PENDHENYI 1 - Kemethajüh (N) (Re-editing) Bible (BSI)

Judah nu Simeon Mizzathu na Adonibezek Ghankeya

¹ Joshua keshü seng wi Israel nyithu na Apvüwa wi keü, “Ithu mizzathu khawa na atuwa sala wa Kanaan nyithu ssikaghashen nu?”

² Apvüwa na luneng, “Judah mizza na atuwa waben. Hi ayyi tsüpi mathu kwen wi chiaben.”

³ Judah nyithu na Simeon nyithu wi khi, “Ithu gweghe ayyi pi ithu cü ketheng witsü wa nu ithu gweghe Kanaan nyithu ssikesalina. Tsaseng wi ithu na nthu gweghe ayyi pi nthu cü ketheng witsü wa na.” Tsalina Simeon

⁴ nu Judah mizzathu gweghe aghi wi wa. Apvüwa na Kanaan nu Periz nyithu miwi khangkeya pi mathu cü, nu mathu na Bezek wi anyi hazar tagha chaya.

⁵ Mathu na ciwi Adonibezek muya nu ma ssisa.

⁶ Ma bvüa, isala mathu na ma jügü wa ma ghanya, nu mathu na ma kwenshenpfü nu ma ccüshenpfü denthia.

⁷ Adonibezek na khi, “Kadimithu achentagü na mathu kwenshenpfü nu ccüshenpfü denthi nu hi miz cakhu wi qanca-qanlathu ghaka le. Hi mathu miwi sa kechi ti Anyiza na khili imiwi sa chidha.” Ma ssinu Jerusalem wi wa nu ma ciwi shüa.

Judah Mizza na Jerusalem nu Hebron Nkakeya

⁸ Judah nyithu na Jerusalem ssikaghashen nu tsü nkaya. Mathu na anyithu pathi nu anni pi anyunutiwa tsü mecang chia.

⁹ Tsaseng wi mathu na wa Kanaan nyithu yyishiphon diyyiwa wi yyishiphon ccü nu acülawa diyyi kekiqha wi hang kebenthu ssisa.

¹⁰ Mathu na lentsen wa Hebron pi Kiriath Arba le khi keten nyunutiwa wi kahang Kanaan nyithu ssisa. Ciwi mathu na Sheshai, Ahiman, nu Talmai geithu chaya.

Otnniel Na Debir Nyunutiwa Nkakeya

¹¹ Judah nyithu na lentsen wa tsü tsü wi pi Kiriath Sefer le khi keten nyunutiwa tsü ssisa.

¹² Mathu jawi meshu kesü Kaleb le ci ketenwa tsüna khi, “Hi inga Akhsa pi anyi thowa na Kiriath Sefer nkaya khe ma wubvü sa thsüaben.”

¹³ Kaleb cünyu ghanyiwa Kenaz tsa Otnniel na anyunutiwa tsü nkaya, tsalina Kaleb na ma nga Akhsa pi ma wubvü saya thsüa.

¹⁴ Keshanyi tsathang wi Otnniel na ma ya wa ma ba wi alli kesü khielo khi. Ma gada miwi na cadugho nu Kaleb na ma mangwa yamvu ben nu keü.

¹⁵ Nzawa na luneng, “No ayyi pi hi kecü tsüna diyyi kekiqha wi ghena; hi atssükebvüpen wi yamvu ben le.” Tsalina Kaleb na atssükebvüpen meiwa nu ssanwa tsü pi ma cüa.

Judah nu Benjamin Mizzathu na Khangkeya

¹⁶ Mosa myiwa Ken nyi shicübvüghathu na Jerikho, palm tonthu nyunutiwa wina Judah nyithu gweghe Judah yyi wi Arad na acülawa diyyi kekiqha wi wa. Mathu ciwi Amalek nyi jawi hang wa.

¹⁷ Judah nyithu na Simeon nyithu gweghe wa, nu mathu gweghe Kanaan nyi Zefath nyunuti wi hang kebenthu tsü chaya. Mathu na kishencü pi anyunutiwa tsü miwi chi nu tsü yasa, nu ma nyan pi Homah cia.

^18-19 Apvüwa na Judah nyithu kiqa nu mathu na yyishiphon diyyiwa tsü yapi mathu ji saya. Isala mathu na Gaza, Ashkelon, nyelela Ekron pi mathu kevü wi ayyithu nka meyala. Anyi hathu na atssükaten wi hang nu mathu na amighe gorugarithu ben, tsalina Judah nyithu na mathu jügüshi meyala.

²⁰ Mosa na kekhi ti Hebron tsü pi anyunuti tsüwa wi Anak shicübvügha agei kecheng jügüshi kesawa Kaleb cüa.

²¹ Isala Benjamin mizza nyithu na Jerusalem wi hang keben Jebus nyithu jügüshi meyala, nu Jebus nyithu na tsü nten na ciwi Benjamin nyithu gweghe hangben.

Efraim nu Manasseh Mizzathu na Bethel Nkakeya

^22-23 Efraim nu Manasseh mizzathu na Bethel, tsü tsü wi pi Luz le ci keten nyunutiwa tsü ssikaghashen wa nu Apvüwa na mathu kiqa cü. Mathu na wahhaithu kesun pi anyunutiwa wi chi,

²⁴ mathu na anyi kesü anyunuti wina shhugho keten muya nu ma wi khi, “Anyunutiwa wi kedulen pi ikhang kizalo, isathu ikhang no patena nben.”

²⁵ Tsalina ma alen khipi mathu kiza, nu Efraim nu Manasseh nyithu na anyi tsüwa nu ma theghi ketan khe anyunuti wi anyi tsüdi pathia.

²⁶ Anyi tsüwa na Hitti yyi wi wa nu anyunuti kesü saya, nu tsü nyan pi Luz ci, tsüna nansü lela tsü nyan saben.

Israel Nyithu na Jügüshi Meyalakesa Nyithu

²⁷ Manasseh mizza na anyunutithu Beth Shean, Taanak, Dor, Ibleam, Megiddo, nu tsü kevü anyunutithu wi hang keben anyithu jügüshi meyala; Kanaan nyithu na ciwi hang ben wa.

²⁸ Israel nyithu na zü kayi keshagha wi Kanaan nyithu meten pi mathu kekuli sa thsü, isalela mathu tsüdila jügüshi meya khila.

²⁹ Efraim mizza na Kanaan nyi Gezer nyunuti wi hang kebenthu jügüshi meyala, tsalina Kanaan nyithu na ciwi mathu gweghe hang ben wa.

³⁰ Zebulun mizza na anyunutithu Kitron nu Nahalal wi hang keben nyithu jügüshi meyala; tsalina Kanaan nyithu na ciwi mathu gweghe hang ben wa, nu meten pi mathu kekuli sa thsü.

³¹ Asher mizza na anyunutithu Akko, Sidon, Ahlab, Akhzib, Helba, Afek, nu Rehob wi hang keben nyithu jügüshi meyala.

³² Asher nyithu na ciwi kahang Kanaan nyithu gweghe hang ben wa, mathu jügüshi meyala kesalina.

³³ Naftali mizza na anyunutithu Beth Shemesh nu Bethanat wi hang keben nyithu jügüshi meyala. Naftali nyithu na ciwi kahang Kanaan nyithu gweghe hang ben wa, nu meten pi mathu kekuli sa thsü.

³⁴ Amor nyithu na Dan mizza nyithu jügü pi yyishiphon diyyiwa wi bvü thsüa, nu mathu ya deshentijü wi ndugho thsüla.

³⁵ Amor nyithu na Aijalon, Shaghalbim, nu Here Yikha wi hang ben wa, isala Efraim nu Manasseh mizzathu na Amor nyithu pi mathu kekhang kekhu wi ben thsü nu meten pi mathu kekuli sa thsü.

³⁶ Amor nyi ggü na Akrabbim Pass pvüdhi sen Sela na aghawa shuben.