Sansichhü 12 - Kemethajüh (N) (Re-editing) Bible (BSI)

¹ Tsalina nthu pvünyi keben jüwi na nthu Sahangkechiwa meshen yalo, atsathang nu amapi nkemehai na gho nu nthu na “Hi kahang wi anonkwen meya le” tsüti npi kekhi tu wina.

² Tsüna nthu ghena aghani, asha, nu ghotsithu kewegü na jang, nu atsankegho akulukeshü na khiela maghala ben.

³ Tsasengwi nthu kwen na nthu khwe cü keten tsüna kedheggü, nu nccü khili zü keben tsüna kelha ben. Nyha pi anün mece le kesa na zeng mtsü, n-nyon na jang mtsü pi mehaitsü mu meyala ben.

⁴ Nkhuna decu pi alentonti wi ahhai nzala ben. No ciwi pala kenyeggü nyelela akhwikesa hhai zeng ntsa za waben, isala awa kesü kekhou hhai lela nthu pamechüaben.

⁵ Nthu na alentontithu wi messi nu ciwi alentsen messi ben ben. Nthu li na pun; nthu na shhu meya chala zanneng wa, nu nthu kenmvu tsüdila nmila shaben. Ithu na anuphan ithu pen witsü wa tendha, nu ciwi anonkegü na alentontithu wi ben ben.

⁶ Rükatssü ssüliwa tsü zanthia, nu suna hulawa tsüna qanca pi pakhhiaben; atssükhang ssüliwa tsü zanthia, nu atssüpfüwa tsü pacha ben.

⁷ Ithu gwo na ayyi ceng neng wa, nu kahang hathawa na pi ithu kecüwa Anyiza wi wa neng ben.

⁸ Kemetsabvüwa na khi, “Kaghacang, kaghacang. Ha tsüdila kaghacang.”

Khimilute kesa

⁹ Isala Kemetsabvüwa na ma kemetsa ghena ma kechü tsüpi anyithu sansi ben den. Ma ajühbvüthu tsü si nu tsüthu tsentsa tsü ghan nan.

¹⁰ Kemetsabvüwa na ajüh kemeshonwa tsü bha, nu ma zhükechi jühthu na atsentsa.

¹¹ Kemetsa nyithu kekhi jüh na anenikehiethu na sen keten akhhapvü pangketsu ti kesa, nu ajühbvü kesaghuthu tsüna kejetenji pi zükeqhe jeten ketheng ti kesie ben den. Anyiza ithu tsüdi kehiewa na tsüthu khuchi.

¹² Itsa, ha miwi la pala pahan ghena kiden-kesha yalo. Ciwi lesüshenthu wi kezhü na ma sakhen nmi, nu tsüthu si ntsa kesa wi nthu asajjü wi agüccüaben.

¹³ Hathu tsüdi sakhen wi hi ajüh kesütan khiben; Anyiza kinyikü nu ma jühkhukechithu tsü nie yalo, ha sa thsüle kesa ghena anyi ha sahang chi le.

¹⁴ Anyiza na ithu kekuli tsüdi kemehai nyelela nkemehai, kekuthi wi kekuli lela ghan nan den.