SHICÜSI 11 - Kemethajüh (N) (Re-editing) Bible (BSI)

Apen Kesü Nyan Taberah Keci

¹ Anyithu na agükeccü ghena Apvüwa wi mathu leben nkaghajüh khi wa. Apvüwa na mathu hhai zakeya wi ma leben minu nu anni kesun pi anyithu miwi chi. Tsüna mathu ja wi mecang nu kemnanpen katen kesü yasa.

² Anyithu na Mosa wi kekiqa khie; ma Apvüwa wi kekhie sa nu anni tsüna nün.

³ Tsalina apen tsü nyan pi Taberah ci, kepaghenanye ciwi Apvüwa nni na mathu ja wi mecang.

Mosa na Ccülikesathu Achentagü Kessikeya

⁴ Ciwi asangthu la Israel nyithu gweghe kijünyi wa den. Mathu na asa nmvu ntsa sa, nu Israel nyithu lela mathu leben nkaghajüh khi wa; “Oh, ithu asa dsayathu mehai kesanan!

⁵ Ejipt wi ithu na anga ma men nsala kedsa mvu tsüdi dsaya keten le. Ciwi ameji, ameji tssüwa, anassi, biyaz, asanthu tsü meshenchilo.

⁶ Isala khili ithu kezü nmiladha. Hewi ithu na kedsawa mangla nmiladha — mangla nmi isala ghanan kaghapen manna ha ketanle!”

⁷ (Manna tsüna palacü ti miki hichuli kesa.

^8-9 Tsüna aghaja wi kemnanpen wi akejan gweghe qanca dugho. Ghanenwa wi anyithu na wa tsü saghuya. Tsüna oliv deli pi amesa saghu gü ketheng ti dsaya.)

¹⁰ Anyithu na tsüdi mathu nithsüjjen kedulen wi akhang khang sa ngan nu mathu leben nkaghajüh kekhi tsü Mosa na zaya. Ma ma hathana wa, kepaghenanye Apvüwa na anyithu miwi ma leben minu,

¹¹ nu ma Apvüwa wi khi, “No mangkesa ituwi nmehaitha nu hi n-nenla ben nu? No mangkesa na anyi hathu tsüdi ghena akhhi pi hi pvü thsü theng nu?

¹² Hi mathu sachi nyelela hi mathu pvügha ntheng na! No mangkesa na hi mathu kenonccawa ti nu mathu pi meme ti sala ikwen wi chi, no kheni ayyi pi mathu bamyithu cüle khishi ketheng wi tsü walo khiben nu?

¹³ Hi khiewi anyi hathu tsüdi ghena asa muya nu? Mathu na aghepvü ntsanu asa khieben.

¹⁴ Hi ketan anyi hathu khhi pvücha nbendha; ha ighena kiyan mtsüdha le!

¹⁵ No hi ya hati sa thsüle kesatsü hi tizenthu hi pathilo, isanu hi ya nleben kekha tsü npvü thsüla yilo.”

¹⁶ Apvüwa na Mosa kiza, “Anyi nyu ma kinyikü keten ccülikesathu meshu achentagü saghuya, mathu ssinu hi ketenpen Nithsüjjen wi gho nu mathu ya nkete wi ngan thsülo.

¹⁷ Ciwi hi dugho no ccünengden, nu hi aghamu pi no cü ketheng tsü pahan khupi mathu miwi chi cüaden. Tsaseng wi mathu na no kiqa nu anyi hathu ghena akhhi pvüqa, nu no ketan tsü pvü nbendha.

¹⁸ Khili anyithu wi kizalo, ‘Dhitsü ghena nthu samethaya, nthu na asa dsaya tendha. Nthu na aghepvü nu asa dsamvu benle kekhi nu nthu na Ejipt wi kebenwa mehaile kekhi tsü Apvüwa na zayadha. Khilitsü Apvüwa na asa pi nthu cü tendha, nu nthu na tsü dsaya mehai.

¹⁹ Nthu na ghanan kesü, nyelela keni, manga, tagha, nkwe ghena ketan tsü dsa nben,

²⁰ isala tsüna asha kesü chuli nthu na tsü dsa pi asun nten sa nu anonhi nkeya chu ghena saben. Hati sa keten ha nthu na Apvüwa nthu ja wi kebenwa tsü meya mvula, nu nthu na Ejipt nteshila mehai kesale nu ma wi leben nkaghajüh kekhi ghena le.’ ”

²¹ Mosa na Apvüwa wi khi, “Hi hewi anyi 600,000 ssitenthu, no asha kesü ghena kedsa qo asa pi mathu cü benne?

²² Amesüsi nu khaghaneni tsüdi pathi lela mathu kedsa qo saya mehai kwe? Atssükedone wi anga tsüdi lela mathu kedsa qo saya mehai kwe?”

²³ Apvüwa na luneng, “Hi kekhang na masakhen saten kwe? Hi kekhi tsü ntsakhiwa sa tenla nye khe no muyaben!”

²⁴ Tsalina Mosa na shhula Apvüwa kekhi jüh tsüpi anyithu kiza. Ma anyi ccülikesathu achentagü cighu pi Nithsüjjen vüla donki thsüa.

²⁵ Tsaseng wi Apvüwa na akulukeshü wina dugho ma ccüneng. Apvüwa na aghamu pi Mosa cü ketheng tsü pahan khupi ccülikesathu achentagü tsü gishü cüa. Aghamu na khathansha mathu miwi gho khe mathu na atusenjüh khi, isala matsü kesie tsüti nsa.

²⁶ Ccülikesathu achentagü ja wi meshu keni Eldad nu Medad manyi na Nithsüjjen wi nwhala kemnanpen wi ben wa. Kemnanpen wi aghamu na manyi miwi la dugho, nu manyi la atusenjüh khi shagha.

²⁷ Anyi pvünyi kesü na pvü wa Eldad nu Medad manyi na mangwa saben khe khipi Mosa kiza.

²⁸ Nun tsa Joshua, ma kepvüza tsü wina Mosa kiqa ketenwa na Mosa wi khi, “Manyi khenlo, kediwa!”

²⁹ Mosa na luneng, “No ighena anonpvü ben kwe? Hi, Apvüwa na ma ghamu pi ma nyithu tsüdi cü nu mathu ya atusenjüh khi thsü mvu benle!”

³⁰ Tsaseng wi Mosa nu Israel nyi ccülikesathu na kemnanpen wi wha neng.

Apvüwa na Akvukhithu kesun kechi

³¹ Apvüwa na zuli ameghü kesun chi nu tsüna atssükedone wina akvukhithu ssinu meter kesü-u ayyi miwi pighe gho. Tsüthu na gho kemnanpen miwi nu kete kevü kahe wi tsüdi kilometer kejon wi kaya.

³² Tsalina anyithu na ghanan thangthang, aghaja thangthang, nu dhitsüwa la ghanan thangthang akvukhithu tsü ghan; thola kilogram hazar kesü nkecen saghu meya. Mathu na tsüthu pi kemnanpen kevü tsüdi wila thsüh.

³³ Mathu na awa sa tsü ndsakhila kejon keben wi Apvüwa na ma nyithu miwi aghepvüya nu adhagha kesü pi mathu ja wi shhugho thsüa.

³⁴ Apen tsüpi Kibroth Hattaava (nyelela “Kenmvu Shüjjenthu” isa cia), kepaghenanye mathu na anyi asa kenmvuthu pi ciwi vhü kesalina.

³⁵ Anyithu ciwi na apen ketsen sen nu Hazeroth wi wa mathu ciwi kemnanpen sa.