PENDHENYI 6 - Kemethajüh (N) (Re-editing) Bible (BSI)

Gideon

¹ Israel nyithu na kheneng sami pi Apvüwa shun wa, tsalina Midia nyithu ya amapi tagü mathu miwi kekhang sen thsü.

² Midia nyithu na Israel nyithu miwi khangki, nu Israel nyithu na yyishiphon thu wi alonshiku nu apvü-nkesa pen wi mathu kuthi.

³ Israel nyithu na khiewi mathu yangdsaketenthu pi chi khe Midia nyithu na Amalek nyithu nu ayyikeshü wi mizzathu ssi gho mathu kaghashen.

⁴ Mathu na gho mathu yyi wi kemnanpen sa nu wa acülawa Gaza kevü kecu wi yangdsaketenthu tsü yasa. Mathu na khaghaneni, amesüsi, nu gadathu khuya, nu Israel nyithu na mangla sen nu hangkeya nmila.

⁵ Mathu na mathu sahangthu ssi nu nithsüjjen sen nu ashiqathu keji ti gho. Mathu nu mathu sunsiesa na jipi si meyakhi. Mathu na gho ayyiwa tsü yasatha sa,

⁶ nu Israel na mangla sen nu mathu shun meyala.

⁷ Israel nyithu na magha qai pi Apvüwa wi kekiqa khie nu Midia nyithu shun.

⁸ Ma atusenjüh-kechü kesü kesun pi mathu wi chi nu Apvüwa Israel Nyizawa wi ketsijüh ha sengho thsü: “Hi Egipt wi nthu na nyu nssümagha sa keben wina ssi shhugho.

⁹ Hi Egipt nyithu kwen wi nu ayyi hewi anyithu na nthu ssisa keben wi nthu kekashaya. Nthu na atujügüwathu hi mathu jügüshia, nu mathu yyi pi nthu cüa.

¹⁰ Hi Apvüwa nthu Nyiza nu nthu na mathu yyi wi hang keben Amor nyithu cenpvüthu tsü nkinyi lalo kesa nthu kizadha. Isala nthu na ijüh nkina le.”

¹¹ Tsaseng wi Apvüwa nyilowa na gho Ofra nyu wi Abiezer gei wi anyi kesü Joash ji ayangton kesü cakhu wi donki. Ma tsawa Gideon na Midia nyithu na ma nmu thsüle kesalina kuthila kisengtssü kesapen wi awhengsu ghaceng ben.

¹² Ciwi Apvüwa nyilowa na ma tuwi gho nu ma wi khi, “Anyi kepvüza nu kekhangwa, Apvüwa na no ssitenle.”

¹³ Gideon na ma wi khi, “Kediwa, hi keüben; keujüla Apvüwa na ithu ssiten lethu, mangkesa na hathu ha tsüdila ithu miwi hati saben nu? Apvüwa na amankesa kekuli sa keten ithu bamyithu na ithu kekizathu tsüdila khati sadha nu, ma khati nu Egipt wina mathu ssi shhugho nu? Apvüwa na ithu teshi pi Midia nyithu kwen wi chidha.”

¹⁴ Apvüwa na ahza pi ma cü, “No kekhang tsüdi sen wa Midia nyithu kwen wi Israel kekasha yalo. Hi no kesun chiben.”

¹⁵ Gideon na luneng, “Isala Apvüwa, hi khati nu Israel kekashaya nu? Manasseh mizza wi igei na nkekhang ntsawa, nu hi itheghi jawi kizza ntsawa na.”

¹⁶ Apvüwa na khineng, “No tsü saya mehai, kepaghenanye hi no kiqaden. No Midia nyithu pi meshu kesütan ti lekete mathu pacha cüben.”

¹⁷ Gideon na luneng, “Keujüla no hi nen lethu, no ntsakhiwa Apvüwa le kesa zensu kesü pi hi ccücalo.

¹⁸ Nchala hi atsse pi kekinyi kesa sen nu no wi npi kegho chu no hewi benlalo khieben.” Ma khi, “No npi kegho neng chu hi hewi benladen.”

¹⁹ Tsalina Gideon na wa ma jjen wi du aneni zza kesü pathi pi shvu nu awheng kilogram tagha pi azimi nchila güya. Ma asa pi ashijü kesü wi chiya nu awwentssü nu maqae kesaghu pi apfü kesü wi chisen ayangton cakhu wi Apvüwa nyilowa wi gho nu pi ma cü.

²⁰ Tangnyilowa na ma kiza, “Asa nu amesa tsü pi alon ha miwi chi nu awwentssü nu maqae kesaghu tsü pi ma miwi keshuchilo.” Gideon na tsüti sa.

²¹ Apvüwa nyilowa na ma akhhatssü khusen keten tsü pi asa nu amesa tsü kidhenchi. Alon wi anni na qhe shagha asa nu amesa tsü mecang. Tsaseng wi tangnyilowa tsü nmula.

²² Gideon na tsaseng wi ma Apvüwa nyilo muyadha le kesa chüya nu ma messi nu khi, “Kekhang ntsawa Apvüwa! Hi no nyilowa mmi mutiyadha man!”

²³ Isala Apvüwa na ma kiza, “Leben ccayalo. Nmessila. No shü nben na.”

²⁴ Gideon na ciwi kekinyipen kesü sapi Apvüwa cü nu tsü nyan pi “Apvüwa na keccawa” ciya. (Tsüna khilila Ofra wi Abiezer gei ji saben.)

²⁵ Tsü ghaja Apvüwa na Gideon kiza, “Nba mesü süpon nu kepa wi amesü zza süpon amapi tagü kesü khuya, nba na Baal ghena kekinyipen tsü pakhhilo, nu tsü kete wi acenpvü nzawa tsikezhü Asherah tsü la pakhhilo.

²⁶ Alonshi ha miwi kekinyipen mehaitsü kesü sapi Apvüwa n-Nyiza cü. Tsaseng wi amesü süpon keniwa tsü khuya nu no Asherah tsikezhü pakhhi kesa tsü pi kemecang chan sala amesü tsü maben mecang pi kekinyi salo.”

²⁷ Tsalina Gideon na ma maghathu meshu tagha ssi wa Apvüwa na ma kekiza ti sachia. Ma aghanan wi tsüti sale kesa ma theghi nu anyithu messi kesalina ma aghaja wi tsü sa.

²⁸ Anyuti wi anyithu na ghanenwa wi shagha nan mathu na Baal kekinyipen nu Asherah tsikezhü tsü pakhhi ketheng nu ciwi kekinyipen kesü sa ketheng miwi amesü süpon keniwa pi mecang kesa muya.

²⁹ Mathu khokho wi kekeüli, “Thowa na hati sa nu? ” Mathu na kepili wa Joash tsa Gideon na tsüti sale kesa chüya.

³⁰ Mathu na Joash wi khi, “Ntsawa ssinu hewi gholo, ithu na ma pathiaben! Ma Baal kekinyipen nu tsü kete wi Asherah tsikezhü tsü pakhhidha.”

³¹ Isala Joash na ma wi aghepvü kebenthu tsüdi wi khi, “Nthu na Baal ghena keccücanli ben kwe? Nthu na ma shei khiben kwe? Thowa na ma ghena keccücanli ben khe ghanen wi ma pi shü thsüaben. Keujüla Baal na acenpvü kesü lethu ma ketanla ma shei khiya thsülo. Yasa kesa tsüna ma kekinyipen le.”

³² Tsü nten na Gideon pi Jerubbaal le sa, kepaghenanye Joash na “Baal ya ma ketanla ma sheikhiya thsülo; yasa kesa tsüna ma kekinyipen le.” khi.

³³ Tsaseng wi Midia, Amalek nyithu, nu ayyikeshü wi mizzathu na saghuya nu Jordan Ghaku pvüdhi wa Jezreel yyiketijü wi kemnanpen sa.

³⁴ Apvüwa ghamu na Gideon miwi benya, nu ma tutuwa khou chi nu Abiezer gei nyithu ci pi ma nie thsüa.

³⁵ Ma nyilothu kesun pi Manasseh yyi keni qho wi chi nu mathu ci pi ma nie thsü. Ma nyilothu kesun pi Asher, Zebulun, nu Naftali mizzathu wi la chi nu mathu na gho ma gwegheya.

³⁶ Tsaseng wi Gideon na Anyiza wi khi, “No hi sen nu Israel kekasha le khitheng.

³⁷ Hi assenthsü pahan pi aniegi wi ayyi wi chitheng. Keujüla ghanen wi akejan na assenthsü miwi ketan khe ayyi miwi nbenla lethu, no hi sen nu Israel kekasha yaden kesa hi chüyaben.”

³⁸ Ntsakhiwa tsüti sa. Gideon na ghanenwa mitu na shagha assenthsü wi akejan tsü misügü pi atssü na akhuzza kesü pongya.

³⁹ Tsaseng wi Gideon na Anyiza wi khi, “Imiwi aghepvü nsala; hi ya ajüh kesü khineng thsülo. Hi ya assenthsü ha pi kuti ghannan thsülo khieben. Khilitsü assenthsü miwi ketan kiqha thsüa, nu ayyi miwi kica sa thsülo.”

⁴⁰ Anyiza na tsü ghaja la tsüti sa thsüa. Ghanenwa wi assenthsü tsüna kiqhaben, isala ayyi miwi akejan na ca benla.