SHICÜSI 19 - Kemethajüh (N) (Re-editing) Bible (BSI)

Amesü Kenmie Kemecangkhala

¹ Apvüwa na Mosa nu Aaron manyi kiza

² nu ayen hathu pi Israel nyithu cü thsü. Amesü kenmie kesü nyu ghojünkeya mangla nkemi ssinu kekuli npi kesa ji ssigho,

³ nu tsüpi keqhaikediwa Eleazar cülo. Tsü ssinu kemnanpen na ameiwa shhu nu ma ketenpen wi pathiben.

⁴ Eleazar na tsü jjü pahan khuya nu ma kwenzza pi tenya nu pi tagü tughu Nithsüjjen kepeghewa keghü chi.

⁵ Asahang maben ma hyu, ma sa, ma jjü, nu ma kughung saghu pi keqhaikediwa keben na mecang shaben.

⁶ Tsaseng wi ma sedar chan pahan, shonpheghe tsang kesü, nu anonwe khuya nu tsüthu pi anni wi cüchi.

⁷ Tsaseng wi ccüna ma thsümeni ghasü, atssükizü, nu kemnanpen wi duya mehai; isala ma minulen kecu keccüna wi nmethala benben.

⁸ Anyi amesü kemecangwa tsü la ma thsümeni ghasü, atssükizü, isala ma la minulen kecu nmethala benben.

⁹ Anyi keccüna wi metha kebenwa na wala amesü kemecangkhala tsü saghuya nu sen wa kemnanpen na ameiwa keccüna ghena kemetha pen wi chiaben, tsüpi ciwi theng nu Israel zitenti na keccüna wi nkemetha kebhu wi kisengtssü sale kesalina. Kesami sakemetha ghena keccüna ha saben.

¹⁰ Anyi anni kemecangkhala kesaghuwa tsü ma thsümeni ghasü, isala ma minulen kecu nmethala benben. Ayen hawa ha matsü ghaketen tsüdi wi Israel nyithu nu asang mathu ja wi hang kebenthu tsüdi ghena la.

Keshü Kamang Kekidhen Ghena

¹¹ Anyi thowa na keshü kamang kidhen khe ghanan tagü keccüna wi nmethala benben.

¹² Ma kecheng ghanan nu tagü ghanan wi sakemetha tssü pi ma ketanla ma sametha nsathu yishü, isalethu ma metha shaben.

¹³ Anyi thowa na ma keshü kamang kidhen nu ma ketanla ma sa nmethala khe ma nmethala benben, kepaghenanye sakemetha tssü tsüpi ma miwi nkeshu chi. Ma Apvüwa Nithsüjjen tsü kekinyen saben, nu ma pi Anyiza nyi kesüle nsala shaben.

¹⁴ Anyi kesü na Nithsüjjen wi shü lethu, ma keshü tsüwi anyi ciwi kebenwa nyelela ciwi keduwa na ghanan tagü keccüna wi nmethala benben.

¹⁵ Nithsüjjen wi atssüpfü nu afü ma keshan nkemithu tsüdila nmethala shaben.

¹⁶ Keujüla anyi kesü na nyu ma kepathi nyelela ayela wi matsü wina keshü, anyi gü nyelela ashüjjen kidhen lethu ma ghanan tagü nmethala shaben.

¹⁷ Nkemetha samethale kesalina kesami sakemetha ghena amesü kenmie kemecangkhala tsü pahan khuya nu pi apfü kesü wi chiya, nu atssü kemetha pi saghuya.

¹⁸ Atuwa wi tsü, anyi pahan keccüna wi metha kebenwa na shonpheghe tsang kesü khuya nu pi atssü wi ten chiya, nu pi Nithsüjjen, tsanqai ciwi keben tsüdi, nu anyithu tsüdi keghüben. Keniwa wi tsü anyi pahan keccüna wi metha kebenwa na atssü pi anyi gü, keshü kamang nyelela ashüjjen kekidhenwa tsü miwi keghü chi.

¹⁹ Kecheng ghanan nu tagü ghanan wi anyi keccüna wi kemethawa na atssü pi anyi nkemethawa miwi keghü chi. Tagü ghanan wi ma anyi tsüwa sametha, anyi tsüwa na ma thsümeni ghasü nu ma ketanla atssü pi ma miwi keshu chi kesa seng wi na ma keccüna wi aghani kedu pang wi metha shaben.

²⁰ Anyi kesüle kesü lela keccüna wi nmethala kesawa ma ketanla ma sa nmetha lethu ma nmethala benben, kepaghenanye sakemetha tssüwa tsüpi ma miwi nkeshu chi. Ma Apvüwa Nithsüjjen tsü kekinyen saben, nu ma pi Anyiza nyi kesüle nsala shaben.

²¹ Nthu na matsü ghaketen tsüdi wi ayen ha nieben. Anyi sakemetha tssü pi nyu miwi kekishu chiwa la ma thsümeni ghasü nsathu yishü; anyi thowa na atssü tsü kidhen khe ma minulen kecu keccüna wi nmethala benben.

²² Anyi nkemethawa na mangwa kidhen khe tsüna nmethala ben, nu thowa na tsü kidhen khe ma minulen kecu keccüna wi nmethala benben.