ROMNYI 11 - Kemethajüh (N) (Re-editing) Bible (BSI)

Anyiza na Israel Nanketizen

¹ Tsalina hi keüben: Anyiza na ma nyithu meya mvula kwe? Tsüti nye le! Hi la Israel nyi kesü, Abraham shicü wi Benjamin mizza nyi kesü.

² Anyiza na aghatsan wina kessikeya ma nyithu tsü meya mvula nsa. Nthu na Ntsawajüh wi Elijah na Anyiza wi Israel keshun jüh kekhi tsü khatile khiben khe chüben:

³ “Apvüwa, mathu na no wina kegho atusenjüh-kechüthu pathi nu no kekinyipenthu yasadha; hi ketan sadha nu mathu na hi la pathiale bhaden.”

⁴ Anyiza na mangwale ma lunengchi nu? “Hi Baal cenpvü nkekinyithu anyi hazar tagü pi ighena theng.”

⁵ Tsü makesü khili la: ciwi Anyiza na ma nanketizen wina kessikeya anyi keu ketan na ben.

⁶ Ma kessikeya tsüna ma nanketizen wina khe mathu kekuli miwi na nye. Kepaghenanye keujüla Anyiza na kessikeya tsüna anyithu kekuli miwi na lethu, ma nanketizen tsüna ntsakhiwa nanketizen nye.

⁷ Isathu, khati nu? Israel nyithu na mathu bha ketenwa tsü mu meyala. Isala Anyiza na kessikeya anyi akhang kizzakeu na tsü muya; nu kepathu na Anyiza keci wi tsü akhuna tecu wa.

⁸ Ntsawajüh na kekhi ti, “Anyiza na mathu leben nu kemeshen sa pi jeng thsüa; nansü kecu mathu na mu nu za meya.”

⁹ David na kekhi ti, “Mathu kemishu na aca ti mathu ghan keyawa sa; mathu ya khuli wa, mathu meten keyawa salo!

¹⁰ Mathu nyon ya jang nu pala nkemuwa sa; nu mathu na agükeccü wi matsü tsüdi wi ketizen sa thsülo.”

¹¹ Isathu, hi keüben: Judah nyithu na accümeshü nu khuli wa yasa kwe? Tsüti nsa le! Mathu na kesami sa kesa ghena hangshakeya na Judah nyi nkenyethu wi ghodha, nu Judah nyithu na mathu ghena anyonsa thsüle kesalina.

¹² Judah nyithu kesami ghena keben kemihhi sengho ayyi nyi cü, nu mathu aghamulen wi kahhatu ghena keben kemihhi sengho Judah nyi nkenyethu cüa. Isalethu, Judah nyithu mabenla pi saghuya lethu, kemihhi khajula ji kayi ben nu!

Judah nyi nkenyethu Hangshakeya

¹³ Hi khili nthu Judah nyi nkenyethu wi khiben: Hi Judah nyi nkenyethu ghena apostel sa keben chu hi kekuli wi kapvüshüsha saden.

¹⁴ Hi inyithu sa pi anyonghopvü thsüaden, isanu mathu pahan hangshayale kesalina.

¹⁵ Kepaghenanye mathu meya mvula kesa wi ayyi nyi Anyiza ghinyithu tsü kemili pi ma pvüshangthu sayadha. Isalethu, mathu yaya lethu, khati saben nu? Tsüna keshü ghena kahang saben.

¹⁶ Keujüla amesa be atuwa tsü pi Anyiza cü lethu, amesa tsü mabenla ma ji sadha; nu keujüla achanton ma ghazan pi Anyiza cü lethu, ma cünathu la ma ji sadha.

¹⁷ Noncca keten oliv ton cüna pahan pashüdha, nu agheja ji oliv cüna sengho ciwi bhenki theng. Nthu Judah nyi nkenyethu na agheja ji oliv tsüti kesa, nu nthu na khili aghamulen wi kezü kahang wi Judah nyithu gweghe yaben.

¹⁸ Tsalina nthu na kepashü cünathu ti kesathu tsü nkhichi sa yishü. Nthu na khati nu kapvüya mehai nu? Nthu na acüna kesü; nthu na aghazanthu kiqa nben; isala aghazanthu na nthu kiqaben.

¹⁹ Isala nthu na ha khiben, “Anle, acünathu pashükea tsüna hi pi ciwi bhenki le kesalina.”

²⁰ Tsüna ntsakhiwa. Mathu na nkenondi ghena pashüa, nu nthu na kenondi ghena ciwi ben. Isala tsü ghena nkapvüla nu messi yalo.

²¹ Anyiza na Judah nyithu, acüna tsentsathu ti kesa tsü lela nheila; nthu kemeshen ma nthu hei cübenle ben kwe?

²² Ha wi ithu na Anyiza na khatila ccapeyi nu mayen khang khe muyaben. Ma khuli wa kesathu tuwi mayen khang, isala nthu tuwi tsü ccapeyi — keujüla nthu na ma keccaketssü wi benkiya lethu. Isala keujüla nthu na tsüti nsa lethu, nthu la pashü piaben.

²³ Nu keujüla Judah nyithu na mathu nkenondi tsü teshi lethu, mathu pi kheni mathu pen wi tsü chi neng shaben; kepaghenanye Anyiza na tsüti saya mehai.

²⁴ Nthu Judah nyi nkenyethu, agheja oliv cünathu ti kesa tsü pashü sengho nthu ton nkenye noncca keten oliv ton wi bhenki theng. Judah nyithu na noncca keten oliv ton tsüti, nu Anyiza ghena acüna pashü kesathu tsü pi mathu ton wi chi nengle kesa na lekete.

Anyiza Nanketizen Na Tsüdi Miwi Keben

²⁵ Icünyuthu, ciwi atsentsa kekuthi kesü na ben, nu hi nthu yala tsü chüya thsü mvuben; nthu na tsü chüya lethu, nthu na metsa ntsawa le nmeshenla ben. Israel nyi lebenkedhu tsüna anuphan ben nben; isala tsüna Judah nyi nkenyethu tsüdila Anyiza wi npi kegho chu benben.

²⁶ Nu hati nu Israel nyi tsüdila hangsha yaben. Ntsawajüh na khiben, “Hangshawa na Zion wina ghoden, nu Jakob shicübvüghathu miwi gheshighena tsüdi khupiaben.

²⁷ Hi mathu kesamithu khupi kesa seng wi mathu ssinu cenkethenjüh kesü saben.”

²⁸ Mathu na Jühtheü Kemehaiwa meya mvula kesalina nthu Judah nyi nkenyethu ghena Judah nyithu na Anyiza ghinyithu saben. Isala Anyiza na kessikeya ghena lethu mathu na mathu bamyithu ghena Anyiza pvüshangthu.

²⁹ Kepaghenanye Anyiza na ma thowa kessiya nu sawegü pi cüten khe tsü cüki ghena ma kemeshen kemili nten.

³⁰ Nthu Judah nyi nkenyethu ghena tsü, nthu na kheni Anyiza jüh nkinala gho, isala khilitsü Judah nyithu na ajüh nkeya ghena nthu na Anyiza nanketizen muyadha.

³¹ Tsü makesü, nthu na nanketizen mukeya ghena Judah nyithu na khili Anyiza nanketizen muyale kesalina mathu la khili Anyiza jüh nkinala ben.

³² Kepaghenanye Anyiza na anyi tsüdi pi ajüh nkeya tssüzüthu sa thsü theng, isanu ma nanketizen pi mathu tsüdila ccücale kesalina.

Keseng Pi Anyiza Kecü

³³ Anyiza keban keben na khatila di nu! Ma kemetsa nu palakechü na khatila dhu nu! Thowa na ma kemeshenthu tsü khimethaya mehai nu? Thowa na ma lenthu tsü chüshiya mehai nu?

³⁴ Ntsawajüh na kekhi ti, “Thowa na Apvüwa kemeshen tsü chüben nu? Thowa na ma sansiya mehai nu?

³⁵ Thowa na ma wi pala mu nengyale kesa ghena pi ma cüten nu?”

³⁶ Kepaghenanye ma pala tsüdila sachi, nu pala tsüdila ma wina nu ma ghena hangben. Anuphanla Anyiza nyanthang keyawa salo! Amen.