wa Oboth wi kemnanpen sa.

¹¹ Mathu na apen tsü keteshi seng wi Moab nyithu yyi na nishuwa Abarim keyasa ghansha wi kemnanpen sa.

¹² Tsaseng wi mathu na wa Zared yyiketijü wi kemnanpen sa.

¹³ Ciwi mathu na kheneng apen ketsen sen wa Arnon Ghaku na aghawa kemnanpen sa, tsüna aghansha sa sen wa Amor yyi cuben. (Arnon na Moab nyithu nu Amor nyithu jüwi manyi kemeggü saben.)

¹⁴ Tsalina Apvüwa Aghikesa Lesüshen na khiben, “— Sufa yyi wi Waheb nyuti, nu yyiketijüthu; Arnon Ghaku,

¹⁵ nu yyiketijü tsüna kesüphe sa sen wa Ar nyuti cu nu Moab yyi kemeggü saben.”

¹⁶ Mathu ciwi na apen kesü Atssükhangthu ikesa wi wa nu ciwi Apvüwa na Mosa kiza, “Anyithu saghuyalo, hi atssü pi mathu cüten na.”

¹⁷ Tsü tsüwi Israel nyithu na akhwi ha sa: “Atssükhangthu, atssü bvüshi chilo; Ithu na akhwisa pi tsü ssiyaden —”

¹⁸ “Kaditsathu nu nyu ccülikesathu na atssükhang tsü chhü theng, Kadimi khhatssü nu mathu khhatssü pi tsü chhü theng.” Mathu na aghansha ciwi na apen ketsen sen nu Mattano wi wa,

¹⁹ nu ciwi na Noahliel, nu Noahliel wina Bamoth,

²⁰ nu Bamoth wina Moab nyithu yyiketijü Pisga Yikha shoni wi ben nu yasha ayyiketijü ghapeya kemehai pen wi tsü wa.

Kadimi Sihon nu Kadimi Og miwi Khangkeya

²¹ Israel nyithu na nyilo kesun pi Amor nyi kadimi Sihon wi chi nu khi thsü,

²² “Ikhang ya n-yyi pvüdhi waya thsülo. Ikhang nu ikhang sahangthu alen teshi nu nthu lli nu kemeshentsse llithu wi wa thsü nben, nu ikhang na nthu tssükhang wi atssü jjü nben; ikhang na nthu yyi npi kepvüdhi chu alentonti wi ketan lentsen ben.”

²³ Isala Sihon na Israel nyithu ya ma yyi pvüdhi nwa thsü mvula. Ma süpahizi saghuya nu Jahaz ghansha wi shula Israel nyithu ssikaghashen wa.

²⁴ Isala Israel nyithu na aghi wi ghinyithu kejon pathia nu mathu yyi aghawa Arnon Ghaku na wa Ammon nyithu yyi Jabbok kecu nkaya, kepaghenanye Ammon nyithu na mathu ggü khweti mehaitsü satheng.

²⁵ Tsalina Israel nyithu na Amor nyithu nyunuti tsüdi pi Heshbon nu tsü kevü anyuti tsüdi saghu nkaya nu mathu ciwi hangwa.

²⁶ Heshbon na Amor nyi kadimiwa Sihon ghazen nyunuti, ma kheni Moab kadimi ssikaghashen nu ma yyi tsüdi wa Arnon Ghaku kecu nkaya.

²⁷ Tsalina zacithu akhwisa: “Kadimi Sihon nyunuti Heshbon witsü gholo! Ithu na tsü sa nu sanengya kesa tsü ghang mvu benle.”

²⁸ “Matsü kesü wi Sihon süpahizi na Heshbon nyunuti hawa wina anni ti sa shhu le! Tsüna wala Moab yyi wi Ar nyunuti tsü yasa, Nu Arnon yyishiphon thu meiwa mecang.”

²⁹ “Moab nyi, nthu ghena khatila qhethiketen sadha nu! Nthu Khemosh kekinyithu yasa pidha! Nthu cenpvüthu na npvüzathu sapi kushinyi sa thsü; Nu nzathu ya Amor nyi kadimi tssüzüthu sa thsüa.”

³⁰ “Isala khili mathu shicübvüghathu pashadha, Heshbon na Dibon wi kewalen wi, Medeba kete Nashim wina Nofa wi kewalen tsüdi wi.”

³¹ Tsalina Israel nyithu na Amor nyithu yyi wi hang wa,

³² nu Mosa na wahhaithu kesun pi Jazer nyunuti tsü ssisa le kesalina alen kemehai ntsa ghang wa thsü. Israel nyithu na anyunuti tsüwa nu ma kevü nyutithu nkaya nu ciwi hang keben Amor nyithu jügüshia.

³³ Tsaseng wi Israel nyithu na kheneng sen nu Bashan len wi wa, nu Bashan kadimiwa Og na ma süpahizi ssi wa Edrei wi mathu ssisa.

³⁴ Apvüwa na Mosa wi khi, “Ma nmessi lalo. Hi no ya ma nu ma nyithu tsüdi, nu ma yyi miwi khangya thsüaden. No Heshbon wi kekhang kesenwa Amor nyi kadimi Sihon miwi kuli kechi ti ma miwi la kuli chilo.”

³⁵ Tsalina Israel nyithu na Og, ma tsathu, nu ma nyithu thola nheila tsüdi pathikhia, nu mathu na ayyi tsü nkaya.