NONKEGÜ 4 - Kemethajüh (N) (Re-editing) Bible (BSI)Jerusalem Keqanca sengwi 1 Ithu suna kewegü na jangdha; Kekinyijjen wi alonthu na alentonti wi khuli zighedha. 2 Zion wi kepvünyithu na ithu ghena suna menkedhu ti kesa nan, isala khili pi ayyipfü jümuthu ti sadha. 3 Adenni bvü lela ma zzathu ghanjaden, isala inyithu na awaketiwa ti mathu tsangathu tuwi daggüden. 4 Mathu na memethu ya ghama nu dighethi shü thsüden; ghanyithu na thola pi mathu cü nketen tsse tsü khieben. 5 Anyithu kuti tsüwi atsse kinyan ntsa dsa ketenthu na alentonti wi khhwenthiben; meshumenna ntsa hang keshaghathu na bhanieku jjü nu atsse bha wadha. 6 Inyithu na Sodom wi kahangthu zulila Anyiza kwen wi keqanca metukeyathu miwi la kemeten muyadha. 7 Ithu kaditsathu na meyasa nu metha pi aghola ti khang nu zü, agwo mehai pi wegüchang kesa. 8 Khilitsü alentonti wi nyu nchüla khuliben, mathu mmi na mankade shüben; mathu hyu na qha pi achan ti cügho pi mathu gü mejudha. 9 Aghi wi keshüthu tsüna hasenkhen wi keshüthu miwi mehaiki, mathu na khhwenthi nu ashina shü, atsse na mathu sapi hang meyala. 10 Ketizenkesa na qhethiketen kesa sengho inyithu miwi chi; ajjathu na mathu ghali keten tsangathu pi wen pi atsse mithon sa dsa. 11 Apvüwa na ma lebenketsu maben lishachi; ma Zion wi anni canki nu tsü mecang pi ayyi wi chia. 12 Khiewila anyi kesüla, asang mizzatenti kekhang kesenthu lela nmi, nkaketenthu na Jerusalem kaghapeng-jenka wi duyaben kesa n-nondisha. 13 Isala ma tusenjüh-kechüthu na sami, nu ma keqhaikedithu na nkesazzithu pi shü thsü kesalina hati sa. 14 Ma ccülikesathu na anyon nkemu nyithu ti alentonti wi kegoe deja, isanu ajjü pi nyen pvü nu thola mathu kidhen nben. 15 “Anyithu na jisha. Bvülo! Nthu nakhidha! Hi nkidhenla!” Tsalina mathu na kegoe sennu mizzatenti kesü wina kepa wi wa lela thola mathu ssi meya. 16 Apvüwa na mathu ghena kemeshen mangla nmidha; ma mathu jügü zighedha. Ma ithu keqhaikedithu nu accülikesathu cüki kemeshen pi nccüca. 17 Ithu na kekiqa khiewila gho nketen tsü nkaghangcha chu ghangden. Ithu na mizzatenti kesü mangla khuchiya nkesawa wi kekiqa tsü hie gho. 18 Ghinyiwa na ithu cwen ben; ithu na lentonti wi lela lentsen meyala. Ithu tsathangthu na cendha; asakhen na ghodha. 19 Amumuthu na tangwi na ju dugho keten miwi mbhiki, mathu na ithu jügü dugho. Mathu na yyishiphon thu wi ithu zanshaya; ithu meshen nkeben wi mathu na ayyikeshü wi ithu ghanya. 20 Mathu na ithu kahang bvüwa, Apvüwa na kessikeya kadimiwa, nkakeghothu tsüdi wi ithu khweya benle kesa ithu na nondi ketenwa tsü ghanya. 21 Edom nu Uz nyithu, keqhelo; nthu na saya kemehai keben wi nongya. Nthu ghena ketizenkesa la gho tendha; nthu la kejüghekeya wi kemissü kulukhukhu saben. 22 Zion na ma kesami ghena muyadha; Apvüwa na ithu pi kushiyyi wi pen neng thsü nbendha. Isala Edom, Apvüwa na no meten cüaben. |
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
Bible Society of India