PENDHENYI 3 - Kemethajüh (N) (Re-editing) Bible (BSI)

Ayyi Ciwi Pen wa kesa Mizzatentithu

¹ Tsalina Apvüwa na Israel nyithu Kanaan wi aghi npi sakenanthu ghan-nan le kesalina mizzatentithu pahan teshi pi ayyi ciwi chitheng.

² Israel nyithu abvüye kesüsü hatuwi aghi npi sakenan nyithu aghikesa cho pi sansi cüa le kesalina ma hati sa.

³ Anyi hathu teshi pi ayyi ciwi theng: Filistin nyunuti manga, Kanaan nyithu tsüdi, Sidon nyithu, nu Hivi nyi Lebanon Yikha wi Baal Yikha Hermon wina wa Hamath Pass kecu wi hang kebenthu.

⁴ Mathu pi Israel ghankenan kesü sa; Israel nyithu na Apvüwa na Mosa wina pi mathu bamyithu kecü yen khukechithu tsü nietenla nye khe chüyale kesalina.

⁵ Tsalina Israel nyithu na Kanaan, Hitti, Amor, Periz, Hivi, nu Jebus nyithu jawi hang wa.

⁶ Mathu na tsüthu ssinu keyali nu tsüthu cenpvüthu kinyi.

Otnniel

⁷ Israel nyithu na Apvüwa mathu Nyizawa tsü teshia; mathu na Baal nu Asherah tsikezhüthu kinyi wa nu sami pi Apvüwa shun.

⁸ Tsalina Apvüwa na Israel miwi aghepvü nu Mesopotamia wi kadimi Kushan Rishathaim yala mathu miwi khangya thsüa. Mathu na ma kekhu wi amapi tazen ben.

⁹ Tsaseng wi Israel nyithu na Apvüwa wi maghala qai, nu ma anyi kesü kesun pi mathu khushiya thsüa. Hawa ha Kenaz cünyu ghanyiwa Kaleb tsa Otnniel.

¹⁰ Apvüwa ghamu na ma miwi gho nu ma Israel ccüliwa sa shagha. Otnniel na aghiwa, nu Apvüwa na Mesopotamia kadimi miwi khangkeya pi ma cüa.

¹¹ Ayyi ciwi amapi jügha kecca na ben, tsaseng wi Otnniel na shüa.

Ehud

¹² Israel nyithu na kheneng sami pi Apvüwa shun. Ha ghena Apvüwa na Moab wi kadimi Eglon sapi Israel miwi khangki thsüa.

¹³ Eglon na Ammon nu Amalek nyithu gwegheya; mathu na Israel chaya nu palm chantonthu nyunutiwa Jerikho tsü nkaya.

¹⁴ Israel nyithu na amapi tagha nu tazen Eglon kekhu wi ben.

¹⁵ Tsaseng wi Israel nyithu na Apvüwa wi maghala qai, nu ma anyi kesü kesun pi mathu khushiya thsüa. Hawa ha Benjamin mizza wi Gera tsa akwen tavüwa kepie nyi Ehud. Israel nyithu na Ehud na aju sen nu Moab wi kadimi Eglon wi walo kesunchi.

¹⁶ Ehud na njünnu ma yiyha ghapeli keben kesie senti meter deni-u kesa kesü khuya. Ma tsü pi ma thsü kekhu ajewa wi khünten pvüya.

¹⁷ Tsaseng wi ma aju khuya nu Eglon kunon ntsa kesawa witsü wa.

¹⁸ Ehud na aju pi Eglon kecü seng wi ma anyi tsüthu pvü kewathu wi ajjen wi whanenglo kiza.

¹⁹ Isala Ehud na Gilgal kete alon pi tsizhüketheng witsü kheneng wa Eglon wi khi, “O kadimiwa! Hi no ghena kekuthi ketsijüh kesü ben le!” Tsalina kadimiwa na ma maghathu wi khi, “Ishinyi ketan ben thsülo!” Nu mathu tsüdi akhemi wi shhua.

²⁰ Kadimiwa na ma ketan keghücüben ajjensha tangwa wi donki keben Ehud na ma wi wa nu khi, “Hi no ghena Anyiza wina ketsijüh kesü ben.” Kadimiwa na shagha.

²¹ Ehud na ma kwen tavüwa pi ma na ajewa njünnu tsü khushiya nu pi kadimiwa pvünon wi kecun chicüa.

²² Njünnu nnuban la dukhia nu ma kethu na tsü mejuya. Ehud na kadimiwa pvü wi tsü khushi meyala nu tsüna asengwa ma ccü keni jü wi shhugho.

²³ Tsaseng wi Ehud na akhemi wi shhuya nu ma sengwa ajenka khenten,

²⁴ nu bvüa. Amaghathu na gho ajjen khen ketheng muya, isala mathu kemeshen kadimiwa na ajjen non wi ben nu mnan benle sa.

²⁵ Mathu na tsüti meshen keben chu ma hie, isala ma ajenka sha nshhugho, tsalina mathu na shakhen khuya nu ajenka shadu. Ciwi mathu pvüwa na ayyi wi qancadu shü keben muya.

²⁶ Mathu na hie keben jü Ehud na bvüya. Ma alon wi hoki ketheng tsü pvüdhi sen nu Seirah wi waya.

²⁷ Ma wa Efraim yyishiphon diyyiwa cukeya wi ma aghi ghena tutuwa khou pi Israel nyithu cichi; nu ma mathu ssinu yyishiphon wi cü.

²⁸ Ma mathu wi kiza, “Hi nie ghalo! Apvüwa na nthu ghinyi Moab nyithu miwi khangkeya pi nthu cüdha.” Tsalina mathu na Ehud nie cüla Moab nyithu na Jordan kepvüdhi ben tsü nkaya; nu mathu na anyi kesüla tsü pvüdhi nwa thsü.

²⁹ Tsü ghanan mathu na Moab nyi süpahi kemehai ntsathu kesüla nbvü thsüla anyi hazar tagha-u pathia.

³⁰ Tsü ghanan Israel nyithu na Moab chaya, nu ayyi ciwi amapi achentazen ccaya.

Shamgar

³¹ Tsü seng wi pendhewa na Anath tsa Shamgar. Ma amesü süpon keku mighe khhatssü kesü pi Filistin nyi meza tugho yathia nu Israel khushiya.