PENDHENYI 5 - Kemethajüh (N) (Re-editing) Bible (BSI)

Deborah nu Barak manyi Khwi

¹ Tsü ghanan wi Deborah nu Abinoam tsa Barak manyi na akhwi ha sa:

² Apvüwa senglo! Israel nyithu na aghisale kidenya; anyithu na nong ntsanu mathu kahang khuchi.

³ Nthu kadimithu ha kinalo! Nthu kekhang kesenthu ha kina chilo! Hi akhwisa nu achünong khou pi Apvüwa Israel Nyizawa wi chiden.

⁴ Apvüwa, no Seir yikhathu teshi nu Edom yegu wina keshhugho wi, ameghükuju, nu tang wina atsangho dugho. Anle, akulukeshü wina atsan keshusha dugho.

⁵ Sinai wi Apvüwa tuwi ayikhathu zankulu, Apvüwa Israel Nyizawa tuwi.

⁶ Anath tsa Shamgar nu Jael tsathang tsü wi, Ut ghekhha na ayyi tsü pvüdhi nwala, nu kijünyi kewathu na alen kechhenwa wi ton.

⁷ Deborah; Israel nyithu na teshi pi ketheng, no npi kegho chu mathu na qanca keben, no Israel jja kesü ti sagho.

⁸ Israel nyithu na acenpvü ketheüthu kessikeya wi ayyi ciwi aghikesa na ben. Israel nyi hazar jügha jawi anyi kesüla atsonhi pvü nyelela apie sen kwe?

⁹ Ileben na Israel benchüthu, nu anyithu nong ntsa nu kahang khukechithu gwegheben. Apvüwa senglo!

¹⁰ Tsüpi kizalo nthu gada kemiki miwi ben, nu kedonkipen miwi donki kebenthu, nu nthu kahe wi lentsen wa ketenthu.

¹¹ Kinachilo! Anyitenti na atssükhang vüla ahhai misi ntsa, nu Apvüwa khangkeya cüki tsü khiben, tsüna Israel nyithu na khangkeya. Tsaseng wi Apvüwa nyithu na lentsen sen nu mathu nyunuti wina shhua.

¹² Deborah; ssi walo, ssi walo! Ssi walo! Akhwi salo! Ssi walo! Abinoam tsa Barak, atuwi walo, ntssüzü kesathu tsü ssi bvülo!

¹³ Tsaseng wi jühtsentsa kesathu na mathu ccülikesathu wi dugho; Apvüwa nyithu na aghisale kidenya nu ma wi gho.

¹⁴ Mathu Efraim wina gho yyiketijü wi du, Benjamin mizza nu ma nyithu sengwa na. Benchüthu na Makhir wina dugho, Kedithu na Zebulun wina dugho.

¹⁵ Issakhar ccülikesathu na Deborah gweghe gho; anle, Issakhar nu Barak la gho, nu mathu na ma nie sen nu yyiketijü wi du. Isala Reuben mizza tsü gishüa; mathu na ghole kesa südhe meyala.

¹⁶ Mangkesa na mathu khaghaneni ssinu aseng wi ben wa nu? Kehiethu na khaghaneni keci hhai kina wa kwe? Anle, Reuben mizza na gishüa; mathu na ghole kesa südhe meyala.

¹⁷ Gad mizza na Jordan na nishuwa ben wa, nu Dan mizza na ahunjjenthu wi ben wa. Asher mizza na atssükedone katen wi, nu mathu na aghüsa wi ben wa.

¹⁸ Isala Zebulun nu Naftali nyithu na aghikesa wi mathu kahang khuchi.

¹⁹ Megiddo ghaku kete Taanak wi kadimithu na gho kesali; Kanaan kadimithu na gho kesali, isala mathu rükatssü senpvü meyala.

²⁰ Ghotsithu na tang wi kaghashen; mathu na atssan kepvüdhi len sa, mathu na Sisera shunla ssisa.

²¹ Kishon wi atssüdan na mathu llepi bvüa— atssüti keben Kishon ghakuwa tsü. Hi kekhang sen nu lentsen waden!

²² Goruthu na penchila bvügho, mathu ccümezen pi ayyi kenne hhai na misikhhali.

²³ Apvüwa nyilowa na khi, “Kishen-keshi pi Meroz miwi chilo, kishen-keshi pi ciwi hang kebenthu miwi chi. Mathu na Apvüwa kiqale gho, süpahithu ti gho ma ghena nkesali.”

²⁴ Nza acenpvü keben ntsawa na Jael, ma Ken nyiwa Heber wubvü — nza anithsüjjen wi hang ketenthu jawi ma acenpvükeben ntsawa.

²⁵ Sisera na atssü khie, isala ma tsenitssü pi jjüya thsü; ma tsenitssü kiseng pi akhuzza kemehai kesü wi ci sen gho.

²⁶ Ma kwen kesü pi nithsüjjen kejentenji kesü khuya, nu pahanwa pi kekuli kesanyi kesü kejenji khuya; ma tsü pi Sisera ligü kihhecha; nu pi ma li jenbhia.

²⁷ Ma akhhutsüdu, nu khulidu nzawa ccü wi ben. Ma nzawa ccü wi akhhutsü nu khulidu; ma ayyi wi khulidu nu shüa.

²⁸ Sisera jja na ajjenkubhi wina ghang; ma ajjenkubhi sengwa na ghang. Ma keü, “Mangkesa na ma gorugari na minuten ghoten nu? Mangkesa na ma goruthu ashina gho nengten nu?”

²⁹ Ma nyi kemetsa ntsa nzathu na ma luneng, nu ma ketanla ma ccünengla ha khinengkhija sa,

³⁰ “Mathu na atsanqaithu pieya nu pi gishüyale bha keten ketan, ghala kesü nyelela keni na süpahi kesüsü ghena, athsü menkeben tsüna Sisera ghena, athsü yakekhu tsüna kadijja sun kiqhan ghena.”

³¹ Tsalina nghinyithu tsüdila tsüti shü thsülo, O Apvüwa, isala npvüshangthu ya ghani keshhugho ti wegü thsülo! Nu ayyi ciwi amapi jügha kecca na benya.