ROMNYI 3 - Kemethajüh (N) (Re-editing) Bible (BSI)

¹ Isathu Judah nyithu na Judah nyi nkenyethu miwi kekiyi ben kwe? Nyelela ahyukahan ghena ma men ben kwe?

² Anle, alen kejon wi la kekiyi ben. Atuwa, Anyiza na ma ketsijüh pi Judah nyithu nondi chi.

³ Isala keujüla mathu pahan na ajühtsentsa nsala lethu, tsüna Anyiza la ajühtsentsa nsalaya mehai kwe?

⁴ Nyele, tsüti saya nben! Anyi tsüdi milimesa lela Anyiza tsü ajühtsentsa senden. Ntsawajüh na khiben, “Njüh kekhi wi nyu yala njüh wina atsentsa chüya thsü, nu no ajühkaghakhi wi khang meyathu yishü.”

⁵ Isala keujüla ithu nketsatan tsüna Anyiza ketsatan tsü tsütson metha chi lethu, ithu na khatile khi nu? Anyiza na ithu meten cüthu, ithu na ma sazzi benle khiya mehai kwe? (Hati kekeü-u na ben.)

⁶ Khiela tsüti saya nben! Keujüla Anyiza na ntsatan lethu, ma khati nu anyi jühkaghakhiya mehai nu?

⁷ Isala keujüla hi nketsatanwa tsüna Anyiza nyankethang nu ma ketsatanwa tsü sa pi ji kayi chiben lethu, mangkesa na hi pi khili la kesami nyi kesü ti meshensa ben nu?

⁸ Isathu, mangkesa na “Ithu nkemehai kuli nu kemehaiwa ya gho thsü nalo” isa nkhi nu? Ntsakhiwa anyi pahan na hi ha kekhi ghena khi pi hi metsimeni le! Mathu nmeshensathu keyishü wina meshensah ben.

Ketsatan Kesüla Nmi

⁹ Isathu, ikhang Judah nyithu na Judah nyi nkenyethu miwi mehaiki ben kwe? Tsüti nsa le! Hi Judah nyithu nu Judah nyi nkenyethu tsüdila makesü nu kesami kekhu wi benle kesa pi ccüca chidha.

¹⁰ Ntsawajüh wi kekhi ti, “Ciwi anyi kesüla ketsatan nyi nmi,

¹¹ ciwi kemetsa nyi kesüla nmi, nyelela Anyiza kekinyi nyi kesüla nmi.

¹² Anyi tsüdila Anyiza wina kheneng bvüdha; mathu tsüdila sazzidha, nu thola kemeshonwa nsa ladha, kesüla nmi.

¹³ Mathu pang na ashüjjen nkejüphonla ketheng tsüti; mathu mili pi milikemesa tsü khiden, nu keshü jüh mathu pang wina keshhugho tsüna amaghang ji nkemehai tsüti shhughoden;

¹⁴ mathu pang na nyu kishenkecü kekha jüh pi pongben.

¹⁵ Mathu na wan nyu patena nu pathiden;

¹⁶ mathu len wi ketizen kesa nu keyasa ketan.

¹⁷ Mathu na leben kecca lenwa tsü nchü,

¹⁸ nyelela mathu na Anyiza kemessikü yen nchü.”

¹⁹ Khilitsü Ayenwa tsüna anyi Ayenwa kekhu wi kebenthu ghena khiben le kesa ithu na chüben. Isanu anyi mabenla kemeshon khikeya nmila ayyi nyi tsüdila Anyiza jühkaghakhi keten wi tsü gho thsüle kesalina.

²⁰ Kepaghenanye anyi kesütanla Ayenwa tsü nie nu kekuli wina Anyiza tuwi meshon yadha le khikeya nmi. Ayenwa kekuli tsüna anyi na samidha le kesa chüya thsü ketenwa tsü.

Anyiza Na Ithu Pi Ma Tuwi Meshonkeya thsü

²¹ Isala Anyiza na khilitsü ma khati nu anyi pi ma tuwi meshonya thsüten khe pi ccüca chidha. Mosa Yenwa nu atusenjüh-kechüthu na tsü shei khiben lela tsüna Ayenwa wina mangla sa keya nmi.

²² Anyiza na anyithu ya Jisu Khrista kenondi ghena pi ma tuwi meshonya thsüden. Anyiza na Khrista kenondithu tsüdi wila hati saden, kepaghenanye ciwi kepapa kesa mangla nmi:

²³ Anyi tsüdila samidha nu Anyiza kekhang na hangshaya keten tsü temeja bvüdha.

²⁴ Isala Anyiza nanketizen kekila wina khukechi Jisu Khrista mathu lisha kecüwa ghena mathu pi ma tuwi meshon yadha.

²⁵ Anyiza na ma khuchi cü, nu ma ahhansha sa keshü wina anyithu na ma kenondi ghena mathu kesami teshi pi kecüwa saya thsüa. Anyiza na Khrista khukechi tsüna ma khati nu anyi pi ma tuwi meshonya thsüten khe pi ccüca kechi. Anyiza na kheni anyi kesami ghena lebensie nu mula nkemu ti saghodha.

²⁶ Isala khili tsü wi tsü Anyiza na anyi pi ma kitsantan tsü chüya thsüle kesalina ma anyi kesami ghena kuli bendha. Anyiza na hati nu ma ketsatan nu anyi Jisu Khrista kenondiwa pi ma tuwi meshon yaden kesa pi ccüca chiden.

²⁷ Isathu, ithu mangwa ghena kapvü nu? Mangla nmi! Isathu ma jjügi mangwa ghena nu? Anyi kesü Ayenwa niekeya ghena kwe? Nye le, isala ma kenondi ghena le!

²⁸ Tsalina anyi Anyiza tuwi meshonkeya tsüna kenondi ghena ketan khe Ayenwa kekhi tsü kenie wina nye le kesa ithu na chütiben.

²⁹ Nyelela Anyiza tsüna Judah nyi Nyiza ketan kwe? Ma Judah nyi nkenyethu Nyiza la nye kwe? Anle, ma Judah nyi nkenyethu Nyiza la le!

³⁰ Anyiza na kesütan, nu ma Judah nyithu tsü mathu kenondi miwi pi ma tuwi meshon yaden, nu Judah nyi nkenyethu tsü mathu kenondi wina pi meshon yaden.

³¹ Ha ma jjügi ithu kenondi ghena Ayenwa tsü yasa ben kwe? Nye le! Ithu na Ayenwa tsü satezü benden.