SHICÜSI 18 - Kemethajüh (N) (Re-editing) Bible (BSI)

Keqhaikedi Nu Levi nyi Kekulithu

¹ Apvüwa na Aaron wi khi, “No, ntsathu nu Levi nyithu na hi ketenpen Nithsüjjen wi kekuli kesazzi ghena ketizen saaben, isala keqhaikedi kekuli kesazzi ghena no, nu ntsathu ketan ketizen saaben.

² No nu ntsathu na Nithsüjjen wi kekuli kesa wi nthu gweghe kekuli sa nu nthu kiqa thsüle kesalina Levi mizza wi nshilithu ssi gholo.

³ Mathu na no kekuli tsü sacen nu Nithsüjjen wi mathu kekuli tsü saben, isala mathu na Kemetha Pen nyelela kekinyipen wi kemetha tsanqaithu tsü pa nben. Keujüla mathu na tsüti sa lethu mathu nu no la pi shü thsüaben.

⁴ Mathu na no gweghe kuli nu Nithsüjjen wi mathu kekuli tsüdila sacen ben, isala kekuli nkesa qo nyi thola no gweghe kuli nben.

⁵ No nu ntsathu ketan Kemetha Pen nu kekinyipen wi kekuli tsü sacen ben, isanu ighekepvüwa tsü ya Israel nyithu miwi ngho neng thsüle kesalina.

⁶ Israel nyithu ja wi Levi nyi nshilithu kessiya nu pi aju sapi no kecüwa tsüna hi le. Mathu ya Nithsüjjen wi mathu kekuli sa thsüle kesalina mathu satemetha pi hi cüdha.

⁷ Isala no nu ntsathu ketan Kemetha ntsa Pen nu kekinyipen wi keqhaikedi kekuli tsüdila sacen ben. Nthu na kekuli hathu ha saben, kepaghenanye hi keqhaikedi ha pi nju sa cüdha. Kekuli nkesa qo nyi thowa na kemetha tsanqaithu tetsaki gho khe pi shü thsüaben.”

Keqhaikedithu Shei

⁸ Apvüwa na Aaron wi khi, “Ahhansha kesa wi pi nkemecang aju kemehai ntsa sapi hi kecü tsüdi hi pi no cü keben tsü meshen yalo. Hi tsüthu pi no nu nshicüthu cü keben tsüna anuphanla nthu ji.

⁹ Kemetha kekinyi pi kekinyipen wi nkemecangthu ha nthu ji; asu pi kekinyi, kesami ghena kekinyi, nu kedhineng ghena kekinyi. Kemetha kekinyi pi hi kecü tsüdila no nu ntsathu ji.

¹⁰ Nthu na kemetha pen wi tsüthu dsaben, nu npvüza ketan tsüthu tsü dsaben; tsüna nthu ghena metha.

¹¹ “Tsümiwi lela Israel nyithu na kepa wi aju kemehai sapi hi kecü tsüdi nthu ji. Hi matsü tsüdi ghena tsüthu pi no, ntsathu, nu n-ngathu cüben. Ntheghi keccüna wi metha kebenthu tsüdila tsü dsaya mehai.”

¹² Israel nyithu na amapi kaghapengla mukeya atuwa wi kemehai ntsawa oliv deli, kisengtssü, nu asu pi hi kecü tsü tsüdi pi nthu cüben.

¹³ Tsüthu tsüdila nthu ji. Ntheghi keccüna wi metha kebenthu tsüdila tsü dsaya mehai.

¹⁴ “Israel nyithu na mathu kenen wi satemetha pi hi kecü tsüdila nthu ji.”

¹⁵ “Atsa tssütsewa nu asahang zza tssütsewa Israel nyithu pi hi kecü tsüdila nthu ji. Isala nthu na atsa tssütsewa tsüdi shü nengya kesa men tsü yaya, nu keccüna wi asahang nkemetha zza tssütsewa tsüdi men la yaya nsathu yishü.

¹⁶ Ghanyi asha kesü sa kebenthu tsü tsüwi apisa men kenie wina rükatssü manga pi shei neng yaben.

¹⁷ Isala amesü, khaghaneni, nu aneni zza tssütsewa tsü shü nengya nben; tsüthu tsüna iji nu pi ahhansha saaben. Tsüthu jjü pi kekinyipen keghü nu ma kethu tsü atsse pi kekinyi mecang nu hi nen keten han tsü sa chilo.

¹⁸ Tsüthu sa na nthu ji, ma nnukhu-kisü nu ma ccü ajewa tsüna kekinyi kemehai ntsa.”

¹⁹ “Hi matsü ghaketen tsüdi wi Israel nyithu na khuchi pi aju kemehai ntsa sapi hi kecü tsüdi pi no, ntsathu, nu n-ngathu cüden. Hawa ha hi no nu nshicüthu ssinu pakhhi nkeyaji Cenkethenjüh sa theng.

²⁰ Apvüwa na Aaron kiza, ‘No anuphan keben ji nshei mangla muya nben, nu Israel nyithu yyi wi n-yyi nmi. Hi Apvüwa, hi nthu nsenthu keyishüwa tsüdi tsüle.’ ”

Levi Nyithu Shei

²¹ Apvüwa na khi, “Hi, Israel nyithu na pi hi kecü tsüdi wi gishü tagha wi kesü pi Levi nyithu cüdha. Hawa ha mathu na hi ketenpen Nithsüjjen wi kekuli kutimen.

²² Israel nyithu kepa wi mathu ketanla keshü tsü sen nu mathu miwi ngho thsüle kesalina mathu na Nithsüjjen tsü tetsaki nghola yilo.

²³ Khili nten na Levi nyi ketan Nithsüjjen tsü noncca nu ciwi kekuli tsüdila saben. Ayen hawa ha anuphan nthu shicübvüghathu ghena la saben. Israel nyi ja wi Levi nyithu na anuphan kebenji tsü nmi,

²⁴ kepaghenanye Israel nyithu na aju kemehai ntsa khuchi pi hi kecü tsüdi wi hi gishü tagha wi kesü pi mathu keben saya thsüdha. Tsalina Israel nyi ja wi mathu na anuphan kebenji tsü ghongya nbenle kesa hi mathu kizadha.”

Levi Nyithu Ghena Gishü Tagha wi Kesü

²⁵ Apvüwa na Mosa kiza

²⁶ nu Levi nyithu wi khi thsü, “Apvüwa na pi nthu keben sayalo kesa Israel nyithu wi gishü tagha wi kesü tsü muya lethu, nthu na tsü gishü tagha wi kesü pi aju kemehai ntsa sapi Apvüwa ncüthu yishü.

²⁷ Aju kemehai khukechi hawa pi allikeca nyi na asu ketheü nu kisengtssü ketheü pi kekinyi sa kechi tsü makesü saden.

²⁸ Hatinu nthu na Israel nyithu wi gishü tagha wi kesü Apvüwa ji mukeya tsüdi wi nthu la pi aju kemehai ntsa sala khuchi ben. Nthu na aju kemehai ntsa ha sapi Apvüwa ghena pi keqhaikediwa Aaron cüben.

²⁹ Nthu mukeya ja wi kemehai ntsawa khuchilo.

³⁰ Allikeca nyi na ma kekinyi sa chi nu ma gilli pi thengya kesa tsüti, no kemehai ntsawa khukechi seng wi ma gilli tsüpi theng yalo.

³¹ No nu ntheghithu na ma gilliwa tsü kahewi lela dsaya mehai, kepaghenanye tsüna nthu na Nithsüjjen wi kekuli kutimen.

³² Nthu na kemehai ntsawa pi Apvüwa cü keben chu nthu tsü dsa lela kesazzi nmi. Isala Israel nyithu ju kemetha ja wi kemehai ntsawa khupi kekinyi npi kesa wi tsü dsa nu kekinyen nsala metsilo; nthu na tsüti sa lethu nthu pi shü thsüaben.”