Sansichhü 6 - Kemethajüh (N) (Re-editing) Bible (BSI)

¹ Ayyi hawi atsentsa nkenye kedhu kesü sa keben hi chüyadha.

² Anyiza na keben-keyeng, kekinyikü, nu keben pi anyi pahan cü, anle, ma yamvu keben tsüdi pi cü, isala ma yala tsüthu pi anonkwen meya thsü. Tsüti kesawa nye, kijünyithu ya tsü sen nonkwenya thsüaben. Hana kaghacang nu tsüna nmeshon.

³ Anyi kesü na atsa meza ben nu ma kesie hangya mehai, isala ma kesie hangya lela keujüla ma shei anonkeghewa tsü nu mehaitsü pi kevhü tsü mu meya lethu hi khiben, meme keshü kesü pvügha keyawa la mehai.

⁴ Meme tsüwa pvügha nkeghowa la mehai, kepaghenanye tsüna kejang non wi du nu maliden.

⁵ Tsüna aghanan kewegü nmu nyelela kahang tsüna khati kesa khe la nchü, isala ma kecca muyadha—

⁶ tsüna anyi kesü amapi hazar keni hang lela khiela kahang wi anonkwen nkeyawa miwi. Kepaghenanye manyi qho apen kesütan wi waden.

⁷ Anyi kesü na ma kedsa qo muya le kesalina kekuli tsüdi saden, isala ma khiela anonkwenya nten.

⁸ Khatinu kemetsa nyi kesü na kejüphonwa miwi mehaiki nu? Ketha-u nyi kesü na kahangyen chükeya tsüna kemehai mangwa saya nu?

⁹ Tsüna kaghacang; tsüna ameghü jügü keten ti kesa. No keshüthangla pala pahan benya mvuthi keten tsü miwi no mangwa ben khe tsüpi n-nonkwen keyawa nghena mehai.

¹⁰ Pala katsüha tsüdila kheni wina khi ketheng ketan saben, nu anyi na ma miwi kekhang kiwa ssinu keccücanliya nten kesa ithu tsüdila chüben.

¹¹ No sie pfü keccücanlithu tsüju ma men nmi, nu no mehai kayi nsa.

¹² Thowa na khatinu anyi kahang kemilu, kahang kaghacang, akekhwen kesü ti bvü keten wi ha ma ghena kemehai ntsawa chüya mehai nu? Thowa na khatinu ma keshü sengwi ayyi wi mangwa saben khe chüya mehai nu?