SHICÜSI 17 - Kemethajüh (N) (Re-editing) Bible (BSI)

Aaron Khhatssü

¹ Apvüwa na Mosa kiza,

² “Israel nyithu amizza kesüsü wi accülikesawa akhhatssü kesüsü saghu taghakeni sen ghola no cülo kizalo. Anyi tsüwa nyan pi ma khhatssü miwi zhüya,

³ nu Aaron nyan pi Levi mithonwa khhatssü miwi zhüyalo. Ciwi akhhatssü kesü na amizza kesü wi accülikesawa ghena benben.

⁴ Tsüthu tsü sen nu hi ketenpen Nithsüjjen wi wa nu tsüthu pi hi no metu ketenpen wi Cenkethenjüh Khitson tuwi chilo.

⁵ Hi anyi kessiya kesawa khhatssü tsüna shigü shagha thsüaben. Hatinu hi Israel nyi hathu keshüthangla leben nkaghajüh khipi hi shun keten tsü khen shaben.”

⁶ Tsalina Mosa na tsü khipi Israel nyithu kiza, nu mathu na amizza kesü wi accülikesawa khhatssü kesüsü saghu taghakeni sengho ma cü, nu Aaron khhatssü pi mathu ji saghu.

⁷ Mosa na akhhatssü tsüdi pi Nithsüjjen wi Apvüwa Cenkethenjüh Khitson tuwi chi.

⁸ Dhitsüwa wi Mosa na Nithsüjjen wi wa nan Aaron khhatssü Levi mizza mithon kesawa tsüna shigü shagha kebenla muya. Tsüna bvüjjen, nu pvü shagha nu mcüshüli bi kenyün bünya.

⁹ Mosa na akhhatssü tsüdi khusen wa Israel nyithu ccüca. Mathu na khati sadha khe muya, nu accülikesathu na mathu khhatssü khunengya shan.

¹⁰ Apvüwa na Mosa kiza, “Aaron khhatssü tsüpi Cenkethenjüh Khitson tuwi chi nenglo. Tsüpi ciwi chi nu Israel nyithu na kematang kekuli tsü teshi nkesatsü shüaben kesa mathu ghena kekitsan kesü saden.”

¹¹ Mosa na Apvüwa kekhi ti sa.

¹² Israel nyithu na Mosa wi khi, “Isalethu tsüna ithu ghena asakhendha!

¹³ Keujüla anyi kesüle kesü lela Nithsüjjen tetsaki kegho ketanla shüaben lethu, tsüna ithu tsüdila shü kesa makesü.”