SHICÜSI 14 - Kemethajüh (N) (Re-editing) Bible (BSI)

Anyithu na Leben nkaghajüh kekhi

¹ Ghaja thangthang anyithu na leben güccü nu qai.

² Mathu na leben nkaghajüh khipi Mosa nu Aaron manyi shun nu khi, “Ithu na Ejipt wi ben nu shü kesawa mehai kesa nyelela hewi aghansha wi shü kesawa la mehai kesa le!

³ Mangkesa na Apvüwa na ithu ssinu ayyi ciwi waten nu? Ithu na aghi wi shü, nu nyu na ithu wubvüthu nu atsangathu ghanya shaben. Ithu na Ejipt wi wa neng kesawa nmehai kwe?”

⁴ Tsalina mathu na khokho wi khi, “Ithu ccülikesawa kesü kessiya nu Ejipt wi wa neng nalo!”

⁵ Mosa nu Aaron manyi na anyi tsüdi tuwi na ayyi wi nkhwendua.

⁶ Nun tsa Joshua nu Jefunne tsa Kaleb, wahhai keni na manyi hathakina wina athsümeni mezüqhe,

⁷ nu anyithu wi khi, “Ikhang hhainan kewa yyi tsüna mehai ntsawa le.

⁸ Apvüwa na ithu wi ma kenen ben lethu ithu ssiwa apen tsü cu cü nu ayyi kecca kemehai tsüpi ithu cüben.

⁹ Apvüwa nshunla nu anyi ciwi kahangthu nmessi lalo. Ithu na lekete nu mathu miwi khangya ben. Apvüwa na ithu ssiten nu mathu cenpvüthu mathu khwe keten miwi khangyadha; tsalina nmessi lalo.”

¹⁰ Anyitenti mabenla alon pi manyi kecenthi shale pateqhe, isala anyithu na zuli Apvüwa keten kewegüwa na Nithsüjjen miwi kegho muya.

Mosa na Anyithu ghena Kekhie

¹¹ Apvüwa na Mosa wi khi, “Anyi hathu na matsü khatu khatila hi meya mvula benten nu? Hi mathu ja wi amankesa kejon kulichi lela mathu na khatu hi n-nondila hhaghe benten nu?

¹² Hi adhagha kesü kesun pi mathu yasa cüden, isala hi no sapi mathu miwi kedikekhang mizzatenti kesü ba sa thsüden!”

¹³ Isala Mosa na Apvüwa wi khi, “No kekhang wina Ejipt wi anyi hathu ssinu shhugho. Ejipt nyithu na no n-nyithu miwi kuli kechi cüki zakeya wi,

¹⁴ mathu na tsüpi anyi ayyi hewi kahangthu kiza ben. Anyi hathu na no Apvüwa, no ithu ssiden, akulukeshü na gho ithu miwi nganwa kesa wi ithu ya no muya thsü, nu no ghanan lethu akulukeshü cü nu aghaja lethu anni keqhe cü wina ithu tu satenle kesa zayadha.

¹⁵ No khili n-nyithu ha tsüdi pathikhi lethu, mizzatenti n-nyan kemechan za keyathu na

¹⁶ no n-nyithu ssi wa ayyi pi mathu cüle khishi ketheng wi tsü du meyala kesalina no aghansha wi mathu pathikhidha le kesa khiben.

¹⁷ Tsalina Apvüwa, hi no wi khieben, no hati khi nu khishi ketheng tsü kekhang pi ithu ccücalo,

¹⁸ ‘Hi Apvüwa, hi wan aghepvü nten, nu hi nanketizen keti, jühtsentsa kesa, nu kematang nu kesami teshi kecü pi ccücaden. Isala hi kemeten pi mathu bajjathu kesami ghena abvüye kecheng mejü wi lela mathu tsangathu, tsanga ngathu nkecü sa nben.’

¹⁹ Tsalina Apvüwa, no nanketizen kemili nketen kenie wina mathu Ejipt keteshi nten na mathu kesami teshi kegho ti khili anyi hathu kesami teshi cülo kesa hi khie benle.”

²⁰ Apvüwa na luneng, “No kekhie ti hi mathu kesami teshi cüden.

²¹ Isala hi hangben nu ayyi pong keben ti hi ijüh khuchi ben,

²² anyi hathu ha thola hangben nu ayyi tsüwa wi duya nben. Mathu na hi keten kewegü nu hi Ejipt wi nu aghansha wi amankesa kekulithu mu, isala mathu na ileben kesie tsü ghan neng ghanja sa nu ijüh nkina mvula hhaghe benle.

²³ Mathu khie wila hi ayyi pi mathu bamyithu cü ketheng wi tsü dukeya nmi. Hi meya mvula kesathu ha thola ciwi dukeya nmi.

²⁴ Isala imaghawa Kaleb na ma kemeshen kepa nu ijühkeya wi keben ghena, hi ma ssiwa ma ayyi hhainan kesa wi tsü chi cü nu ma shicüthu ya ayyi khili

²⁵ Amalek nu Kanaan nyithu na hang keben yyiketijü tsü nkaya thsüben. Dhitsü wi kheneng sen nu aghansha wi Aqaba yyitssükevü kepeghe wi tsü walo.”

Apvüwa na Kemeten Pi Anyithu kecü

²⁶ Apvüwa na Mosa nu Aaron manyi wi kiza,

²⁷ “Anyi gheshighena hathu ha khathula leben nkaghajüh khipi hi shunben ten nu? Hi mathu na leben nkaghajüh kekhi hathu zaya khidha!

²⁸ Hapi mathu luneng chilo: ‘Hi hangben keten ti hi kishenben, hi nthu na kekhi ti sa cüben. Hi Apvüwa, hi khidha.

²⁹ Nthu na shü nu nthu kamang pi aghansha hewi khala shaben. Nthu na leben nkaghajüh khipi hi shun kesalina nthu kahang amapi nkwe na ameiwa kesathu thola ayyi tsüwa wi dukeya nmi.

³⁰ Hi nthu ya ciwi hang thsüle khishidha, isala Kaleb nu Joshua manyi ketan khe nthu thola ciwi hangkeya nmi.

³¹ Nthu na nyu nthu tsangathu ghanya benle khi, isala hi mathu ssi wa nthu na meya mvula kesa yyi wi chi nu mathu na tsüpi mathu jjen sa thsüden.

³² Nthu na he aghansha wi shüaben.

³³ Nthu na jühtsentsa nkesa ghena nthu tsüdi npi keshükhi chu nthu tsangathu na aghansha wi amapi jügha kegoedeja nu ketizen sa benden.

³⁴ Nthu na ghanan jügha ayyi tsü hhainan kewa tsüti ghanan kesü pi amapi kesü sa nu nthu kesami ghena amapi jügha ketizen sa ben. Hi nthu keshun tsü nthu na ma jjügi chüyaben.

³⁵ Nthu na anyi gheshighenathu saghu nu hi shun keten miwi hi ha saten kesa hi kishenben. He aghansha wi nthu tsüdi shüaben. Hi Apvüwa, hi khidha.’ ”

^36-37 Mosa na anyi kesun pi ayyi hhainan kewa thsüthu na milikemesa jüh sengho anyithu kethukehi chi nu mathu leben nkaghajüh khipi Apvüwa shun thsü. Tsalina Apvüwa na kesakinaa dhagha pi mathu miwi chi nu mathu na shü.

³⁸ Wahhaithu taghakeni ja wi Joshua nu Kaleb manyi ketan hangya.

Ayyi Ciwi Dule Kekiden Atuwa

³⁹ Apvüwa na mangwale khi khe Mosa na pi Israel nyithu kekiza wi mathu na ahathana nongü ntsa sa.

⁴⁰ Mathu na dhitsüwa wi mitu na yyishiphon diyyiwa wi tsü dule wa nu khi, “Ithu khili Apvüwa na ayyi khipi ithu kecü wi tsü dule bendha. Ithu na samidha le kesa ithu na chüben.”

⁴¹ Isala Mosa na khi, “Isalethu nthu mangkesa na Apvüwa jüh nkina mvula saten nu? Nthu na mehaiya nben!

⁴² Nthu nwa lalo. Apvüwa na nthu ssi ntenle, nthu ghinyithu na nthu miwi khang yaben.

⁴³ Nthu na Amalek nu Kanaan nyithu ssikesa wi nthu na aghi wi shüaben; Apvüwa na nthu ssi ntenle, kepaghenanye nthu na ma n-nie mvula hhaghe wa.”

⁴⁴ Apvüwa Cenkethenjüh Khitson nu Mosa na kemnanpen teshi lela mathu na yyishiphon diyyiwa wi tsü wa nmessila sa.

⁴⁵ Tsaseng wi ciwi hang keben Amalek nu Kanaan nyithu na gho mathu ssisa nu mathu miwi khangya, nu mathu jügü sen wa Horma kecu wi chia.