PENDHENYI 7 - Kemethajüh (N) (Re-editing) Bible (BSI)

Gideon na Midia nyithu Chakeya

¹ Ghanan kesü Gideon nu ma nyithu tsüdi mitu na shagha nu wa Harod Tssükebvüpen kete wi kemnanpen saben. Midia nyithu na Moreh yyishiphon na aghawa yyiketijü wi tsü mathu kemnanpen sa.

² Apvüwa na Gideon wi khi, “No anyi ssi ketenthu tsüna hi Midia nyithu miwi khangkeya pi mathu cüle kesa ghena ji mtsü le. Mathu na hi ghena khangyale kesawa nyela mathu ketanla mathu ghena khangyale meshen waben.

³ Anyithu wi ‘Thothu na messiben khe ajjen wi whaneng nsathu yishü, nu ithu na he Gilead Yikha wi benten le’ kizalo.” Tsalina anyi hazar ngwe nu mejü na whaneng, nu hazar tagha ketan ben wa.

⁴ Apvüwa na Gideon wi khi, “No khilila anyi ji mtsüben. Mathu ssinu atssü wi cülo, nu ciwi hi mathu gishü pi no ghena kepapa sa cüden. Keujüla hi anyi kesü na no gweghe waben le khithu, ma waben. Keujüla hi anyi kesü na no gweghe wa nben le khithu, ma wa nben.”

⁵ Gideon na anyithu ssinu atssü wi cü, nu Apvüwa na ma kiza, “Anyi thothu na affü ti ma mili pi atssü menneben khe, tsüthu pi akhhutsüdu jjü kebenthu wina mathu kepa sayalo.”

⁶ Ciwi anyi meza kecheng na mathu kwen pi atssü ssuki nu tsü menne; kepa wi tsüdi mathu khutsüdu atssü jjü.

⁷ Apvüwa na Gideon wi khi, “Hi anyi meza kecheng mathu kwen pi atssü ssukinu menne kesathu tsü pi no kekashaya nu Midia nyithu miwi khangkeya pi nthu cüaden. Kepa wi tsüdila ajjen wi whanenglo kizalo.”

⁸ Tsalina Gideon na anyi meza kecheng mathu kwen wi kedsakejjü nu tutuwathu sen ketenthu tsü ketan ssiya nu Israel nyi kepathu tsüdila kesun pi ajjen wi wha thsüa. Midia nyithu kemnanpen na mathu na ssan wa yyiketijü witsü saben.

⁹ Tsü ghaja Apvüwa na Gideon kiza, “Shagha nu wala kemnanpen witsü ssikaghashenlo; hi tsü miwi khangkeya pi no cüden.

¹⁰ Isala keujüla no wa tsü ssikaghashen messi lethu, nmaghawa Purah ssiya nu kemnanpen witsü cülo.

¹¹ No mathu na mangwale khiben khe zayaben, nu no tsaseng wi mathu ssikaghashenle kesa kempvüza benya ben.” Tsalina Gideon nu ma maghawa Purah manyi na ghinyithu kemnanpen katen wi cü.

¹² Midia, Amalek nyithu, nu ayyikeshü wi mizza nyithu na yyiketijü wi ashiqathu ti pongben, nu mathu sunsiesathu na atssükedone ghüsa wi ahachan ti saben.

¹³ Gideon na cü cukeya wi anyi kesü na ma mang khipi ma pvüshangwa kiza keben zaya. Ma hati khiben, “Iman wina achentha pi amesa kegü pha kesü na khuli sen ithu kemnanpen wi dugho nithsüjjen kesü kecen. Nithsüjjen tsüna qancadu ayyi wi lla wa kesa mule.”

¹⁴ Ma pvüshangwa na luneng, “Tsüna Israel nyi Joash tsa Gideon njünnu tsüle! Tsüna kepa wi man ghena la nyele! Anyiza na Midia nyithu nu ithu süpahizi maben miwi khangkeya pi ma cüdhale!”

¹⁵ Gideon na anyi tsüwa mang nu tsü jjügi mangwa khe zakeya wi ma khutsüdua. Tsaseng wi ma Israel nyi kemnanpen wi whaneng nu khi, “Shaghalo! Apvüwa na Midia nyi süpahizi miwi khangkeya pi ithu cüben!”

¹⁶ Ma ma nyi meza kecheng tsü gishü pi akhang kecheng saya, nu ma tutuwa kesü nu alakhü non wi nnithegü keben kesü pi anyi kesüsü cü.

¹⁷ Ma mathu wi kiza, “Hi cü kemnanpen katen cuya lethu, hi ghang nu hi mangwa sakhe tsüti salo.

¹⁸ Ithu na tutuwa khouchi lethu, nthu tsüdi nthu ji khou nu kemnanpen vüla ‘Apvüwa ghena nu Gideon ghena le’ khila jishalo.”

¹⁹ Gideon na ma nyi meza ssisen aghaja non pang wi kemnanpen katen wi aghikehiewa kemili meyi gho. Mathu na tutuwa khou nu mathu alakhü sen keten tsü pakhhi,

²⁰ nu akhang kepawa keni la tsü makesü sa. Mathu tsüdi akwen tavüwa nnithegü nu ajewa pi tutuwa khusen nu khou, mathu jisha, “Apvüwa ghena nu Gideon ghena njünnu kesüle!”

²¹ Anyi tsüdila kemnanpen vüla papa pen wi ngan, nu aghinyi süpahizi mabenla maghala bvüa.

²² Gideon nyithu na mathu tutuwa khou keben wi Apvüwa na aghinyi süpahithu sapi mathu njünnu sen nu khokho ssikesali thsü. Mathu na bvüsen Zarethan kepeghewa Beth Shitta kecu, Tabbath kete Abel Mehola nyutiwa kecu wi wa.

²³ Tsaseng wi Naftali, Asher mizzathu, nu Manasseh mizza keni qho wi anyithu cichi nu mathu na Midia nyithu jügüwa.

²⁴ Gideon na Efraim yyishiphon diyyiwa tsüdi wi nyilothu kesunchi nu khi thsü, “Dugho Midia nyithu ssisalo. Jordan Ghaku nu Bethbara ghakuthu kecu tsü niela khenya nu Midia nyithu yala tsüthu npvüdhi thsü lalo.” Efraim nyithu cighu chi nu mathu na Jordan Ghaku nu Bethbara ghakuthu kecu khenya.

²⁵ Mathu na Midia nyi kedithu Oreb nu Zeeb manyi ghanya; mathu na Oreb pi Oreb Lonshi wi nu Zeeb pi Zeeb kisengtssü kemisügüpen wi pathia. Mathu na Midia nyithu jügüki wa, nu Oreb nu Zeeb manyi liwe sen Jordan na nishuwa Gideon wi gho.