PENDHENYI 15 - Kemethajüh (N) (Re-editing) Bible (BSI)

¹ Matsü pahan seng wi awhengsu kewwi tsü wi Samson na aneni zza kesü khuya nu ma wubvü hhainan wa. Ma ma wubvü ba wi kiza, “Hi iwubvü kejenpen wi du tenle.” Isala ma wubvü ba na ma ya ciwi ndu thsü mvu.

² Ma Samson wi kiza, “Hi no ntsakhiwa ma nanmeghü benle meshen, tsalina hi ma pi npvüshangwa cüdha le. Isala ma pvünon ghanyiwa na ma miwi atsimehai le. No ma yayalo.”

³ Samson na khi, “Hi khili Filistin nyithu miwi mangwa sa chiten khe tsüna imiwi nyedha.”

⁴ Tsalina ma wa whewhe meza kecheng ghanya nu kenini pi ma ghanu kemisükili cü. Isanu ma nnithegü pi mathu ghanu tsüdi wi bhenki cü.

⁵ Ma anni pi nnithegü tsü canki chicü nu whewhethu ssi wa Filistin nyithu lli wi lisha chicüa. Hatinu ma awhengsu kewwi seng ketan nyela npi kewwi ngan kebenthu, kemeshentsse nu Oliv jathu la mecang chia.

⁶ Filistin nyithu na thowa na hati sa nu kesa keü kewa wi mathu na Samson na le kesa chüya, kepaghenanye Samson myi Timnah wina keghowa na Samson wubvü pi ma pvüshangwa cü kesalina. Tsalina Filistin nyithu na wa nzawa tsü pi mecangthi nu ma ba jjen la mecang.

⁷ Samson na mathu wi kiza, “Nthu na hati kekuli ghena hi nthu miwi ajukhi npi keya chu teshi nten.”

⁸ Ma aghepvü ntsa mathu ssisa nu mathu kejon pathia. Isanu ma wa Etam wi alonshi ku wi ben wa.

Samson na Filistin nyithu Chakeya

⁹ Filistin nyithu na gho Judah wi kemnanpen sa, nu Lehi nyuti tsü ssikaghashen.

¹⁰ Judah nyithu na mathu wi keü, “Nthu mangkesa na ithu ssikaghashenle ben nu?” Mathu na luneng, “Ithu na atssüzüwa Samson tsü ghanyale ghoben, nu ma ithu miwi sa kechi ti ithu la ma miwi sachi cüaden.”

¹¹ Tsalina Judah nyi hazar kecheng na wa Etam wi alonshi ku wi Samson wi khi, “Filistin nyithu na ithu miwi kekhang sen keben tsü no nchü kwe? No ithu miwi mangwa sathengdha nu?” Ma luneng, “Mathu na imiwi sa kechi ti hi mathu miwi sachi cüle.”

¹² Mathu na ma kiza, “Ithu na no bhenya nu pi mathu kwen wi chiale hewi ghoben.” Samson na khi, “Nthu na hi pathi nbenle khi kishenlo.”

¹³ Mathu khi, “Anle, ithu na no pathi nben, isala no bhenya nu pi mathu kwen wi chi kesa ketanle.” Tsalina mathu na ali ketheü keni pi ma bhenya nu alonshi ku wina ma ssineng gho.

¹⁴ Ma Lehi wi ghokeya wi Filistin nyithu na magha sen nu ma wi bvügho. Zuli Apvüwa kekhang na ma satezü cü, nu ma ali pi ma hacü bhenketheng tsü pvüdhi nu ma kwen kebhen tsüna anni pi anan kemecang ti qanca.

¹⁵ Tsaseng wi ma gada hajü keshü khakhagü kesü muya. Ma tsü khuya nu pi anyi hazar kesü kihhethia.

¹⁶ Tsalina Samson na akhwisa, “Hi gada khakhagü kesü pi anyi hazar kesü kihhethi cü; Gada khakhagü kesü ghena hi mathu pie gho pi abhon sa.”

¹⁷ Tsaseng wi ma gada khakhagü tsü pi khala. Hati kesa pen tsü pi Ramath Lehi le cia.

¹⁸ Tsaseng wi Samson na dighe ntsa saya nu ma Apvüwa cichi nu khi, “No khangkeya kedi ha pi hi cüdha. Hi khili dighethi shü wa tendha, nu Anyiza nkechüthu ya hi ghanya thsüa tendha kwe?”

¹⁹ Tsaseng wi Anyiza na Lehi wi ayyiku kesü sha chi nu ciwi atssü ya shhugho thsü. Samson na tsü jjüya nu ma züpfüya. Tsalina atssükebvüpen nyan tsü pi Hakkor le cia; tsüna khilila Lehi wi ben.

²⁰ Filistin nyithu na ayyi ciwi kekhang sen nu keben wi Samson na amapi ngwe Israel ccüliwa sa.