NEHEMIYA 8 - Kemethajüh (N) (Re-editing) Bible (BSI)

Ezra Na Ayenwa Pi Anyithu wi Sikechi

¹ Asha tagüwa tsü witsü Israel nyithu tsüdila mathu nyutithu wi benyadha. Asha tsüwa atsathang atuwa wi mathu tsüdila Jerusalem wi Atssü Kaghapeng-jenka non wi saghu. Mathu na Ezra, keqhaikediwa nu Apvüwa na Mosa wina Ayenwa pi Israel kecü tsü kechü ntsawa wi Ayenwa lesüshen tsü khuyalo kiza.

² Tsalina Ezra na tsü sen nu anyi npvüza, nza, nu ghanyi chüshiya kemehaithu na saghu keben pen witsü gho.

³ Ma ciwi kaghapeng-jenka khemi wi Ayenwa tsü atsantheghi na si wa ghanan lapvü cu, nu mathu tsüdila lebenchi ntsa nu kina.

⁴ Ezra na achan pi matsü wi kesen ghena sa ketheng kenganpen miwi tsü nganya. Anyi hathu na ma na ajewa ngan: Mattithiya, Shema, Anaiya, Uriya, Hilkiya, nu Maaseiya; nu hathu na ma na tavüwa nganya: Pedaiya, Mishael, Malkhijah, Hashum, Hashbaddana, Zekhariya, nu Meshullam.

⁵ Ezra na ciwi kenganpen anyithu miwi misiki kesa wi tsü ngan, nu mathu tsüdila ma ghangkiben. Ma lesüshenwa tsü shichi meyi mathu tsüdila ngan shagha.

⁶ Ezra na khi, “Apvüwa, Anyiza kedi ntsawa senglo!” Anyi tsüdila mathu kwen zanki nu “Amen! Amen!” isa khi. Mathu na akhhutsüdu nkhwenca nu kinyi,

⁷ Mathu na shagha mathu pen wi nganya, nu Levi nyi hathu na Ayenwa tsü khimetha pi mathu kiza: Jeshua, Bani, Sherebia, Jamin, Akkub, Shabbethai, Hodia, Maaseiya, Kelita, Azariya, Jozabad, Hanan, nu Peliya.

⁸ Mathu na apang pi Anyiza Yenwa tsü khikemili nu anyithu ya chüshiya thsü.

⁹ Khathansha wi anyithu na Ayenwa wi mang kesau khe zakeya wi mathu na leben güccü nu qai wa. Tsalina ahngwa Nehemiya, keqhaikediwa nu Ayenwa kechü ntsawa Ezra, nu Levi nyithu Ayenwa khimetha kechithu na anyi tsüdi wi kiza, “Nansü ha Apvüwa nthu Nyiza tuwi kemetha tsathang, tsalina nthu na ahathana nu qai nsa lalo.

¹⁰ Khili nthu jjen wi wha nu kemishu kesü salo. Nthu na kedsakejjü nu kisengtssü pi nkemithu gweghe gishü yalo. Nansü ha Apvüwa tuwi kemetha tsathang, tsalina ahathana nsala. Apvüwa nonkeghe pi nthu kecü nthu sapi zü cüben.”

¹¹ Levi nyithu na wala anyithu leben satecca nu atsathang kemetha hati kesa wi ahathana nsa lalo mathu kiza.

¹² Tsalina anyithu tsüdila ajjen wi whala anonghe ntsa dsa nu jjü nu mathu kebenwa tsüpi nyu kepa wi gishüya, kepaghenanye mathu na si pi mathu kekiza jjügi tsü chüshiya kesalina.

Kelishu Kho Kesa

¹³ Dhitsüwa wi agei wi alikesathu, keqhaikedithu, nu Levi nyithu na gweghe Ezra wi wa nu Ayenwa wi kesansithu tsü si.

¹⁴ Mathu na Apvüwa na Mosa wina pi kecü Ayenwa witsü Israel myithu na Kelishu Kho sa keben jüwi apon wi nhangthu yishü kesa muya.

¹⁵ Tsalina mathu kecükegwe hathu ha khuchi nu tsüthu kesun pi Jerusalem nu anyunuti nu anyuti kepathu tsüdi wi chi: “Yyishiphon thu wi wala Ayenwa wi zhüketheng kecükegwethu kenie wina asahong, oliv, mirtle, palm, nu achanton kepathu cüna shhü pi aponthu sayalo.”

¹⁶ Tsalina anyithu na achanton cünathu shhü pi mathu jjen mili, mathu khemi, Kekinyijjen khemi, nu Atssü Kaghapeng-jenka nu Efraim Kaghapeng-jenkathu tsüdi wi apon saya.

¹⁷ Anyi kushiyyi wina kheneng keghothu tsüdi wa aponthu wi hang. Kheni Nun tsa Joshua tsü wi kesa sengwi hawa ha atuwa saben, nu anyi tsüdila nong nu anonghe ntsa sa.

¹⁸ Akho tsathang atuwa wina wa asakhen kecu mathu na atsathangla Anyiza Yenwa tsü pahan si isa. Ayenwa wi keben ti mathu na ghanan tagü akho tsü kemini sa, nu tazen ghanan wi tsü kemini sakhenwa sa.