Sansichhü 10 - Kemethajüh (N) (Re-editing) Bible (BSI)

¹ Alipengthu keshü kebighe han na ahikhu kepong saya mehai, nu kejüphon kizza kesü na kemetsa ntsawa yasaya mehai.

² Kemetsa nyi kesü na kemeshon kuli nu kejüphon nyi kesü na kesazzi kuli kesa tsüna mayen.

³ Alenca wi kijünyi thu na ma metuya lela ma kejüphon tsü muthatha ben; ma anyi tsüdi ya ma khatila jüphon khe chüya thsüden.

⁴ Keujüla nmiwi kekhang kesenwa na aghepvü lethu, n-nyan nkatila; keujüla no ccen ben wa lethu, kesazzi keti lela teshi cüa ben.

⁵ Hi ayyi hawi atsentsa nkenye kesü mu nu tsüna kekhang kesenthu na sachi.

⁶ Kebanthu tsü teshi nu kekhang kesenpen pi kejüphonthu cüa.

⁷ Hi nssümaghathu na goru miwi ben nu kaditsathu na nssümaghathu ti alentsen wa keten mu.

⁸ Keujüla no ayyiku chhüthu no ciwi khulidu ben; keujüla no ajjen wikeshon bhi lethu, amaghang kesü no mcü cüben.

⁹ Keujüla no alon kahapen wi kuli lethu, no alon miwi mesa-mena yaben. Keujüla no achan haten lethu, no ciwi mesa-mena yaben.

¹⁰ Keujüla nji ampvü na ndighe nu no ma yiyha nsa lethu, no tsü khusen nu nghechen sa kuliben; isala kemetsawa na ma kiqa pi haicen yaden.

¹¹ Keujüla no atuwa sa amaghang ya no mcü thsü lethu, amaghang kemachü tsüna kekiyi mangla nmi.

¹² Kemetsa nyiwa na mangwa khi khe kenyuwa sengho ma cüden, isala kejüphon kesü tsü ma jüh ghena ma yasa den.

¹³ Ma atuwa kejüphon jüh khi, nu kedeja jüh pi asakhen saden.

¹⁴ Kejüphon na ajüh jaji ben den. Anyi thola gha keten wi mangwa saaben khe nchü, nu ithu keshü sengwi mangwa saaben khe thola pi ithu kiza ya nben.

¹⁵ Jüphon ntsa kesa ketan na ma jjen wi kewha len nchüla kuli wa agüccü yaden.

¹⁶ Khathansha wi kadimiwa na kepvünyi kesü sa nu accülikesathu na ghaja thangthang mishu khe diyyiwa tsüna agükeccü wi ben den.

¹⁷ Isala diyyi kesü wi kadimiwa na ma ketanla ma jüh südheya nu accülikesathu na matsü wina dsaya, nu adina nsala mathu kekhenengya keten keben tsüna acenpvü kemehai kesü.

¹⁸ Khathansha wi anyi kesü na ma jjen khhwen nontssü benten khe tsüna atssü jüchiben ben, nu ajjen na qanca shaben.

¹⁹ Kemishu tsüna no sapi anonghe thsü, nu kisengtssü na n-mmiyeng shhugho thsüden, isala no apisa nkemi tsü kesüla saya nben.

²⁰ Nleben wi lela kadimiwa nthenla, nu kuthila no kejenpen wi lela keban nthenla. Awa kesü na no mangwa khi khe ajüh tsü pvü wa mathu kiza ya mehai.