PENDHENYI 19 - Kemethajüh (N) (Re-editing) Bible (BSI)

Levi nyiwa nu ma Wubvü Meshibvüwa

¹ Israel na kadimi npi keben tsü wi Levi nyi kesü na Efraim yyishiphon diyyiwa non wi hangden. Ma Judah yyi Bethlehem wi ghala kesü pi ma wubvü meshibvüwa sale yaya.

² Isala nzawa na ma miwi aghepvü nu Bethlehem wi ma ba jjen wi wha asha mejü ben wa.

³ Tsaseng wi ma wuba na wa ma kejujüh khi nu ma ssi neng ghole sa. Ma ma maghawa nu gada keni ssiya nu wa. Nzawa na Levi nyiwa ssinu ajjen wi gho, nu ma ba na ma mukeya wi anonghe ntsa sa ghola ma ssiya.

⁴ Ma myi na ma ciwi benlo khi, tsalina ma ciwi ghanan kecheng ben wa. Ma wubanyi na ciwi dsajjü nu aghaja ciwi ben.

⁵ Mejü ghanen wi manyi na mitu shagha nu whale kidenya. Isala nzawa ba na Levi nyiwa wi khi, “Atuwa sa pala pahan dsajjüyalo. Tsaseng wina lebencca nu ashina whalo.”

⁶ Tsalina manyi gweghe donki nu dsajjüya. Tsaseng wi ma myi na ma wi khi, “No nchala, lebencca shita hewi ben walo.”

⁷ Levi nyiwa na shagha nu whale kesa wi ma myi na ma cükhen, tsalina ma ciwi kheneng aghaja kesü ben wa.

⁸ Manga ghanen ma mitu na whale sa, isala nzawa ba na khi, “Pala pahan dsajjüya nu aghanan hie ben lalo.” Tsalina manyi gweghe dsajjüya.

⁹ Levi nyiwa, ma wubvü meshibvüwa, nu ma maghawa na whale keshagha wi ma myiwa na khi, “Ghangchilo, khili minu wadha; shita ben lalo. Wan atsajang dugho tendha; lebencca hewi jjen ben lalo. Dhitsü wi mitu na shagha nu ajjen wi kewha ghena kidenya mehai.”

^10-11 Isala anyi tsüwa na ciwi nben neng mvula, tsalina ma nu ma wubvü meshibvüwa manyi na gada keni miwi ki donkiya nu alentsen chia. Minulen wi mathu na Jebus (tsüna Jerusalem) ketsaki wi ghoya, tsalina amaghawa na ma pvüwa wi khi, “Mangkesa na ikhang shita hewi Jebus nyi nyunutiwa wi ha ben wa nsa nu?”

^12-13 Isala ma pvüwa na khi, “Ikhang na Israel nyunuti nkenye wi ngan nten. Ikhang na ha miwi wa nu Gibea nyelela Ramah wi jenden.”

¹⁴ Tsalina mathu na Jebus pvüdhi sen nu wa. Ghani kedulen wi mathu na Benjamin mizza yyi Gibea wi ghoya.

¹⁵ Mathu na alen tsü teshi theng nu aghaja ciwi benle wa. Mathu na anyunutiwa non wi dula atonti wi donki, isala thola ghala ajjen wi benlo mathu nci.

¹⁶ Mathu na ciwi keben wi keqhai kesü na alli wi wa nu khwezilen ciwi gho. Ma aghatsan wi Efraim yyishiphon diyyiwa wina kegho nyi kesü, isala ma khili Gibea wi hangden. (Ciwi keben anyi kepathu na Benjamin mizza wina keghothu.)

¹⁷ Keqhaiwa na anyunutiwa tonti wi kijünyi tsü muya nu ma wi keü, “Nthu na khiewa na gho, nu khiewa waten nu?”

¹⁸ Levi nyiwa na luneng, “Ikhang na Judah yyi Bethlehem wi wale, nu khili ikhang jjen Efraim yyishiphon diyyiwa non wi whatenle. Thola ikhang ssi meya,

¹⁹ ikhang na gadathu tsse amatsi, nu iwubvü meshibvüwa ishinyi nu amaghawa ghena amesa nu kisengtssü lela pvüden. Ikhang na nsenthu keyishü tsüdila ben.”

²⁰ Keqhaiwa na khi, “Nthu ijjen wi ghalo. Hi nthu ssiyaden. Nthu na aghaja he atonti wi nben lalo.”

²¹ Tsalina ma mathu ssinu ma jjen wi wha nu mathu gadathu ghanja cü. Ma kejjenthu na mathu ccü bhu nu dsajjüya.

²² Mathu na ciwi lebencca keben wi anyuti wi kahang nmethala kesathu pahan na wan gho ajjenwa tsü vüya nu ajenka kekha. Mathu na keqhaiwa wi khi, “Anyi no gweghe njjen wi keghowa tsü ssi shhugholo. Ikhang na ma ssimehaiden.”

²³ Isala keqhaiwa na akhemi wi shhu mathu wi khi, “Nyele, ipvüshangthu! Nchala, nkemehai kekuli nu nkemetha hati nsa lalo! Anyi hawa ha na ikejjen saben.

²⁴ Ghangchilo! Hewi ma wubvü meshibvüwa nu inga pvünyimethawa manyi benle. Hi manyi ssi shhugho nthu cüana nthu na manyi pi nthu kenenwa sayalo. Isala anyi hawa miwi ayenwa nkenye kekuli nsa lalo!”

²⁵ Isala anyithu na ma jüh nkina. Tsalina Levi nyiwa na ma wubvü meshibvüwa ssi shhula akhemi wi mathu cüa. Mathu ma messameshü nu ghaja thangthang ma metenmesha sen wa ghanenwa cu.

²⁶ Thangtheghi wi nzawa na gho keqhaiwa jjen ma wuba na keben jenka witsü khuliben. Atsathang keshagha wi la nzawa na ciwi ben.

²⁷ Tsü ghanen ma wuba na wale ajjen sha shhugho ma wubvü meshibvüwa na ajjen khemi wi khuli nu ma kwen chang pi ajenka kedhen keben muya.

²⁸ Ma khi, “Shaghalo, ishinyi wha na.” Isala ciwi ma nlunengla. Tsalina ma nzawa kamang pi gada miwi chipvü nu ajjen wi wha.

²⁹ Ma whala cukeya wi ajjen wi du nu annuza kesü khuya. Ma wubvü meshibvüwa kamang tsü denthi pi taghakeni saya, nu tsü kesüsü pi Israel mizzathu taghakeni kesüsü wi kesunchia.

³⁰ Tsü mukeyathu tsüdila khi, “Israel nyithu na Ejipt teshi nu keshhugho tsathang na gho nansü kecu ithu na pala hati npi sa nyelela npi muya le! Ithu na ha ghena pala pahan kuliden! Khati kesau nu?”