ROMNYI 2 - Kemethajüh (N) (Re-editing) Bible (BSI)

Anyiza na Ghankenan

¹ Ipvüshangwa, no nyu ghan-nan ten kwe? Isathu, no anyi katsüha saben lela no kemeshon khikeya nmi. Kepaghenanye no nyu ghan-nan lethu mathu la no ghan-nan ben, tsüti kesa wina no ketanla no meshensah ben.

² Nu Anyiza na tsüthu ghan-nan lela tsüna saji le kesa ithu na chüben.

³ Isathu ipvüshangwa, no kekuli tsüthu ghena nyu ghan-nan ketenwa no la tsüthu kuliden! No kemeshen tsü no Anyiza na nyu ghankenan tsü ghüya benle ben kwe?

⁴ Nyelela no ma keccaketssü, kethankehi, lebenkesie tsü nkhichi laten kwe? No Anyiza na no ssi wa leben khapeghekeya wi chicü le keben ghena ma ccatssü le kesa no chüben.

⁵ Isala no nleben-dhu sen nu ben, tsalina no ketanla Anyiza leben kekha nu kemeshon wina ghan-nan keten tsathangwa ghena no kemeten sa pi di kayi thsüle saben.

⁶ Kepaghenanye Anyiza na tsü tsathang wi meshu kesüsü kekuli kutimen pi cüden.

⁷ Anyi pahan na kemehai kuli, nu anyankethang, kenyuwakü, nu anuphan kahang bha keten tsüti Anyiza na anuphan kahang pi mathu cüben.

⁸ Anyi kepathu na achoghe nmehai nu kemehaiwa tsü meya mvula nkemehaiwa tsü nieden; Anyiza na mathu miwi ma leben kekha nu keminu pi chiben.

⁹ Ciwi nkemehai kesa nyi tsüdila agüccü nu ketizen saben, tsüna Judah nyi atuwa nu Judah nyi nkenyethu ghena la.

¹⁰ Isala Anyiza na anyankethang, kenyuwakü, nu kecca pi kemehai sa ketenthu tsüdi cüben, tsüna Judah nyi atuwa nu Judah nyi nkenyethu ghena la.

¹¹ Kepaghenanye Anyiza na ayen makesü pi anyi tsüdila ghan-nan den.

¹² Judah nyi nkenyethu na Mosa Yenwa tsü nmi; mathu sami nu Ayenwa nkemi wina bhatagha ben. Judah nyithu na Ayenwa tsü ben; mathu sami nu Ayenwa wina mathu ghangnan ben.

¹³ Kepaghenanye Ayenwa tsü kekina ghena anyi pi Anyiza tuwi meshonya nten, isala Ayenwa tsüna salo kekhi tsü kekuli wina.

¹⁴ Judah nyi nkenyethu na Ayenwa nkemi ghena mathu kahang wi Ayenwa wina katsüha kuli lela tsüna mathu yen, kepaghenanye mathu na Ayenwa tsü nmi.

¹⁵ Mathu yencüki wina Ayenwa na khi keben tsü pi mathu leben wi zhütheng kesa pi ccücaben. Mathu kemeshenwa la tsüna atsentsale kesa pi ccücaben, kepaghenanye mathu kemeshenwa tsüna kuti tsü mathu kimenni nu kuti tsü mathu sheipiden.

¹⁶ Tsalina hi Jühtheü Kemehaiwa pi kesansi kenie wi Anyiza na Jisu Khrista wina anyi tsüdi kekuthi kemeshenthu ghan-nan keten tsathang wi hati saben.

Judah Nyithu Nu Ayenwa

¹⁷ No ketanla no pi Judah nyile khiden. No Ayenwa tsü nondiden, nu no Anyiza nyile kesa meshen pi kapvüden.

¹⁸ No Anyiza na no ya mangwa sa thsü mvu ben khe chüben, nu no Ayenwa wina kemehai keteshü kessikeya yen chüyadha.

¹⁹ No anyon nkemuthu len ketsütsonwa, kejang wi kebenthu kewegüwa,

²⁰ kejüphonthu nu ghanyithu kesansiwa le kesa no nondiben. Kepaghenanye no Ayenwa wi tsü palakechü nu atsentsawa cüki tsüdila benle kesa chütiben.

²¹ No nyu sansiden, isathu mangkesa na no ketanla no sansi meya nu? No “N-ghanfü lalo” nyu sansiden, isala no ghanfüten kwe?

²² No “Nqheza lalo” khiden, isala no qhezaten kwe? No atsikezhüthu nanqanan den — isala no tsü kekinyijjen wi pala ghanfüten kwe?

²³ No Anyiza Yenwa tsü keben ghena kapvüden, isala no Ayenwa tsü kepakhhi ghena kejüghekeya sengho Anyiza miwi chiten kwe?

²⁴ Ntsawajüh wi khiben, “No Judah nyithu ghena Judah nyi nkenyethu na Anyiza nyan khimeshü den.”

²⁵ Keujüla no Ayenwa tsü nie lethu, no ahyukahan tsüna ma men ben, isala Keujüla no Ayenwa tsü n-nie lethu, no ahyu nkahanwa la mehai.

²⁶ Keujüla Judah nyi nkenye ahyu nkahan nyi kesü na Ayenwa kekhi tsü nieten lethu, Anyiza na ma pi ahyukahan nyi ti sa nben kwe?

²⁷ Tsalina Judah nyi nkenyethu na Judah nyi pi ma men nkemi saben, kepaghenanye no Ayenwa tsü ben nu ahyuhan lela no Ayenwa tsü pakhhi, isani mathu tsü ahyu nhan lela Ayenwa tsü nieden.

²⁸ Kepaghenanye Judah nyi atsentsawa tsüna amei kemu nu asajjü wi ahyukahan tsü nyele!

²⁹ Isala Judah nyi atsentsawa tsüna anon wi ma leben wi ahyukahanwa tsü, tsüna Anyiza Ghamu kekuli khe zhüketheng Yenwa ghena nye. Anyi tsüwa tsüna Anyiza wina khe anyi wi keseng pvüya nten.