PENDHENYI 14 - Kemethajüh (N) (Re-editing) Bible (BSI)

Samson nu Timnah wi Ghalawa

¹ Ghanan kesü Samson na Timnah wi cü nu Filistin ghala kesü metuya.

² Ma ajjen wi wha ma ba ma jja kiza, “Timnah wi Filistin ghala hi nen ntsa kesa kesü benle. Ma yapi iwubvü saya thsülo. Hi ma yamvu benle.”

³ Isala ma bajja na ma wi keü, “No mangkesa na Anyiza nkechü nyi Filistin nyithu wi awubvü yamvu ben nu? No ithu nyi jawi itheghi gei wi ghala kesüla muya nben kwe?” Isala Samson na ma ba wi khi, “No ma yapi hi cü thsü mvu kebenwa nza tsüna hawa hale. Hi ma nen ntsa saben.”

⁴ Ma bajja na Apvüwa na Samson ssi wa hati sa thsü keben tsü nchü, kepaghenanye Apvüwa na Filistin nyithu ssisa thsüle kesa matsüwa tsü ghangben. Tsü tsüwi Filistin nyithu na Israel miwi kekhang senben.

⁵ Tsalina Samson na ma bajja ssinu Timnah wi cü. Mathu na kemeshentsse lli pvüdhiwa keten wi ma ssensitemi zza kaghamo hhai zaya.

⁶ Zuli Apvüwa kekhang na Samson satezü cü, nu ma kwen kivü pi aneni zza ti ssensitemi tsü zandhi-zanghe pia. Isala ma mangwa sa khe pi ma bajja nkiza.

⁷ Tsaseng wi ma wa ghalawa ccüneng nu ma nenya.

⁸ Atsathang pahan seng wi Samson na ma yaya le wa. Ma alen wi wa keten ma hatu wi ssensitemi pathi ketheng tsü ghangchi nanle wa, ssensitemi kamang non witsü anikho tenti kedi kesü na sa, nu anikholi keben tsü mu pi ma mansa.

⁹ Ma ma kwen pi anikholi hhanshiya nu ma kewalen sala tsü dsa. Ma tsü pahan sen wa ma bajja cü. Manyi la tsü dsa, isala Samson na ma ssensitemi kamang non wi anikholi tsü khushiyale kesa manyi nkiza.

¹⁰ Ma ba na ghalawa jjen wi wa, nu Samson na ciwi kemishu kedi sachi, tsüna kepvünyithu jawi sa keten yen kesü.

¹¹ Filistin nyithu na ma mukeya wi mathu na kepvünyi changha kesun pi ma gweghe ben thsü.

^12-13 Samson na mathu wi khi, “Hi ya nthu wi ajüh jjügi kesü khi thsülo. Keujüla kemishu ghanan tagü jüwi nthu na ma jjügi tsü pi hi kiza lethu, hi linen thsümeni kemehai changha pi nthu cüaben. Isala nthu na ma jjügi pi hi kiza meyala lethu, nthu na tsü makesü pi hi ncüthu yishü.” Mathu na khi, “Njüh jjügi tsü pi ikhang kizalo. Ikhang na tsü kina nan na.”

¹⁴ Ma khi, “Ghandsa ketenwa wina dsaya keten pahan shhugho; Kezüwa wina keminnun pahan shhugho.” Ghanan kecheng seng wi lela mathu na ajüh jjügi ha ma jjügi chüshi meyala.

¹⁵ Mejü ghanan wi mathu na wa Samson wubvü wi khi, “Nwuba mechu pi ajüh jjügi tsü mangwa khe khi pi ikhang kiza thsülo. Nyelethu, ikhang na anni pi nba jjen wi chi nu no pi mecanghu cüden. Nshinyi na ikhang cipi hewi chi nu ikhang tengdsa le sa nben kwe?”

¹⁶ Tsalina Samson wubvü na ma wi wha nu khi, “No hi tizen nden! No hi nanmeghüden! No ajüh jjügi kesü khi pi ipvüshangthu kiza theng, isala no ma jjügi pi hi nkiza le.” Ma khi, “Ghangchilo, hi tsüpi ibajja ccüla nkiza le. Hi mangsale tsüpi no kiza nu?”

¹⁷ Nzawa na kemishu ghanan tagü chuli tsü ghena qai. Tsalina ma tagü ghanan wi ajüh jjügi tsü khi pi nzawa kiza, kepaghenanye ma tsü khipi ma tügüwa kesalina. Tsaseng wi nzawa na kheneng wa tsü jjügi khi pi ma Filistin nyithu kiza.

¹⁸ Tsalina tagü ghanan wi Samson na kejenpen wi npi kedu wi anyunuti wi anyithu na ma wi gho nu khi, “Anikholi miwi mangwa minnun nu? Ssensitemi kesü miwi mangwa zü nu?” Samson na lunneng, “Keujüla nthu na imesü ssinu alli nchhü lethu, nthu na khilila tsü jjügi khiya nkesa le.”

¹⁹ Tsaseng wi Apvüwa kekhang na wan ma satezü cü, nu ma Ashkelon wi cü ciwi anyi changha pathi nu mathu thsümeni kemehai tsü bhu sengho nu pi anyi ajüh jjügi khiya kesathu tsü cüa. Tsaseng wi ma tsü ghena ma leben minu ntsa sa nu ma jjen wi wha.

²⁰ Nu Samson wubvü pila keshanyi wi anyi ma pvüshang ntsa kesawa cüa.