SHICÜSI 10 - Kemethajüh (N) (Re-editing) Bible (BSI)

Rükatssü pi kesa Tutuwa

¹ Apvüwa na Mosa kiza,

² “Rükatssü cü pi tutuwa keni saya nu anyithu kecighu nu kemnanpen kepheghe wi senlo.

³ Khathansha tutuwa keni qho kekhou hhai kesie sachi khe anyitenti na gho hi ketenpen Nithsüjjen kedulen wi no vüyaben.

⁴ Isala khathansha wi tutuwa tsü kesütan khou chi khe ageithu wi ccülikesathu ketan gho no vüyaben.

⁵ Khathansha wi tsü melute khou chi khe amizza nishuwa kebenthu na shhugho ben.

⁶ Khathansha wi tsü keni tughu melute khou chi khe amizza acülawa kebenthu na shhugho ben. Kemnanpen kepheghe ghena tsü melute ntsa khou chiben,

⁷ isala anyitenti cighu chile kesalina tsü kekhou hhai kesie sa chiben.

⁸ Aaron tsa keqhaikedithu na tutuwa tsü khouben. “Ayen hawa hana matsü ghaketen tsüdi wila nieben.

⁹ Khathansha nthu yyi wi aghisa khe nthu na nthu ghinyithu kematang wi aghi le kesa zensu tutuwa hathu khoulo. Hi Apvüwa nthu Nyiza, nthu kiqa nu nthu ghinyithu kwen wina nthu kekasha yaben.

¹⁰ Nthu na kenong tsü wi lela — nthu Sha Ketheü Kho nu kepa wi keccüna khothu — nthu na mecang pi kekinyi nu kecca ghena kekinyi kesa wi nthu na tutuwa khouben. Isalethu hi nthu kiqaben. Hi Apvüwa nthu Nyiza.”

Israel Nyithu na Kemnanpen Kepheghe

¹¹ Israel nyithu na Ejipt keteshi amapi keni asha keniwa wi nkwe ghanan wi akulukeshü na Apvüwa ketenpen Nithsüjjen miwi na bvüa,

¹² nu Israel nyithu na Sinai yyikeshü wina mathu kijünyi wa keten tsüghena lentsen chi. Akulukeshü na wa Paran ghansha wi ben wa.

¹³ Apvüwa na Mosa kekiza kenie wina mathu na lentsen shhu,

¹⁴ nu mathu na apen kekitsen kaghapen ha makesü kesenie. Judah mizza na ssiketen thsükizanki cakhu wi Amminadab tsa Nahshon na benchüwa sala anyithu pi azi zi sa nu atuwa sa shhu.

¹⁵ Zuar tsa Nethanel na Issakhar mizza benchüwa sa,

¹⁶ nu Helon tsa Eliab na Zebulun mizza wi benchüwa sa.

¹⁷ Tsaseng wi Nithsüjjen pheghe nu Gershon nu Merari gei tsü pvü keten nyithu na shhu ben.

¹⁸ Tsashiwa, Reuben mizza na ssiketen thsükizanki cakhu wi Shedeur tsa Elizur na benchüwa sala anyithu pi azi zi sa nu shhu.

¹⁹ Zurishaddai tsa Shelumiel na Simeon mizza wi benchüwa sa,

²⁰ nu Deuel tsa Eliasaf na Gad mizza wi benchüwa sa.

²¹ Tsaseng wi Levi nyi Kohath gei na kemetha tsanqaithu tsü pvü nu shhu. Mathu wa kemnanpen kepawa cukeya tsü wi tsü Nithsüjjenwa tsü pie ki neng ya.

²² Tsashiwa, Efraim mizza na ssiketen thsükizanki cakhu wi Ammihud tsa Elishama na benchüwa sala anyithu pi azi zi sa nu shhu.

²³ Pedahzur tsa Gamaliel na Manasseh mizza wi benchüwa sa,

²⁴ nu Gideoni tsa Abidan na Benjamin mizza wi benchüwa sa.

²⁵ Asakhenwa, Dan mizza na ssiketen azi tsüdi seng wa sa nu ghikehie thsükizanki cakhu wi Ammishaddai tsa Ahiezer na benchüwa sala anyithu pi azi zi sa nu shhu.

²⁶ Okhran tsa Pagiel na Asher mizza wi benchüwa sa,

²⁷ nu Enan tsa Ahira na Naftali mizza wi benchüwa sa.

²⁸ Israel nyithu na kusi kemnanpen pheghe nu tsü sa neng khe hati azi zi sala kesenie nu lentsen wa.

²⁹ Mosa na ma myi Midia nyiwa Jethro tsa Hoba wi kiza, “Ithu na Apvüwa na apen kesü pi ithu cü tenle kesa wi tsü wa tendhale. Ma Israel nyithu sapi ben kayi yathsü tenle kesa ajühkhuchidha, tsalina ithu gweghe ghalo, ithu na keben pi no gweghe gishü yabenna.”

³⁰ Hoba na luneng, “Nmale, hi iyyi wi wa neng tendha.”

³¹ Mosa khineng, “No ithu nteshi lalo. Ithu na aghansha wi apen khiewi benya mehai khe no chüben, no ithu lentsütson cülo.

³² No ithu gweghe wa lethu ithu na Apvüwa wi mukeya kemihhi tsüdi pi ithu gweghe gishü yaben na.”

Anyithu Na Alentsen keshhu

³³ Anyithu na kemetha Yikha Sinai keteshi wi mathu na ghanan kecheng alentsen wa. Apvüwa wi Cenkethenjüh Khitson na keshüthangla mathu tuwi wa mathu kemnanpen sa keten pen tsü bhaden.

³⁴ Mathu na kemnanpen kesü wina apen ketsen lethu, ghanan wi Apvüwa kulukeshü tsüna mathu miwi ben.

³⁵ Khathansha wi Cenkethenjüh Khitsonwa tsü pie nu shhu khe Mosa na khi, “Apvüwa, shagha nu nghinyithu jügüzighe, nu no nankemeghüthu ya bvü thsülo.”

³⁶ Nu khathansha wi tsüna nganwa khe ma khi, “Apvüwa, Israel nyithu theghi hazar ja wi kheneng gholo.”