Sansichhü 1 - Kemethajüh (N) (Re-editing) Bible (BSI)

Kahang hana kaghacang

¹ Hathu hana David tsa Kemetsabvüwa, Jerusalem wi kadimiwa jüh.

² Kemetsabvüwa na ha kaghacang, kaghacang khi. Kahang hana kaghacang, matsüdila kaghacang le.

³ Nthu kahang chu kuli nu dhamang, nu tsü ghena no mangwa pi keccüca-u saya nu?

⁴ Abvüye abvüye na gho nu waden, isala ayyi tsü makesü sa ben den.

⁵ Aghani na khili lela shhugho nu duden, nu kaghajila kheneng sen nu ma keshhugho pen wi waden.

⁶ Ameghü na acülawa sho gho nu sho sen aghawa wa, sho kevüli benla nu sho sen ma pen wi wa neng den.

⁷ Aghaku tsüdila lle sen atssükedone wi duben, isala atssükedone tsü pongya nten. Atssü na kheneng sen aghaku lle keshhugho pen witsü gho, nu lle neng waden.

⁸ Pala tsüdi wila ahathakina ketan — ahathakina na khishi meyacha. Ithu nyon na khiela mu pi anonkwen meya; ithu khuna na khiela zakhi meya.

⁹ Hatu wi mangwa sadha khe tsü sa neng ben. Kheni mangwa satheng khe tsü sa neng ben. Ayyi maben wila mangla ketheü nmi.

¹⁰ Mathu na khiden, “Ghangchilo, hewi pala ketheü ben le!” Isala nye, tsüna kheni ithu npi kepvügha wina tsü mabenla sadha.

¹¹ Anyi thola kheni kesa tsü meshen meya ladha, nu atsathang ghaketen wila thola khili sa keben nu haseng wi sa keten tsü meshenya nben.

Kemetsabvüwa Sakenan

¹² Hi, Kemetsabvüwa na Jerusalem wi Israel miwi kadimiwa sa.

¹³ Hi ayyi hawi pala kuli ketheng cüki tsüdila bhashiya nu si nan le sa. Anyiza na ithu metuketen agükeccü khhi kesü pi ithu miwi chitheng.

¹⁴ Hi ayyi hawi pala kekuli tsüdila mudha nu hi nthu kiza ben, ha tsüdila kaghacang. Tsüna ameghü jügü keten ti kesa le.

¹⁵ Nthu na kekhhakhu tsü sapi meshonya nben; nu ciwi nkemi tsü siya nben.

¹⁶ Hi ketanla hi wi kiza, “Hi kedi nyi kesü sadha, ituwi Jerusalem wi kekhang kesenthu miwi metsaki ntsa. Hi kemetsa nu kechükeza jjügi tsüna mangwa khe chüben.”

¹⁷ Hi kechükeza nu kejüphon, kemetsa nu kedeja jjügi tsü chükepapa sale sa. Isala hi ha la ameghü jügü keten ti kesa kesü muya.

¹⁸ No metsa kayithu ahathana kayi den; no chü kayithu tsüna no patena kayi den.