SHICÜSI 16 - Kemethajüh (N) (Re-editing) Bible (BSI)

Korah, Dathan, Nu Abiram Hathu Na Kematang kekuli

^1-2 Levi nyi Kohath gei wi Izhar tsa Korah na Mosa ccülikesa ghena tsü matang nu shun. Reuben mizza wi anyi meshu kecheng na ma gwegheya — Eliab tsa keni Dathan nu Abiram, nu Pelet tsa On — nu Israel nyithu kepa wi azitenti na kessikeya ccülikesathu kemechan 250.

³ Mathu na Mosa nu Aaron manyi tuwi saghuya nu manyi wi khi, “Nshinyi na pongca mtsüdha! Azitenti ha matsüdila Apvüwa ji, nu ma ithu tsüdi ssiden. Isathu Mosa, no mangkesa no ketanla no sapi Apvüwa nyitenti miwi chiten nu?”

⁴ Mosa na ha zakeya wi ma ketanla ayyi wi nkhwendu kekhie sa.

⁵ Tsaseng wi ma shagha Korah nu ma senkeniethu wi khi, “Ghanen wi Apvüwa na ithu thowa na ma ji khe pi ithu ccücaben; thowa na ma ji, ma thowa kessiyadha khe tsü ya kekinyipen wi ma wi waya thsüben.

^6-7 Ghanen wi no nu nsenkeniethu annikhu khuya nu anni mihi nu hankedemvu pi chiya, nu tsüthu sen nu kekinyipen wi walo. Isathu Apvüwa na ithu thowa kessiyadha khe ithu na muyaben. Nthu Levi nyithu na pongca mtsü benle!”

⁸ Mosa na Korah wi khi, “Kinalo, no Levi nyithu!

⁹ Israel Nyiza na nthu ya ma tsaki gho nu Apvüwa Nithsüjjen wi kekuli sa nu azitenti tuwi ngan nu mathu kekuli sa thsüle kesalina azitenti ja wi nthu khuthi pi makepa sa ketheng tsüpi kizzakeu saben kwe?

¹⁰ Ma no nu Levi nyi kepathu la kekinyikü ha muya thsü — nu nthu na khili keqhaikedishi tsü la muyale saben!

¹¹ Nthu na leben nkaghajüh khipi Aaron keshun tsüna no nu nsenkeniethu na Apvüwa matang ben.”

¹² Tsaseng wi Mosa na nyu kesun pi Dathan nu Abiram ci chi thsü, isala manyi na khi, “Ishinyi gho nten!

¹³ No Ejipt yyi kecca kemehai wina ithu ssi shhugho he aghansha wi shü thsüale keben ha n-nonkwen nben kwe? No ithu miwi la Apvüwa sale benla?

¹⁴ No ntsakhiwa ithu ssinu ayyi kemehai wi wa nten nyelela alli nu kemeshentsse llithu nkapi ithu ji saya thsüle nben, nu no khili ithu mechu bendha. Ishinyi ghoya nben.”

¹⁵ Mosa na aghepvü nu Apvüwa wi khi, “Anyi hathu ha kekinyi sen kegho tsü mangla meya lalo, hi mathu tuwi mangla nsazzi; hi mathu gada kesü lela khu meya.”

¹⁶ Mosa na Korah kiza, “Dhitsü wi no nu nsenkeniethu 250 ssinu Apvüwa ketenpen Nithsüjjen wi nghothu yishü. Aaron la ciwi ben laben.

¹⁷ Nthu kesüsü annikhu khuya nu hankedemvu pi chiya, nu sengho kekinyipen wi chilo.”

¹⁸ Tsalina anyi tsüdi annikhu khuya nu anni mihi nu hankedemvu pi chiya, nu sen wa Nithsüjjen kedulen wi Mosa nu Aaron gweghe nganya.

¹⁹ Tsaseng wi Korah na azitenti maben saghuya, nu mathu na Nithsüjjen kedulen wi Mosa nu Aaron manyi wiwa peghe nu ngan. Zuli Apvüwa keten kewegü na azitenti tuwi gho,

²⁰ nu Apvüwa na Mosa, Aaron manyi wi khi,

²¹ “Anyi hathu wina kheneng bvülo, hi khili mathu yasa tendha.”

²² Isala Mosa nu Aaron manyi ayyi wi nkhwendu nu khi, “Oh Anyiza, no kahangli tsüdi sa kechiwa. Anyi kesü na sami lethu, no azitenti maben miwi n-ghepvü ten kwe?”

²³ Apvüwa na Mosa kiza,

²⁴ “Anyithu wi Korah, Dathan, nu Abiram nithsüjjenthu wina bvülo kizalo.”

²⁵ Tsalina Israel nyi ccülikesathu na Mosa gweghe Dathan nu Abiram wi wa.

²⁶ Ma anyithu wi khi, “Anyi gheshighena hathu nithsüjjen wina bvülo, nu mathu tsanqai mangla npala. Tsüti nsalethu mathu kesami ghena nthu pi mathu gweghe yasa piaben.”

²⁷ Tsalina mathu na Korah, Dathan, nu Abiram nithsüjjen wina bvüa. Dathan nu Abiram manyi na manyi wubvü, manyi tsangathu ssi shhugho manyi nithsüjjen kedulen wi nganben.

²⁸ Mosa na anyithu wi khi, “Ha wina nthu Apvüwa na hi kesun pi ha tsüdi sa thsü, nu tsüna hi kemeshen wina hi tsüthu tsü nsale kesa chüya.

²⁹ Keujüla anyi hathu ha Anyiza wina kemeten nyela keshüyen wina shü lethu, tsüna Apvüwa wina hi kesun nchile.

³⁰ Isala keujüla Apvüwa na pala ketheütha sachi, nu ayyi na qankhhi pi mathu nu mathu keben tsüdi meji; isanu mathu kahang na keshü yyi wi du lethu, anyi hathu ha Apvüwa meya mvula le kesa nthu na chüyaben.”

³¹ Ma ajüh khisha meyi, Dathan nu Abiram manyi cakhu wi ayyi na qankhhi pi

³² manyi nu manyi theghithu, Korah senkeniethu tsüdi nu mathu keben saghu mejiya.

³³ Tsalina mathu tsüdila mathu kahang na mathu keben gweghe keshü yyi wi dua. Ayyi na gho mathu meju bhonya nu mathu nmula.

³⁴ Israel nyi ciwi kebenthu tsüdi mathu kiqai hhai zaya nu bvüa. Mathu na jisha, “Ayyi na ithu la meji yaben na bvülo.”

³⁵ Tsaseng wi Apvüwa na anni kesun chipi anyi 250 na hankedemvu khuchi kebenthu tsü mecangthia.

Annikhuthu

³⁶ Tsaseng wi Apvüwa na Mosa kiza,

³⁷ “Keqhaikediwa Aaron tsa Eleazar na anyithu kemecang ja wi lezza nnikhu tsü khuya, nu annikhu wi amihi tsüpi khalalo kizalo, kepaghenanye annikhuthu tsüna metha.

³⁸ Tsüthu tsüpi Apvüwa kekinyipen wi khukechi tsüwi methadha. Tsalina anyithu na mathu kesami ghena pi shü thsü kesathu nnikhu tsü khuya nu kihhe pi akhu ghapasi saya nu pi kekinyipen keshanji sayalo. Hana Israel nyithu ghena kekitsan kesü saben.”

³⁹ Tsalina keqhaikediwa Eleazar na annikhuthu tsü khuya nu kihhe pi akhu ghapasi saya nu pi kekinyipen keshanji saya.

⁴⁰ Hana Israel nyithu ghena kekitsan kesü, Aaron shicü nkenye anyi thola gho kekinyipen wi Apvüwa ghena hankedemvu nmecang thsüle kesalina. Nyelethu ma la pi Korah nu ma nyithu ti yasa ben. Ha tsüdila Apvüwa na Mosa wina Eleazar kekiza ti sa.

Aaron na Anyithu Hhangshakeya

⁴¹ Dhitsüwa wi azitenti mabenla leben nkaghajüh khipi Mosa nu Aaron manyi shun nu khi, “Nshinyi na Apvüwa nyi pahan pathidha.”

⁴² Mathu tsüdi saghu nu Mosa nu Aaron manyi keshun seng wi mathu khapeghe wa Nithsüjjen kepeghewa ghang chi nan akulukeshü na tsü mejubhon nu Apvüwa keten kewegü na keshhugho muya.

⁴³ Mosa nu Aaron manyi wa Nithsüjjen tuwi ngan,

⁴⁴ nu Apvüwa na Mosa wi khi,

⁴⁵ “Anyi hathu wina kheneng bvülo, hi khili mathu yasa cüden!” Manyi na ayyi wi nkhwendu,

⁴⁶ nu Mosa na Aaron kiza, “Nji annikhu khuya nu kekinyipen wi anni mihi pi chiya, nu hankedemvu pahan pi amihi miwi chiyalo. Tsaseng wi wan wa anyithu wi mathu satekemetha keccüna sa chilo. Kaghajilo! Apvüwa na ma ghepvü shaghadha nu adhagha na sa shhughodha.”

⁴⁷ Aaron na tsü kinaya, ma annikhu khuya nu bvüsen anyithu mehu keben ja wi dua. Ma adhagha tsüna sa shhugho kesa mukeya wi hankedemvu pi amihi miwi chiya nu anyithu ghena satekemetha keccüna sachi.

⁴⁸ Hana adhagha tsü khen, nu ma kahangthu nu keshüthu jüwi ngan.

⁴⁹ Korah na kematang kekuli wi keshüthu tsü nkhichila anyi 14,700 na shüa.

⁵⁰ Adhagha kecen seng wi Aaron na Nithsüjjen kedulen wi Mosa wi kheneng ghoa.