NEHEMIYA 9 - Kemethajüh (N) (Re-editing) Bible (BSI)

Anyithu na Mathu Kesamithu Kekhishi

^1-2 Asha tsüwa ngwe nu mejü ghanan wi Israel nyithu na mathu kesamithu ghena ahathakina pi ccüca le kesalina saghu nu gweghe kezi sa. Mathu na asangthu wina mathu kepa sadha. Mathu na ahathakina zensu wina aleshithsü mphi nu ayyi pi mathu li wi chi pvü. Tsaseng wi mathu ngan nu mathu nu mathu bamyithu na kesamithu sa ketheng tsü khishi shhu.

³ Mathu wi amighe kekihhe kecheng-u tsü Apvüwa mathu Nyiza Yenwa tsü si, nu tsashiwa amighe kekihhe kecheng-u tsü mathu kesamithu khishi nu Apvüwa mathu Nyiza tsü kinyi.

⁴ Ciwi Levi nyithu ghena kenganpen kesü ben, nu tsü miwi Jeshua, Bani, Kadmiel, Shebaniya, Bunni, Sherebiya, Bani, nu Khenani, hathu na ngan. Mathu na misikhhali Apvüwa mathu Nyiza wi kekhie sa.

⁵ Levi nyi hathu na kinyilo cichi: Jeshua, Kadmiel, Bani, Harshabuneiya, Sherebiya, Shebaniya, nu Pethahiya. Mathu na khi: “Shagha nu Apvüwa nthu Nyiza senglo; anuphan nu anuphanla ma senglo! Anyi tsüdi ya ma nyankethang tsü seng thsülo; anyi na seng wa cu meya lela.”

Kesami Kekhishi Kekhie

⁶ Tsaseng wi Israel nyithu na kekhie ha sa: “No, Apvüwa, no ketan Apvüwa le; no atssanthu nu ghotsithu sachi. No ayyi nu atssükedone nu ciwi kebenthu tsüdi sachi; no kahang pi tsüdi cü. Tang wi kekhangthu na kukedu nu no kinyi.”

⁷ No, Apvüwa Anyiza, no Abram kessiya, nu Babilon yyi wi Ur wina ma ssinu shhu; no ma nyan kemili pi Abraham sa cüa.

⁸ No ma no wi jühtsentsa kesa muya, nu no ma ssinu cenkethenjüh kesü sa. No Kanaan nyithu yyi pi ma cüle khishichi, Hitti nu Amor nyithu yyi, Jebus, Girgash, Periz nyithu yyi, ma shicübvüghathu hang keten yyi kesü. No jühtsentsa kesa ghena no khishikechi tsü nieden.

⁹ “No ithu bamyithu na khatila Ejipt wi ketizensa khe mu; nu no mathu na Kenmie Tssükedone wi no kekiqa kekhie hhai zaya.”

¹⁰ No amankesathu kuli pi kadimiwa shun, ma kekhu wi kedithu nu ma yyi wi anyithu shun, kepaghenanye mathu khatila n-nyithu pasha khe no chüben. No anyankemechan nansü la kebenwa tsü muya.

¹¹ Atssükedone wi no n-nyithu len kesü sapi cü, nu mathu ssinu ayyi keqha wina shhua. Mathu jügü ketenthu na atssü kedhu wi meyanthia, atssükedone kekuli wi alon na manon wi kedu ti sa.

¹² No aghanan wi akulukeshü kesü pi mathu ssi, nu no aghaja wi anni pi mathu len wegü cü.

¹³ No tang wina Sinai Yikha miwi dugho; no n-nyithu ccüneng, nu ayen kemehai nu kesansijüh kemehai pi mathu cü.

¹⁴ No mathu na no Sabbath kemethawa tsü nielo kesa pi mathu sansi cü, nu nmaghawa Mosa wina no ayenthu pi mathu cü.

¹⁵ “Khathansha wi mathu na ghama khe no tang wina amesa pi mathu cü, nu mathu na dighe keya wi alonshi kesü wi atssü pi mathu jjüya thsüa. No mathu na ayyiwa tsü nkayalo kiza, no pi mathu cüle khishichi kethengwa tsü.

¹⁶ Isala ithu bamyithu na kapvü nu leben-dhu wa, nu n-yenkhukechithu tsü n-nie mvula.

¹⁷ Mathu na tsü n-niela hhaghe; no kulikechi tsüdi malia; mathu na no amankesa kulikechi tsüdi malia; Mathu wikesa wina mathu ccülikesa kesü kessiya, nu mathu ssi neng sen Ejipt wi nssümagha kesa wi wa thsüle kesalina, Isala no kesami teshi pi cü ketenwa Nyiza; no nanketizen nu kaghaliwa, wan aghepvü nten. No nanketizen na di mtsü; no mathu teshi nsa.

¹⁸ Mathu na atsikezhü kesü sapi amesü zza süpon kesü ti sa, nu tsüna Ejipt wina mathu ssinu keshhuwa cenpvü le khi! Mathu na khatila no kimenni dha nu, Apvüwa!

¹⁹ Isala no mathu teshi pi ciwi ayyikeshü wi chi nsa, kepaghenanye no nanketizen na di mtsü. No mathu wina akulukeshüwa nyelela anniwa tsü sen bvü nsa, tsüna aghanan nu aghaja wi mathu len tsütson.

²⁰ No kemehai wina no mathu na mangwa nsathu yishü khe pi kiza; no manna pi mathu ghanja nu atssü pi mathu jjü thsü.

²¹ Ayyikeshü wi amapi jügha chuli no mathu nsenthu keyishü tsüdi pi cü; mathu thsümeni na qaewa nsa, nu mathu ccü na naa nu pvü nsa.

²² “No mathu ya mizzatentithu nu kadiyyithu miwi khangya thsüa, mathu ggü vükeben yyithu miwi. Mathu na Heshbon yyi Sihon na kekhang sen keben tsü miwi khangya, nu Bashan yyi Og na kadimiwa sa keben tsü miwi la.

²³ No atsanga na ji pi atssan wi ghotsithu ti pi mathu cü, nu no mathu ya ayyiwa tsü nkaya thsü nu ciwi hang, no pi mathu bamyithu cüle khishichi ketheng witsü.

²⁴ Mathu na Kanaan yyi tsü nkaya; no ciwi anyithu miwi khangya, No kekhang pi n-nyithu cü nu mathu ya Kanaan nyithu, nu kadimithu miwi mathu kemeshen saya thsü.

²⁵ N-nyithu na khwetivü ketheng nyunutithu nkaya, ayyi kemehai, keben-keyeng pong keben ajjenthu, atssükhang chhü kethengthu, oliv chantonthu, kedsau tonthu, nu kemeshentsse llithu. Mathu tsüdi mathu kedsa mvu dsapi kunonya; mathu na pala kemehai no pi mathu kecü tsüdila pi anonkwenya.

²⁶ ‘Isala n-nyithu na no shun nu njüh nkina; mathu na n-Yenwa tsüpi mathu sengwi chia. Mathu na atusenjüh-kechüthu mathu kitsan kechithu, kheneng sen nu no wi gholo mathu kekizathu tsü pathia. Mathu na matsüdi wi no kimenni,’

²⁷ tsalina no mathu ghinyithu ya mathu chaya, nu mathu miwi kekhang senya thsüa. Mathu gükeccü wi mathu na no wi kekiqa khie, nu no tang wina mathu kekhie luneng chi cü. No nanketizen kedi wina mathu ccülikesathu kesunchi, tsüthu na mathu ghinyithu kwen wi mathu kekashaya.

²⁸ Khathansha wi kecca na gho neng khe, mathu na sami neng wa, nu no kheneng mathu ghinyithu ya mathu miwi khangya thsüa. Isala khathansha wi mathu na leben khapegheya, nu no mathu hangsha yalo khie khe, no matsü tsüdi wi tang wi ben nu zaya nu no nanketizen kedi wina mathu kekashaya.

²⁹ No mathu na no kesansi jühthu tsü nielo kitsanchi, isala mathu na kapvü nu n-yenthu tsü hhaghe, n-Yenwa keniewa tsüna kahang lenwa lela. Lebendhu pi khapeghe bvüa, mathu na tsü n-nie mvula.

³⁰ No lebensie nu amapi kaghapen mathu kitsanchi, no atusenjüh-kechüthu kechüchi pi khi thsü, isala n-nyithu na akhuna decua, tsalina no mizzatenti kepathu ya mathu miwi khangya thsüa.

³¹ Isala no nanketizen na di mtsü ghena, no mathu teshi nyelela yasa nsa. No nanketizen nu kaghaliwa Nyiza le;

³² ‘O Anyiza, ithu Nyiza, no khatila di nu! khatila qhethiketen nu khatila khang nu! No jühtsentsa sala cenkethenjüh khishikechi tsü nieden. Assiriya nyi kadimithu tsü wina ithu pasha gho nansü kecu saben, ithu na khatila ketizen sadha nu! Ithu kadimithu, ccülikesathu, keqhaikedithu, nu atusenjüh kechüthu, ithu bamyithu, nu ithu nyithu tsüdila ketizen sadha. Ithu na khatila ketizen sadha khe meshenchilo!

³³ No kesau wina ithu meten cü; no jühtsentsa sa, ithu na sami lela.

³⁴ Ithu bamyithu, ccülikesathu, kadimithu, nu atusenjüh-kechüthu na n-Yenwa tsü n-niela. Mathu na no kitsan kechi nu ayenkhukechithu nkinala.

³⁵ Kadimithu na no kesawegü sen nu n-nyithu miwi kekhang sen, mathu na khathansha no ayyi keti nu kemehai pi mathu kecü witsü hang khe; isala mathu na kesami wi khapeghe nu no kekuli nsala.

³⁶ Ithu na khili no ayyi pi ithu kecü witsü nssümagha saben, ayyi kemehai hawi kedsakejjü kemehai pi ithu cüben.

³⁷ Ayyiwa wi mangwa muya khe tsüna kadimithu wi waben, ithu kesami ghena no pi ithu miwi chi cü kesathu. Mathu na ithu nu ithu sahangthu pi mathu kemeshen sa, nu ithu na ahathana ntsawa saben le!’ ”

Anyithu na Cenkeya wi Anyankezhü

³⁸ Hathu ha tsüdila sakeya ghena ithu Israel nyithu na kemetha cenkethenjüh kesü sa nu ithu ccülikesathu, Levi nyithu, nu keqhaikedithu na mathu kemechan zensu pi tsü miwi jeng.