Sansichhü 9 - Kemethajüh (N) (Re-editing) Bible (BSI)

¹ Hi kesiela ha cüki tsüdi meshen ntsa sa nu Anyiza na kemetsa nu ketsatan nyi kekulithu, mathu ketizen nu nankemeghü lela ghan sen benden kesa muya. Anyi thola ma tuwi mangwa na ben khe mangla nchü.

² Tsüna kepapa nsa.

³ Metuketen makesü na anyi tsüdi miwi ghoden, nu hawa ha ayyi wi katsüha kesa wi sazzi keten tsüti le. Anyithu na hang keben chu nkemehai nu kedeja na mathu leben pong ben, nu mathu na zuli shüden.

⁴ Isala kesü le kesü lela ayyi wi kahang jawi hang kebenwa na kaghang pahan ben; affü kahang kesü tsüna ssensitemi keshü kesü miwi mehaiki.

⁵ Anle, kahangthu na mathu shü waben kesa chüben, isala keshüwa tsü mangla nchü. Mathu na akutimen mangla nben nengdha; mathu malitha sadha.

⁶ Mathu ketizen, mathu nankemeghü, mathu nyonkeghopvü, tsüdila mathu gweghe shüdha. Mathu na ayyi hawi kekuli katsüha wi lela mangla saghu nengkeya nmidha.

⁷ Wala dsajjüya nu anonkwen yalo; no kisengtssü jjü nu anonkeghe saya. Kepaghenanye tsüna Anyiza tuwi meshon.

⁸ Keshüthangla lebencca nu anonghethi salo.

⁹ Anyiza na kahang kaghacang pi no kecü tsü sen nu ayyi hawi hang keben chu nwubvü no kenenwa tsü ssinu n-nonkwenya. Kaghacang tsathang tsüdi wi n-nonkwenya, kepaghenanye no n-gükeccü ghena muya ketenwa tsüna tsü ketan.

¹⁰ No kekuli katsüha kesa tsüdi wi apiketsü sa, kepaghenanye no wa keten keshü yyi witsü kekuli, kemeshen, metsa-mena, nu kemetsa nmidha.

¹¹ Hi pala kepa wi kesü chükeya na ayyi hawi bvü kemehai ntsawa na keshüthangla kebvü wi khangya nten, nu kempvüza ntsawa na keshüthangla aghi wi khangya nten. Kemetsa nyi na keshüthangla kedsakejjü muya nten, metsa-mena nyi na keshüthangla benya nten, nu sapichü nyi na keshüthangla apen kemisi wi kiya nten. Isala acenpvü nkemi na tsüdi miwi ghoden.

¹² No khiela ntsüwa na kusi nmiwi ghoten khe nchü. Zuli awa na awa-kedie wi yaya nyelela anga na kaghanthsü wi du kesa ti, ithu na meshen nkeben wi nkemehai matsü pahan wi du yaden.

Kemetsa nu Kejüphonwa kemeshen

¹³ Ciwi hi mukeya pahan ben, ayyi hawi kemetsawa kekü tsüna tsütsonca kesü.

¹⁴ Anyuti kizza kesü wi anyi kejon na hang nketen na ben. Kadimi kekhang ntsawa kesü na gho tsü ssikaghashen. Ma tsü vüya nu awikeshonthu tsü pakhhi dule kidenya.

¹⁵ Ketha-u kesü isala acho kepvü nyi ciwi hang kebenwa na anyuti tsü hangshaya. Isala thola ma meshen meya.

¹⁶ Hi keshüthangla kemetsa tsüna kezü miwi mehaiki le khiden, isala thola ketha-u kesü tsüpi kemetsa nyi le nsa nyelela ma mangwa khiben khe kina nten.

¹⁷ Kekhang kesen kesü na kejüphon jawi kemagha tsü miwi kemetsa nyi kesü na ccen ajühkekhi tsü kekinawa mehaiki.

¹⁸ Kemetsa na aghighethu miwi kemehai jiki sa yaden, isala kesami nyi kesü na pala kemehai kejon yasa den.