PENDHENYI 16 - Kemethajüh (N) (Re-editing) Bible (BSI)

Samson na Gaza wi Keben

¹ Samson na ghanan kesü Gaza wi wa nu ciwi keqheza menkedsa nza kesü metuya. Ma aghaja ciwi wa nzawa manyi gweghe jen.

² Gaza nyunuti wi anyithu na Samson na ciwi benle kesa chüya nu mathu na wala aghaja thangthang apen tsü vüya nu anyunuti kaghapeng jenka wi ma hieben. Mathu na aghaja thangthang apen nketsenla hie nu khi, “Ithu na atsan npi kethang chu ma hie benla nu ma pathi cüden.”

³ Isala Samson na aghaja non kecu ketan ciwi jen. Tsaseng wi ma shaghala anyunuti kaghapeng jenka, adonbvü, nu shakhenji mabenla zanshiya. Ma tsüthu pi ma depfü miwi chi pvüya nu yyishiphon shoni wi Hebron kaghape wi wa.

Samson Nu Delila

⁴ Ha seng wi Samson na nza kesü Sorek yyiketijü wi hang ketenwa ma nyan Delila nenya.

⁵ Filistin kadimithu manga na nzawa wi wa nu khi, “Samson mechu pi ma khati kesa na zü ntsawa nu ithu na khati nu ma miwi khangya, ma bhen nu ma pashayaben khe no kiza thsülo. Isathu ithu meshu kesüsü wi rükatssü meza taghakhen khen pi no cüaben.”

⁶ Tsalina Delila na wa Samson wi keü, “Nchala, mangwa na no sapi zü ntsa sa thsüben khe hi kizalo. Keujüla anyi pahan na no bhen nu no pashaya mvu lethu, ma khati sathu mehaiben nu?”

⁷ Samson na luneng, “Keujüla mathu na aghazi ketheü npi kegen teggü pi hi bhen lethu, hi la nyu kepa wi ti nzüla ben.”

⁸ Tsalina Filistin kadimithu na aghazi ketheü npi kegen teggü sengho Delila cü, nu ma tsü pi Samson bhen.

⁹ Anyi pahan na ajjen keshondhi kepawa ben nu hieben, tsalina ma jishachi, “Samson! Filistin nyithu na gho tendha le!” Isala ma anni na anan kemecangdhi ti aghazi tsü pvüdhi pia. Tsalina mathu na khili lela ma kekuthi kezüwa tsü chüshi meya.

¹⁰ Delila na Samson wi kiza, “Ghangchilo, no hi mechu nu atsentsawa hi nkizale. Khili nyu khati nu no bhenya mehai khe hi kizalo.”

¹¹ Ma nzawa kiza, “Keujüla mathu na ali ketheü npi kesenji pi hi bhen lethu, hi la nyu kepa wi ti nzüla ben.”

¹² Tsalina Delila na ali ketheü pahan khuya nu pi ma bhen. Tsaseng wi ma jishachi, “Samson! Filistin nyithu na gho tendhale!” Anyi pahan na ajjen keshondhi pahanwa ben nu hieben. Isala ma anan ti ali tsü pvüdhia.

¹³ Delila na Samson wi kiza, “No khilila hi mechu nu atsentsawa hi npi kizale. Nyu khati nu no bhenya ben khe hi kizalo.” Ma nzawa kiza, “Keujüla no ilissen kemshü tagü tsü pi ada wi deghu nu kecetenji kesü pi tsüthu ceten lethu, hi la nyu kepa ti nzüla ben.”

¹⁴ Tsaseng wi Delila na ma ssitejen, nu ma lissen kemshü tagü tsüpi ada wi deghu. Ma kecetenji kesü pi ceten nu jishachi, Samson! Filistin nyithu na gho tendhale! Isala Samson na shagha nu ada wi deghu ketheng wi ma lissen tsü zanya.

¹⁵ Tsalina Delila na Samson wi khi, “No nleben pi hi ncü lethu, khati nu no hi nenbenle khiya mehai nu? No khili ha kecheng tughu hi mechudha, no khilila mangwa na no sapi zü ntsa sa thsüben khe hi npi kizale.”

¹⁶ Ma ghanan kaghapengla Samson wi tsü keüki sa wa. Samson na tsü nkina chala nu ma lisaghangya kesalina

¹⁷ ma asakhen wi atsentsawa pi nzawa kiza. Ma khi, “Kutitanla ilissen npi cah, hi pvüghakeya ghanan wina hi pi Nazirit nyi kesü sala satemetha pi Anyiza wi chidha. Keujüla ilissen cah lethu, hi kezü nmila nu hi la nyu kepa wi ti nzüla ben.”

¹⁸ Delila na Samson atsentsawa ma kizadhale kesa chükeya wi ma ketsijüh kesun pi Filistin kadimithu wi chi nu khi, “Kuti hewi gho nenglo. Ma atsentsawa hi kizadhale.” Isanu mathu na apisa sen nu gho.

¹⁹ Delila na ma phedhi miwi na Samson ssitejen, nu anyi kesü cichi nu Samson lissen kemshü tagü tsü cethi thsüa. Tsaseng wi ma Samson metenmesha wa, kepaghenanye ma kezü nmiladha.

²⁰ Isanu ma jisha, “Samson! Filistin nyithu na gho tendha!” Ma shagha nu meshen, “Hi kheni-ghanie ti shagha nu bvü cüden.” Ma Apvüwa na ma teshi kesa tsü nchü.

²¹ Filistin nyithu na ma ghanya nu ma nyon keni qho kehoshi pia. Mathu na ma ssisen Gaza wi wa lezza ssüle pi ma bhen nu pi atssüzüsa nu asu kenyeggü pen wi kekuli sa thsü.

²² Isala ma lissen cah pi kesa tsüna shigü shhugho bendha.

Samson Keshü

²³ Filistin kadimithu na kemetuli nu anonkeghe sala mishu nu ahhansha sapi mathu cenpvü Dagon cü. Mathu na akhwisa, “Ithu cenpvü na ithu ghinyiwa Samson miwi khangkeya pi ithu cüdhale!”

^24-25 Mathu na anonkeghe saben, tsalina khi, “Samson cichilo, nu ma yala ithu ghena kekiponli sa thsü na!” Mathu na atssüzüjjen wina Samson ssi kegho wi ma ya mathu ghena kekiponli sa thsü, nu ma pila adonbvü keni jüwi ngan thsü. Anyithu na ma mukeya wi mathu cenpvü keseng khwisa: “Ithu cenpvü na ithu ghinyiwa ithu yyi yasa nu anyi kejon pathi kesawa miwi khangkeya pi ithu cüdha!”

²⁶ Samson na pvüzanyi ma kwen zansen ketenwa wi kiza, “Hi yala adonbvü ajjen tsü zanghu sen kebenthu tsü paya thsülo. Hi tsüthu miwi kelekiya mvu benle.”

²⁷ Anyitenti nza npvüzathu na ajjen tsü pongben. Filistin kadimithu manga tsüdi, nu anyi nza npvüza hazar kecheng na ajjen miwi ben nu Samson na mathu ghena kekiponli tsü ghangben.

²⁸ Tsaseng wi Samson na kekhie sa, “Kekhang ntsawa Apvüwa, nchala hi meshenchilo. O Apvüwa, khili ha hi kezü kutitan pi hi cü neng chilo kesa kekhie saben; isanu hi ya Filistin nyithu na inyon keni kehoshi kesathu miwi kuti ajukhiya yathsüle kesalina.”

²⁹ Tsaseng wi Samson na ajjen donbvü anonwa keni ajjen zungki sen keben tsü pie kiya. Ma kwen kesüsü pi adonbvü kesüsü tsü zanghuya

³⁰ nu jisha,, “Hi ya Filistin nyithu gweghe shü thsülo.” Ma apitsü ntsa nu adonbvü pashü, nu ajjen na kadimithu manga nu anyi tsüdi miwi qanca dughoa. Samson na ma keshü wi anyi kepathi na ma hang keben tsü wi kepathi miwi jia.

³¹ Ma cünyu nu ma theghithu na ma kamang khuyale gho. Mathu na ma kamang sen wa Zorah nu Estoal manyi jüwi ma ba Manoa shüjjen wi vhüa. Ma amapi ngwe Israel ccüliwa sa.