SHICÜSI 20 - Kemethajüh (N) (Re-editing) Bible (BSI)

Kadesh Wi Kekulithu

¹ Asha atuwa wi Israel nyi zitenti na Zin ghansha wi gho nu Kadesh wi kemnanpen sa. Ciwi Miriam na shü nu pi vhüa.

² Mathu kemnanpen wi tsü atssü nmi, tsalina anyithu na saghu Mosa nu Aaron manyi vüya,

³ nu leben nkaghajüh khi ketenthu na ithu Israel nyithu gweghe Apvüwa Nithsüjjen tuwi shü kesawa mehai kesa nan.

⁴ Mangkesa na nshinyi ikhang ssi nu he aghansha wi shhugho nu? Isanu ithu ya he wi ithu sahang gweghe shü thsüale ben nu?

⁵ Mangkesa na nshinyi Ejipt wina ithu ssi shhugho hewi ketizenkesa mangla nkeshigü pen wi chi nu? Hewi asu, khhaghabvü, kemeshentsse, nu ahhibvü mangla nmi. Nu atssü kejjü cünkhala nmi.”

⁶ Mosa nu Aaron manyi anyithu wina bvü wa Nithsüjjen kedulen wi ngan wa. Manyi na ayyi wi nkhwendu, nu Apvüwa keten kewegü na manyi tuwi shhugho.

⁷ Apvüwa na Mosa wi khi,

⁸ “Cenkethenjüh Khitson tuwi akhhatssü tsü khuyalo, nu Aaron nshinyi azitenti maben saghu yalo. Ciwi mathu tsüdi tuwi na alon ciwi keben tsü ccüneng, isathu ciwi atssü na shhugho ben. Hatinu nshinyi alon wina atssü sen shhugho anyithu nu mathu sahangthu jjüya thsüben.”

⁹ Apvüwa na kekhi ti Mosa na wa akhhatssü tsü khuya.

¹⁰ Ma nu Aaron manyi na azitenti maben pi alon tuwi saghuya thsüa, nu Mosa na khi, “Nthu nyu matang ketenthu kinalo! Ishinyi na alon hawi nthu ghena atssü muya mehai kwe?”

¹¹ Tsaseng wi Mosa na akhhatssü zanki pi keni tughu alon tsü kihhe chi, nu atssü keti na bvü shhugho, nu anyithu nu asahangthu tsüdila tsü jjüya.

¹² Isala Apvüwa na Mosa nu Aaron manyi ssikitagha nu khi, “Nshinyi Israel nyithu tuwi hi kemetha kekhang kebenwa tsü nchü nu n-nondila kesalina nshinyi na mathu ssinu hi ayyi pi mathu cüle khishi ketheng wi tsü waya thsü nben.”

¹³ Hawa ha Apvüwa na ma methale kesa pi anyithu ccüca nu Israel nyithu na leben nkaghajüh khipi Apvüwa shun kesa pen Meriba wi sa.

Edom Kadimiwa na Israel Nyithu ya Pvüdhi Nwathsü Mvulakesa

¹⁴ Mosa na Kadesh wina nyilothu kesun pi Edom kadimiwa wi chi, mathu na khi, “Ajüh hawa ha nshili Israel mizzathu wi na kegho: No, ikhang na agükeccü nu ketizekesa tsü chüben,

¹⁵ tsüna ikhang bamyithu na khati nu Ejipt wi wa nu ikhang ciwi amapi kejon hangwa khe, Ejipt nyithu na ikhang bamyithu nu ikhang metenmesha,

¹⁶ nu ikhang na Apvüwa wi kekiqa khiechi. Ma ikhang kiqai hhai zaya nu tangnyilo kesun pi Ejipt wina ikhang ssi shhugho. Ikhang na khili Kadesh wi anyuti kesü n-yyi kemeggü wi ben.

¹⁷ No nchala ikhang ya n-yyi pvüdhi waya thsülo. Ikhang nu ikhang sahangthu na alen teshi nu nthu lli nu kemeshentsse llithu wi wa nben, nu ikhang na nthu tssükhang wi la atssü jjü nbenle. Ikhang na nthu yyi npi pvüdhikeya chu alentonti wi ketan lentsenben.”

¹⁸ Isala Edom nyithu na luneng, “Ikhang na nthu ya ikhang yyi pvüdhi thsü nten! Keujüla nthu na tsüti sa lethu, ikhang na nthu ssikaghashen ben.”

¹⁹ Israel nyithu na khi, “Ikhang na alentonti wi ketan lentsenben, nu keujüla ikhang le ikhang sahang lela nthu tssü jjü lethu ikhang na ma men sapi cüaben — ikhang nmvu kebenwa na nthu yyi pvüdhi waya thsülo.”

²⁰ Edom nyithu na khineng, “Nthu na tsü pvüdhi waya nben!” Isanu mathu na süpahizi kekhang ssisen Israel nyithu ssikaghashenle lentsen shhu.

²¹ Edom nyithu na Israel nyithu ya mathu yyi npvüdhi thsüla kesalina Israel nyithu na kheneng sen nu alen kepa wi wa.

Aaron Keshü

²² Israel zitenti na Kadesh teshi nu wa Hor Yikha cuya.

²³ Edom yyi kemeggü wi ciwi Apvüwa na Mosa nu Aaron manyi kiza,

²⁴ “Aaron na hi ayyi pi Israel nyithu cüle khishi ketheng wi tsü duya nten; ma shüa tendha, kepaghenanye nshinyi na Meriba wi iyenkhukechiwa tsü matang nu shun.

²⁵ Aaron nu ma tsawa Eleazar manyi ssiya nu Hor Yikha wi shulo,

²⁶ nu ciwi Aaron miwi keqhaikedi gwomejuwa kaghazu tsü khusha pi Eleazar miwi chi cülo. Aaron na ciwi shüaden.”

²⁷ Mosa na Apvüwa ma kekiza ti sa. Azitenti maben tuwi na mathu na Hor Yikha wi shu,

²⁸ nu Mosa na Aaron miwi keqhaikedi gwomejuwa kaghazu tsü khusha pi Eleazar miwi chi cüa. Ciwi ayikha shoni wi Aaron na shüwa, nu Mosa nu Eleazar manyi na kheneng dugho.

²⁹ Azitenti maben na Aaron na shüdha le kesa chüya nu mathu tsüdila ma ghena ghanan changha anongü.