ROMNYI 10 - Kemethajüh (N) (Re-editing) Bible (BSI)

¹ Ipvüshangthu, hi ileben tsüdi pi inyithu yala hangshaya thsü mvu nu Anyiza wi mathu ghena kekhie sale!

² Mathu na Anyiza wi lebenchi ntsa saden; isala mathu lebenkechi tsüna palakechü atsentsawa miwi nyele kesa hi nthu wi khiya mehai.

³ Kepaghenanye mathu na Anyiza na anyi pi ma tuwi meshonya keten lenwa tsü nchü, nu mathu ketanla mathu kemeshen wina saden; tsalina mathu na mathu pi Anyiza na anyi pi ma tuwi meshonya keten lenwa wi tsü chi nten.

⁴ Kepaghenanye Khrista na Ayenwa tsü sa pi asakhen sadha, isanu anyi thowa na nondiya khe Anyiza tuwi meshonya thsüle kesalina.

Hangshakeya Tsüna Tsüdi Ghena

⁵ Ha Mosa na Ayenwa tsü kenie wina Anyiza tuwi meshon yaben kesa cüki zhü kechi: “Anyi thowa na Ayenwa na khi kechithu tsü nieten khe hang yaben.”

⁶ Isala Ntsawajüh na kenondi wina Anyiza tuwi meshonkeya cüki khi kebenwa tsüna ha; “No ketanla, ‘thowa na tang wi ki ben nu?’ tsüti nkeüla.” (tsüna Khrista ssi dugho le kesa).

⁷ “Nyelela, ‘thowa na ayyi cakhu wi du ben nu?’ isa nkeüla.” (tsüna keshü wina Khrista ssi keshhugho).

⁸ Tsüna hati khiben, “Anyiza ketsijüh tsüna no tetsaki ben, npang wi nu nleben wi ben” —tsüna kenondi jüh ithu pi kekhi tsü.

⁹ Keujüla no npang pi Jisu tsüna Apvüwa le khishi nu nleben wi Anyiza na keshü wi ma sa pi hang cüle kesa nondiya lethu, no hangsha yaben.

¹⁰ Kepaghenanye ithu na aleben pi nondi nu Anyiza tuwi meshon yaden, nu apang pi khishü nu hangsha yaden.

¹¹ Ntsawajüh na khiben, “Anyi kesü le kesü lela ma nondi ketenwa kejügheya thsü nben.”

¹² Hawa wi ha anyi tsüdila saghuben, kepaghenanye ciwi Judah nyithu nu Judah nyi nkenyethu kepapa kesa mangla nmi. Anyiza na tsüdi miwi Apvüwa, nu ma keben kemihhi pi ma wi khie ketenthu tsüdi cü ntsa saden.

¹³ Ntsawajüh wi khi keben ti, “Anyi kesü le kesü lela Apvüwa wi kekiqa khie ketenwa hangsha yaben.”

¹⁴ Isala keujüla mathu na n-nondi lethu, khati nu ma wi kekiqa khieya mehai nu? Nu keujüla mathu na ketsijühwa tsü za meya lethu, mathu na khati nu nondiya mehai nu? Nu keujüla ketsijüh tsü pi nkhichi lethu, mathu na khati nu tsü zaya mehai nu?

¹⁵ Nu keujüla nyilothu kesunshi nchi lethu, khati nu ketsijüh pi khichiya mehai nu? Ntsawajüh na khi keben ti, “Jühtheü Kemehaiwa sen kegho nyilothu ccü na khatila atsimehai nu!”

¹⁶ Isala tsüdila Jühtheü Kemehaiwa tsü ya meya. Isa na ma ketanla khitheng, “Apvüwa, thowa na ithu ketsijüh ha nondiya nu?”

¹⁷ Tsalina ketsijüh kekina wina kenondi ghoden, nu Khrista jüh pi kesansi wina ketsijüh ghoden.

¹⁸ Isala hi keüben: ntsakhiwa mathu na ketsijüh tsü za meya kwe? Mathu na tsü zayadha— kepaghenanye Ntsawajüh na khiben; “Mathu khwejü hhaiwa tsüna ayyi tsüdi wi wadha; mathu jühthu na ayyi ccügwenthu cudha.”

¹⁹ Kheneng hi keüben: Israel nyithu na chüshi meyala kwe? Mosa na ma ketanla atuwa sa tsü luneng; “Hi imizzatenti ntsawa nkenye kesü tsü senya nu inyithu sa pi anyonghopvü thsüaden; nu hi kejüphon mizzatenti kesü ghena inyithu sa pi aghepvü thsüaden.”

²⁰ Nu Isa na tsü miwi kapvüshüsha nu khi, “Anyi hi bha nketenthu na hi muya, hi anyi hi keü nketenthu tuwi gho.”

²¹ Isala ma Israel ghena khichi, “Ghanan thangthang hi ikwen chang pi ajüh nkeya nu nyu shun keten nyithu ssiyale sa.”