Sansichhü 8 - Kemethajüh (N) (Re-editing) Bible (BSI)

¹ Kemetsa nyi ketan na pala jjügi atsentsawa tsü chüden. Kemetsa na ma sapi anonghe nu ammi kejang nmi thsü laden.

Kadimiwa Jühkeya

² Kadimiwa na mangwa khi khe tsü salo nu Anyiza tuwi kaghajila ajüh kekhishi mangla nsala.

³ Kadimiwa na katsüha lela ma kemeshen saya mehai, tsalina ma tuwi na bvülo; hati kemessi pen wi ha nbenla.

⁴ Kadimiwa na kekhang sen nu kuliden, nu thola ma kekuliwa tsü nnikeya nmi.

⁵ No ma jühkhukechithu nie keben chu no keyazi wi ben, nu kemetsa nyi kesü na khati nu kusi tsü nsathu yishü khe chüben.

⁶ Ciwi pala tsüdila matsü wina nu mayenwa wina kesa tsüna ben, isala ithu na tsü keu ketan chüben le!

⁷ Ithu thola mangwa saghaten khe chü meya, nu ciwi thola pi ithu kiza ya nben.

⁸ Anyi thola ma keshü ghü meyacha nyelela ma keshü tsathangwa tsü khupiya nben. Hawa ha ithu na ghü nkeya aghikesa kesü; ithu na ithu len mechu nu bvüya nben.

Gheshighenawa nu Ketsatanwa

⁹ Hi ayyi hawi pala hathu saketen cüki meshen keben wi hi ha tsüdi muya, anyi pahan na kekhang ben nu kepathu na mathu cakhu wi ketizensa keten ayyi kesü.

¹⁰ Anle, gheshighena nyithu pi mathu shüjjen wi vhüa, isala ashüjjenpen wi anyithu na mathu anyunuti tsüwi mathu nkemehai kekuli tsü keseng hi mudha. Tsüna kaghacang.

¹¹ Mangkesa na anyithu na wan ayen kepakhhi kuliten nu? Kepaghenanye shishi ayen kepakhhiwa tsü meten cü nketen ghena.

¹² Kesami nyi kesü na meza tughu ayen pakhhi nu hang benlaya mehai. Oh anle, mathu na mangwa khiben khe hi chüben: “Keujüla no Anyiza jühya lethu, tsüdila meshon yaben,

¹³ isala gheshighenawa ghena tsü mehai nben. Mathu kahang na akekhwen kesü ti nu mathu na pvünyi keben jüwi shüaben, kepaghenanye mathu na Anyiza jüh nkeya ghena.”

¹⁴ Isala hawa ha kemeshen nkemi jüh. Ayyi wi mangwa saben khe ghangchilo: kutitsü ketsatan nyi na gheshighenawa kemeten tsü muya, nu gheshighena nyi na ketsatanwa kutimen muyaden. Hi hawa ha kaghacang le khiben.

¹⁵ Tsalina hi anyi kesü na ma ketanla ma nonkwen keya-u le khiben, kepaghenanye kahang hawa wi ma kenen saya kebenwa tsüna dsaya, jjüya, nu anonkwenya kesa ketan. Ma Anyiza na ayyi hawi kahang pi ma kecü kekuli wi ha ketanla saya mehai.

¹⁶ Khathansha wi hi metsaya nu ayyi wi mangwa saben khe chüya le kesa wi, hi chükeya no ghaja ghanan njenla pen lela,

¹⁷ Anyiza na mangwa saben khe khiela chüshiya nben. No apiketsü saben lela no khiela tsü chüshiya nben. Kemetsa nyithu na chüben le khiya mehai, isala mathu la nchü.