Biblia Todo Logo
Bìoball air-loidhne

- Sanasan -

PENDHENYI 13 - Kemethajüh (N) (Re-editing) Bible (BSI)


Samson Kepvügha

1 Israel nyithu na kheneng sami pi Apvüwa shun, nu ma Filistin nyithu yala amapi jügha mathu miwi kekhang sen thsü.

2 Tsü tsüwi anyi kesü Zera nyu wina keghowa ma nyan Manoa na ben. Ma Dan mizza nyi kesü. Ma wubvü na atsa npvügha.

3 Apvüwa nyilo na nzawa tuwi gho nu khi, “No atsanga pvügha meya, isala no wan atsa-npvüya nu atsa kesü pvügha yaben.

4 Kisengtssü nyelela azü njjüla nyelela atsse nkemetha katsüha ndsala metsilo;

5 nu no ntsawa tsü kepvügha seng wi ma lissen ncahla, kepaghenanye ma pvüghakeya nten na ma sametha pi Anyiza wi chi nu Nazirit nyi kesü saben. Ma Filistin nyithu kwen wi Israel kekashayale kesa ghena kekuli sa shaghaben.”

6 Isanu kinyibvüwa na wala ma wuba wi kiza, “Anyiza nyi kesü hi wi ghole, nu ma Anyiza nyilowa ti ghang pi qhethiketen kesale. Ma khie wa na gho khe hi ma nkeü nan, nu ma ma nyan pi hi nkiza.

7 Isala ma hi atsa- npvüya nu atsa kesü pvüghaya benle kiza. Ma hi kizala kisengtssü nyelela azü njjüla nyelela atsse nkemetha katsüha ndsa lalo, kepaghenanye pvüzanyiwa tsü sametha pi Anyiza wi chi nu ma hang keben chu Nazirit nyi kesü saten le.”

8 Tsaseng wi Manoa na Apvüwa wi khie, “Apvüwa, no Anyiza nyi kesun kechiwa tsü ya ishinyi wi gho neng thsü nu ishinyi na atsa pvüghakeya wi ma ghena mangwa nsathu yishü khe pi kiza thsülo.”

9 Anyiza na Manoa kekhie ti sa cü, nu ma nyilowa na nzawa na alli wi donki keben wi ma wi gho neng thsü. Ma wuba Manoa na ma gweghe nmi,

10 tsalina ma wan bvü wa ma kiza, “Ghangchilo! Anyi ghanan kesü hi wi keghowa tsüna hewi gho neng benle.”

11 Manoa na shagha nu ma wubvü nie wa. Ma anyi tsüwa wi wa nu keü, “No anyi iwubvü keccünengwa tsü kwe?” Ma luneng, “Anle, hi le.”

12 Tsaseng wi Manoa na khi, “Isalethu, kusi njüh tsü ntsakhiwa cenya khe ma khati saben nu? Ma kahang wi kekuli khati saben nu?”

13 Apvüwa nyilowa na luneng, “Nwubvü ya hi ma kekiza jüh tsüdila sa metsilo.

14 Ma kemeshentsse ton wina keshhugho mangla ndsala, ma kisengtssü nyelela azü njjüla nyelela atsse nkemetha katsüha ndsala. Ma hi ma kekiza jüh tsüdila saben.”

15-16 Manoa na tsüna Apvüwa nyilo le kesa nchüla ma wi khi, “Nchala, nbvüla ben lalo. Wa aneni zza kesü pathi pi nghena atsse sachi ten na.” Isala nyilowa na khi, “Keujüla hi ngan benla lela hi nthu tsse tsü dsa nbenle. Isala no tsü kiden-kesha mvu lethu, tsü mecang pi Apvüwa wi kekinyi sa chilo.”

17 Manoa na luneng, “N-nyan pi ishinyi kizalo, isanu njüh tsü sacen lethu, ishinyi no kinyikü thsüle kesalina.”

18 Nyilowa na keü, “No mangkesa na inyan chüya mvuben nu? Tsüna anyan amankesa kesü le.”

19 Tsalina Manoa na wa aneni zza kesü nu asu pahan khuya nu tsüthu pi kekinyipen lonshi miwi Apvüwa kinyi. Manoa nu ma wubvü manyi na ghang keben wi Apvüwa na amankesa kuli chi.

20-21 Annikeqhe na kekinyipen wina tangwi ki keben wi, Manoa nu ma wubvü manyi na Apvüwa nyilowa na annikeqhe wina tangwi ki keten mu. Tsaseng wi Manoa na anyi tsüna Apvüwa nyilo le chüya nu ma nu ma wubvü manyi mmi zan ncüggü pi ayyi wi ghang wa. Manyi na tangnyilowa tsü nmu nengla.

22 Manoa na ma wubvü wi khi, “Ishinyi na shüa tendha, kepaghenanye ishinyi na Anyiza mudha.”

23 Isala ma wubvü na luneng, “Keujüla Apvüwa na ishinyi pathi mvu lethu, ma ishinyi kekinyi tsü ya nkesale; ma hathu tsüdi pi ishinyi ccüca nkesa nyelela ha tsü wi pala hathu pi ishinyi kiza nkesale.”

24 Kenyipvüwa na atsa kesü pvüghaya nu ma nyan pi Samson ciya. Atsawa na qhai shagha nu Apvüwa na sawegü pi ma cü.

25 Ma Dan kemnanpen wi Estaol nu Zorah manyi jüwi keben wi Apvüwa kekhang na ma satezü shagha.

Rengma (N) (Re-editing) Bible - Kemethajüh (N) 

Copyright © 2016 by The Bible Society of India

Used by permission. All rights reserved worldwide.

Bible Society of India
Lean sinn:



Sanasan