NONKEGÜ 3 - Kemethajüh (N) (Re-editing) Bible (BSI)

Kemeten, Leben khapeghekeya, nu Kaghang

¹ Anyiza na kemeten pi cü keten tsüna mangwa khe hi chüben.

² Ma hi jügü pi kejang wi dhu pfü pfü chia,

³ Nu ma nanketizen nkemi kwenshen pi hi shunla shun neng cü.

⁴ Ma isajjü sapi nmi thsüla nu igüthu pashüdha.

⁵ Ma hi pi ketizen kesa nu hathakina tssüzüjjen wi khentendha.

⁶ Ma hi meten pi keshü kahansa kejang pen wi hang thsü.

⁷ Ma assüli pi hi huya; hi shhukeya kaghang nkemi tssüzü kesü saben.

⁸ Hi maghala qai nu kekiqa khie, isala Anyiza na nkina mvula.

⁹ Hi kenenkhukhu alentsen; nu kahe wi peghe lela alon khweti na ilen khenya.

¹⁰ Ma aduweng kesü ti hi cwen; ma ssensitemi kesü ti imiwi penkegho.

¹¹ Ma alen wina hi jügüshi, hi zandhi-zanghe nu teshia.

¹² Ma ma lamugho satekiya nu ma lakusü pi hi mitsüya.

¹³ Ma ma lakusü pi igwo non wi dhu ntsa gachi cü.

¹⁴ Anyithu na ghanan thangthang hi nankeqhe; hi mathu tsüdi pangbi kesü sa.

¹⁵ Ma ketizenkesa kekha pi kecüwa tsüna hi kedsa nu kejjü sa.

¹⁶ Ma immi pi ayyi wi kizza cü, nu iyha pi alonshi miwi pashü thsüdha.

¹⁷ Hi agwo kesüqon, kecca, nu anonkeghe tsüna mangwa khe malidha.

¹⁸ Hi kesie hang ntendha; Apvüwa wi hi kaghang tsüna bvüdha.

¹⁹ Hi kinaa, ijjen nkemi kemeshen ha aji kekha.

²⁰ Hi tsü meshenki ben, nu ighamu na accükwenshü wadha.

²¹ Isala hi pala kesü ha meshen yathu kaghangwa na ghoneng den:

²² Apvüwa kaghali nmila sa nketen, nu ma nanketizen na khiela asakhen sa nten,

²³ Aghanen kemehai ti, nu aghani na shhugho metsi keten ti.

²⁴ Apvüwa na hi keben tsüdi, tsalina hi kaghang pi ma miwi chiden.

²⁵ Apvüwa na ma nondi ketenthu tsüdi ghena mehai.

²⁶ Tsalina ithu ghena kemehai ntsawa na kethankehi nu ma ithu hangshakeya kehie tsü le.

²⁷ Nu ithu kepvünyi tsü wina kethankehi kesa chükeya hana kemehai ntsa.

²⁸ Ithu na ketizensa lethu, kethankehi kesa wi ithu ketan ccen donki nbenthu yishü.

²⁹ Ithu ajühkeya wina satemeni meyathu yishü, kepaghenanye ciwi la kaghang benlaya mehai.

³⁰ Kiccü nu kimenni lela, ithu na tsü tsüdi ya meyathu yishü.

³¹ Apvüwa na nantizen ntsa, nu ma anuphan ithu meya mvu sa nben.

³² Ma hathakina sengho ithu cüya mehai, isala ma ithu kaghaliwa tsüna chüti nu zükeqhe ben.

³³ Ma ithu ya leben güccü, nu naa thsü kesa tsü ma kenen nye.

³⁴ Apvüwa na khathansha wi ithu ghamu na atssüzüjjen wi ketizen sa khe chüben;

³⁵ Khathansha wi ma kemeshon pi ithu kecü tsü nyu na khen khe ma chüben.

³⁶ Khathansha wi ajüh kekaghatenpen wi atsentsawa tsü kemili khe ma chüben.

³⁷ Keshüthangla Apvüwa kemeshenwa tsü ketan na kuli shhugho yaden.

³⁸ Kemehai nu nkemehai lela ma jühkhukechi wina saden.

³⁹ Mangsale ithu kesami ghena kemeten muya lethu, leben maghala saben nu?

⁴⁰ Ithu len ghang kaketsü sa nu Apvüwa wi kheneng gho na lo.

⁴¹ Ithu leben sha pi tang wi kebenwa Anyiza cü nu kekhie sa nalo,

⁴² “Ithu na sami nu no shunle, O Apvüwa, nu no kesami teshi pi ithu npi cü.

⁴³ ‘No ithu jügü ghola ithu pathia; no nanketizen na nleben ketsu non wi kuthiwa,

⁴⁴ Lebenketsu kulukeshü na jang mtsü, nu ithu kekhie na tsü pvüdhi meyala.

⁴⁵ No ithu sapi ayyi wi kenenkagha bhon kesü sa thsüdha.

⁴⁶ “Ithu ghinyithu tsüdila ithu kimenni nu ithu nankeqhe.

⁴⁷ Ithu na kededi nu keyasa wi bengho; ithu na sa keyishü nu kemessi wi hang.

⁴⁸ Inyithu kededi ghena inyontssü na aghakutssü ti lle ben.

⁴⁹ ‘Inyontssü na aghaku qen nketen tssü ti lle,

⁵⁰ Apvüwa na tang wina ithu npi mukeya chu ghangchi.

⁵¹ Khathansha wi hi anyunutiwa wi nzathu miwi mangwa khati sa khe mu keya wi ileben güccü.

⁵² “Ghinyithu na hi nanmeghü keya jjügi nkemi wi awa kesü ti hi die yadha.

⁵³ Mathu na hi kahang pi ayyiku wi khalachi, nu alon kesü pi shanbhon.

⁵⁴ Atssü na hi llebhon shagha, nu hi keshü pang sadha le meshenya.

⁵⁵ ‘O Apvüwa, hi ayyiku shuku wina magha nu no ci shagha,

⁵⁶ Nu no hi kiqai hhai kina cülo kekhie wi no kina cü.

⁵⁷ No hi lunengchi nu hi nmessi lalo kiza.

⁵⁸ “Apvüwa, no gho hi kekashaya, nu hi kahangli hangsha cülo.

⁵⁹ Isheipi nu ijühkaghaten cülo; nyu na imiwi kesazzi kesa tsü no chüben.

⁶⁰ Ighinyithu na khatila hi nanmeghü, nu mathu na khati acho sapi hi shun khe no chüben.

⁶¹ ‘O Apvüwa, no mathu na hi kimenni keben zayadha; no mathu tsüdi chüben.

⁶² Mathu na ghanan thangthang icüki khi nu achothu kidenben.

⁶³ Aghanen na wala shitawa kecu mathu na hi nankeqhe ben.

⁶⁴ O Apvüwa, mathu na mangwa satheng khe tsü ghena mathu meten cülo;

⁶⁵ Mathu kishencü, nu hathakina pi mathu pong cülo!

⁶⁶ Mathu jügüsha nu ayyi wina mathu khupi cülo!’”