PENDHENYI 17 - Kemethajüh (N) (Re-editing) Bible (BSI)

Mika Tsikezhüthu

¹ Ciwi anyi kesü Mika kesa na Efraim yyishiphon diyyiwa wi hang.

² Ma ma jja wi kiza, “Nyu na nji rükatssü meza taghakhen ghanfüya kesa wi no kishen-keshi pi kaghanfüwa miwi chi. No tsüti kesa hi zaya. Ghangchilo, apisa tsüna hewi benle. Hi tsü khuyale.” Ma jja na khi, “Itsa, Apvüwa na sawegü pi no kecüwa salo!”

³ Ma apisa tsü pi ma jja cü neng nu ma jja na khi, “Kishen-keshi tsü ya itsa miwi nben thsüle kesalina hi rükatssü tsü satemetha pi Apvüwa wi chiben. Achan pi atsikezhü kesü saya nu rükatssü pi tsü mejuyaden. Tsalina hi khili rükatssü tsü pi no cü nengben.”

⁴ Isanu ma rükatssü tsü pi ma jja cüa. Ma jja na rükatssü meza keni sen wa amighe kecüwa cü, anyi tsüwa na achan pi atsikezhü kesü saya nu rükatssü pi tsü mejuya. Nu tsü pila Mika jjen wi theng.

⁵ Mika hana ma ketanla ma kekinyipen kesü ben. Ma atsikezhü pahan nu adepfü kewhengthsü kesü saya, nu ma tsa kesü pi keqhaikediwa sa thsü.

⁶ Tsü tsüwi Israel wi kadimi nmi; anyi tsüdila ma kenenwa tsü sa.

⁷ Tsü tsüwi Levi nyi pvüza kesü na Judah wi Bethlehem nyuti wi hangden.

⁸ Ma Bethlehem teshi nu ma kahang pen kepa wi bha wa. Ma Efraim yyishiphon diyyiwa wi Mika jjen wi ghoya.

⁹ Mika na ma keü, “No khiewa na gho nu?” Ma khineng, “Hi Levi nyi kesü Judah wi Bethlehem wina ghole. Hi kahang pen kesü bha tenle.”

¹⁰ Mika na khi, “Hi gweghe benlo. Hi kesansiwa nu keqhaikediwa salo, hi amapi kesü wi rükatssü tagha, athsümeni, nu kedsakejjü pahan tsüti pi no cü na.”

¹¹ Levi nyi pvüzawa na Mika gweghe ben wa nu ma tsa kesü ti sa wa.

¹² Mika na ma pi ma keqhaikediwa sa, nu ma Mika jjen wi hang.

¹³ Mika na khi, “Hi khili Levi nyi kesü pi hi keqhaikediwa sayadha, tsalina Apvüwa na pala tsüdi wi hi yala mehaiya thsüben kesa hi chüben.”