PENDHENYI 9 - Kemethajüh (N) (Re-editing) Bible (BSI)

Abimelek

¹ Gideon tsa Abimelek na ma jja nu ma shilithu hang keben Shekhem nyunuti wi wa nu mathu kiza

² nu Shekhem nyithu wi keü thsü, “Nthu na thowa nenben nu? Gideon tsathu tsüdi achentagü tsüla meshu kesütanwa tsüna nthu miwi kekhang senthsü mvuben nu? Abimelek na nthu gweghe asajjü kesütanle kesa meshenyalo.”

³ Ma jja shilithu na ma ghena Shekhem nyithu ccüneng nu Shekhem nyithu na Abimelek niele cenya, kepaghenanye ma mathu shili kesalina.

⁴ Mathu na Baal cenkethenjüh kekinyijjen wi rükatssü achentagü pi ma cü, nu ma apisa ha pi anyi ketesüthu akhang kesü melli pi ma gwegheya.

⁵ Ma ma ba jjen Ofra wi wa nu ma ciwi alon kesü miwi na ma cünyuthu Gideon tsathu achentagü tsüdi pathia. Isala Gideon tsa bvükhenwa Jotham na kuthiwa nu ma pathi meyala.

⁶ Tsaseng wi Shekhem nu Betmmillo nyithu tsüdi saghuya nu Shekhem wi ayangton kemetha ccü wi wa mathu ciwi Abimelek pi kadimiwa sa thsüa.

⁷ Jotham na ha cüki zakeya wi ma Gerizim Yikha shoni miwi kiya nu mathu wi jishachi, “Shekhem nyithu, ijüh kinachilo, nu Anyiza na nthu hhai kina cübenle!

⁸ Kuti tsüwi achantonthu na mathu ketanla mathu jawi kadimiwa kessi. Mathu na wala oliv ton wi khi, ‘No ithu kadimiwa salo.’

⁹ Oliv ton na luneng, ‘Nthu miwi kekhang senle kesalina hi acenpvüthu nu anyi na kinyikü ketenwa ideli tsü nkhushi chila kwe?’

¹⁰ Tsaseng wi achantonthu na wa khhaghabvü ton wi khi, ‘No ghola ithu kadimiwa salo.’

¹¹ Isala khhaghabvü ton na luneng, ‘Nthu miwi kekhang senle kesalina hi ibi keminnunwa tsü nbünla kwe?’

¹² Tsalina achantonthu na tsaseng wi wa kemeshentsse ton wi khi, ‘No ghola ithu kadimiwa salo.’

¹³ Isala kemeshentsse ton na khineng, ‘Nthu miwi kekhang senle kesalina hi acenpvüthu nu anyi sapi anongheya thsü ketenwa kisengtssü tsü nkhuchila kwe?’

¹⁴ Tsalina achantonthu tsüdila wa aghazü ton wi khi, ‘No ghola ithu kadimiwa salo.’

¹⁵ Aghazü ton na khineng, ‘Nthu na ntsakhiwa hi pi nthu kadimiwa sa thsü mvuben lethu, ghola ikekhwen wi n-niyalo. Keujüla nthu na tsüti nsa lethu, ighazü cünathu wina anni shhugho nu Lebanon wi sedar chanthu mecang shaben.’

¹⁶ “Tsalina nthu khili ntsakhiwa nu lebentsentsa sala Abimelek pi kadimi sa thsü theng ma? Nthu na Gideon kekuli kemehai tsü meshen nu mehaitsü ma theghi kinyiküla nu?

¹⁷ Iba na nthu ghena aghikesa tsü meshenchi nanlo. Midia nyithu kwen wi nthu hangshayale kesalina ma kahang khuchile.

¹⁸ Isala nthu na nansü iba theghi shunben. Nthu na alon kesütan miwi ma tsathu achentagü tsüdi pathidha, nu maghalewa wina mukeya ma tsa Abimelek nthu shiliwa ghena nthu na Shekhem wi ma pi kadimi sathsü theng.

¹⁹ Tsalina nthu na nansü Gideon nu ma theghi miwi mangwa sachi theng khe tsüna ntsakhiwa nu lebentsentsa sa lethu, Abimelek ssinu leben ghashu sa nu ma ya nthu miwi anonghethi sa thsülo.

²⁰ Isala tsüti nsa lethu, Abimelek wina anni shhugho Shekhem nu Betmmillo nyithu mecangthi kesawa salo.”

²¹ Tsaseng wi Jotham na ma cünyuwa Abimelek kemessi ghena bvüsen wa Beer wi hang wa.

²² Abimelek na Israel miwi amapi kecheng kekhang sen.

²³ Tsaseng wi Anyiza na Abimelek sapi Shekhem nyithu mathu khokho nankemeghüli wa thsü, nu mathu na Abimelek matang nu shun wa.

²⁴ Hati sa nu Shekhem nyithu na Abimelek satezü pi ma cünyuthu Gideon tsa achentagü pathi thsü kesa kesami kutimen pi cü thsüle kesalina.

²⁵ Shekhem nyithu na anyi pahan pi ayikhathu shoni wi Abimelek pathi thsüale hie thsü, nu mathu na anyi alen ciwi kewathu tsüdi ji shuya. Nyu na ha cüki pi Abimelek wi kiza.

²⁶ Tsaseng wi Ebed tsawa Gaal na ma cünyuthu ssinu Shekhem wi gho, nu Shekhem nyithu na mathu kenondi pi anyi tsüwa miwi chi.

²⁷ Mathu tsüdila mathu kemeshentsse lli wi wa ma bithu la sengho kisengtssü sa nu akho kesü sa. Mathu na mathu cenpvü kekinyijjen wi wa dsa nu jjü nu Abimelek khipi keponsa sa.

²⁸ Gaal na khi, “Ithu Shekhem wi keben nyithu ha khati kesa nu? Ithu mangkesa na Abimelek kekuli saben nu? Ma thowa nu? Gideon tsala? Nu Zebul na ma wi ahza khuya, isala ithu mangkesa na ma kekuli saben nu? Nthu bamyi nthu mizza bhashi kecüwa Hamor jüh kinalo!

²⁹ Hi anyi hathu ccüli satenle kheshilan! Hi Abimelek jügüshia kesale! Hi ma kizala ‘Nsüpahizi satezüyanu gho hi ssikesalilo,’ isa khi kesale.”

³⁰ Anyunuti miwi kekhang kesenwa Zebul na Gaal mangwale khi khe tsü zakeya wi ma leben minuya.

³¹ Ma nyilothu kesun pi Aruma wi Abimelek wi chi nu khi, “Ebed tsawa Gaal nu ma cünyuthu gweghe Shekhem wi ghodha, nu mathu na no ya anyunutiwa wi dugho thsü nben.

³² Tsalina no nu n-nyithu na shita ghala alli wi kuthi ben lalo.

³³ Ghanen wi aghani shhugho meyi shaghala anyunutiwa ssikaghashen lo. Isanu Gaal nu ma nyithu na no shun shhugho lethu, no khati mathu paya mehai khe palo.”

³⁴ Tsalina Abimelek nu ma nyithu tsüdi aghaja na wa anyunuti na ameiwa akhang mejü sala kuthiben.

³⁵ Abimelek nu ma nyithu na Gaal na shhugho anyunuti kaghapeng jenka wi ngankeben kemu wi mathu kekuthi pen wina shhugho.

³⁶ Gaal na mathu muya nu Zebul wi khi, “Ghangchilo, ciwi anyithu na ayikha shoni wina dugho tenle!” Zebul na khineng, “Katsüthu katsü na anyi nyele. Tsüthu tsüna ayikha miwi aghajenthu le!”

³⁷ Gaal na khineng, “Ghangchilo, ciwi anyi kejon ayikha miwi na dughoden, nu akhang kesü na atusencüki kekhithu yangton len wina gho tenle!”

³⁸ Tsaseng wi Zebul na ma wi khi, “No ajüh ketiti kekhi tsüna khili khati sadha nu? No ithu na mangsale Abimelek kekuli sa nu tsüti khi. Anyi hathu ha no mathu khipi keponsa sa kebenthu tsüle! Khili wala mathu ssisalo.”

³⁹ Gaal na Shekhem nyithu ssi shula Abimelek ssisa.

⁴⁰ Abimelek na Gaal jügüwa nu Gaal na ma tubvüa. Anyunutiwa kaghapeng jenka wina anyi kejon mesa-mena shan.

⁴¹ Abimelek na Aruma wi hang, nu Zebul na Shekhem wina Gaal nu ma cünyuthu jügüshi nu mathu na ciwi hang meyala.

⁴² Abimelek na dhitsüwa wi Shekhem nyithu na alli wi watenle kesa chüya,

⁴³ tsalina ma nyithu ssi wa gishü pi akhang kecheng sa nu mathu pi alli wi kuthi nu hieben thsüa. Ma anyithu na anyunuti wina shhugho keten kemu wi ma kekuthi pen wina shhugho mathu pathia.

⁴⁴ Abimelek nu ma nyithu na kaghaji sen nu anyunuti kaghapeng jenka tsü hieyale waketen wi kepa wi akhang keni na wa alli wi anyithu ssisa nu mathu tsüdi pathia.

⁴⁵ Ghanan thangthang mathu kesali; Abimelek na anyithu pathia, anyunutiwa tsü nkaya nu yasa pia, nu amcü pi ayyi tsü pong.

⁴⁶ Shekhem ducü kezhü non wi keben anyi ccülikesathu tsüdila ha cüki zakeya wi mathu na Baal cenkethenjüh kaghapeng kezüwa bha wa ma non wi n-niben.

⁴⁷ Mathu na ciwi saghu benle kesa nyu na Abimelek kiza,

⁴⁸ tsalina ma ma nyithu ssinu Zalmon Yikha wi ki. Ma ciwi ampvü kesü khuya nu wa achanbvü kesü dhi pi ma depfü miwi chi pigho. Ma ma nyithu la wanwan wa tsüti sa pigholo kiza.

⁴⁹ Tsalina anyi tsüdila wa achanbvü kesüsü dhi piya nu Abimelek nie wa nu achan pi kaghapeng kezüwa tsü tsakila saghu chia. Mathu na anyithu pi nduku wi khenten nu anni sachia. Tsalina Shekhem ducü kezhü non wi anyi tsüdi, nza npvüza saghu hazar kesü cen shüa.

⁵⁰ Tsaseng wi Abimelek na Thebez wi wa anyunutiwa tsü vüya nu tsü nkaya.

⁵¹ Ciwi aducü kezhü kezü kesü na ben; anyunutiwa wi nza npvüza nu accülikesathu tsüdi saghu bvüsen ciwi wa. Mathu ketanla mathu khenten nu ajjenmili wi kia.

⁵² Abimelek na ssikaghashen le aducü kezhüwa wi wa nu anni pi tsü mecang chiale ma jenka wi wha.

⁵³ Isala kinyibvü kesü na asu kenyeggü lon kesü pasha pi ma ligü kecencha.

⁵⁴ Ma kaghajila ma ghighe pvüketenwa pvüzawa cichi nu khi, “Wanwan no njünnu hanshi pi hi süthilo. Hi nyu ya kinyibvü kesü na hi pathile khi thsü mvu nbenle. Tsalina pvüzawa na bvüwa ma süthia.

⁵⁵ Israel nyithu na Abimelek keshü mukeya wi mathu tsüdi ajjen wi wha.”

⁵⁶ Tsalina tsüna Abimelek na ma ba shun nu ma cünyuthu achentagü pathi kesa kesami kutimen tsü Anyiza na sapi kecüneng.

⁵⁷ Gideon tsawa Jotham na Shekhem nyithu kishenkecü wi kekhi ti Anyiza na Shekhem nyithu gheshighena ghena mathu pi ketizensa thsüa.