Sansichhü 11 - Kemethajüh (N) (Re-editing) Bible (BSI)

Kemetsa nyi kesü na mangwa saden

¹ Npisa pi asang senkesa wi chiya, isathu no ghanan kesü wi kekiyi sa yaben.

² No keben pi alen kecheng mejü wi — alen kejon wi lela chiya, kepaghenanye ayyi hawi acenpvü nkemehai mangwa na nmiwi ghoten khe no khiela nchü.

³ Achan kesü tsüna khiewa ccü wa khe ciwi khuli ben den. Khathansha wi akulukeshü wi atssü na pong khe atsangho den.

⁴ Keujüla no ameghü nu atsannen kemehai hieben lethu, no khiela mangla pi sheng nu mangla wwiya nben.

⁵ Anyiza na pala tsüdila sachi, nu no kahangli ketheü kesü na khatinu nza pvü non wina shhugho ben khe tsü kechü miwi Anyiza na mangwa saben khe no chüshi kayiya nben.

⁶ No aghanen le minulen wi lela pala pi sheng yalo. No khiela kesü na kepawa miwi mehaiki shigüben nyelela mabenla makesü mehai benla nye khe nchü.

⁷ Aghanen kewegü tsüna mehai, nu anyon pi aghani mukeya tsüna anonkwen.

⁸ No amapi keshu hangkeya ghena anonghethi salo. No kesie hang lela no keshüwa na tsü miwi sieki benle kesa meshen yalo. Ciwi mangla nmila kaghacang saaben.

Kepvünyithu kesansi

⁹ Anyi kepvünyithu, nthu kepvünyi wi anonkwen yalo. Nthu pvünyi keben jüwi anongheya. Nthu na mangwa nmvu khe saya, nu nthu leben wi nthu kenenwa nieya. Isala nthu na mangwa sa khe Anyiza na tsü ghan nan ben kesa chüyalo.

¹⁰ Mangla nthu sapi ahathana nyelela patena nsa thsüla. Nthu matsü kesie pvünyi ben nten.