NEHEMIYA 5 - Kemethajüh (N) (Re-editing) Bible (BSI)

Ketha-u Kepasha

¹ Matsü pahan sengwi anyi kejon, nza npvüza tsüdila mathu leben nkaghajüh khipi ma Judah nyithu shun shagha.

² Pahan na khi, “Itheghi na atheghi kedi, dsa nu hang benle kesalina asu nsenthu yishü ben.”

³ Kepathu na khi, “Ithu na ithu lli, kemeshentsse lli, nu ajjenthu pi dhabi, tsüna apen tsüwi asu kedsa qo muyale kesalina.”

⁴ Nu kepathu la khi, “Ithu na ithu lli nu kemeshentsse llithu ghena apisa nna pi kadi khajana chia.

⁵ Ithu la Judah nyi amizza makesü. Ithu tsangathu la mathu tsangathu ti nmehai kwe? Isala ithu na ithu tsangathu pi nssümaghathu sa thsü tendha. Ithu ngathu pahan pi nssümaghalethu sa jeüdha. Ithu wi ithu lli nu kemeshentsse llithu sen bvü kesalina ithu na mangla nkenye sadha.”

⁶ Hi khathansha wi mathu leben nkaghajüh ha zaya khe ileben minu ntsa saya

⁷ nu hati sale südheya. Hi anyi ccülikesathu nu kedithu then nu mathu kiza. “Nthu na nthu cünyuthu pasha ben; ” Hi anyitenti cipi saghuya nu mathu gükeccü ghena khi wa

⁸ nu khi, “Ithu na saya kemehai chu, ithu cünyu Judah nyithu na mathu ketanla mathu pi asangthu wi jeüchi kesathu tsü shü neng senghoaben. Nthu na khili nthu cünyuthu meten pi mathu ketanla mathu pi ma Judah nyithu, nthu wi jeüchi thsü ben le!” Accülikesathu na ceen ben wa nu mathu na mangla khikeya nmila.

⁹ Tsaseng wi hi khi, “Nthu na sa keben ha sazzi ben! Nthu na Anyiza messikü nu kemeshonwa kesau. Isalethu, nthu na ithu ghinyi, Anyiza nkechüthu ya ithu nankeqhe keya jjügi mangla pi cü nkesa.

¹⁰ Hi apisa nu asu pi anyithu nna thsü nu anyi hi kegweghethu nu ighena kekulithu la tsüti saben. Khili ithu keyau keben tsüdila teshia na.

¹¹ Mathu na nthu men kepvü apisa, asu, kisengtssü, nyelela oliv deli tsüdila teshilo. Nu khili mathu lli, kemeshentsse lli, oliv sanku, nu ajjenthu tsüpi mathu cü nenglo!”

¹² Accülikesathu na khineng, “Ikhang na no kekhi ti saaden. Ikhang na keben-keyeng tsüpi cü neng nu amen kepvüthu tsü meyadha.” Hi keqhaikedithu cichi nu accülikesathu ya mathu khishichi ketheng ti nie thsüle kesalina keqhaikedithu tuwi na kishen thsüa.

¹³ Tsaseng wi hi igeshi keqhan pvü keten tsü khushi pi ketheng chi. Hi khi, “Nthu thowa na ma khishikechi tsü n-niela khe Anyiza na hati no kethengsha cüben. Anyiza na njjenthu nu keben tsüdi sen bvüa, nu no mangla nmila ben.” Ciwi kebenthu anyi tsüdila khi, “Amen!” nu Apvüwa seng. Nu accülikesathu na mathu khishikechi tsü nie.

Nehemiya Na Apvünkemene

¹⁴ Hi amapi taghakeni Judah yyi wi ahng kesa, Artaxerxes na kadimi kesa ngwe mapi na wala changha nu keni kecu chuli, ishilithu nyelela hi lela hi ahng kesa kedsau tsse tsü ndsa.

¹⁵ Ituwi ahng kesathu tsüdila akhhi kekiyan pi anyithu cü nu kedsakejjü nu kisengtssü ghena ghanan kesü wi rükatssü jügha khieya. Nu mathu maghathu lela anyithu pasha. Isala hi tsüti nsa, kepaghenanye hi Anyiza messikü kesalina.

¹⁶ Hi ipiketsü tsüdila pi akhwetiwa tsü kesa neng wi chi nu hi keben-keyeng mangla meya. Hi gweghe kekulithu la tsüdi gweghe tsü sa neng.

¹⁷ Ithu kevü mizzatentithu wina anyithu hi wi kegho miwi hi keshüthangla imiz wi Judah nyithu nu ccülikesathu meza nu deni ghanja cü.

¹⁸ Hi atsathangla amesü kesü, khaghaneni kemehai ntsa tugho, nu awegü kejon pathi, nu hi ghanan tagha kaghapenla kisengtssü ketheü pi cü. Isala anyithu na akhhi kekiyan ntsa pvü keben tsü hi chü kesalina hi mathu wi ahngwa na keyau tsü nkhie.

¹⁹ O Anyiza, hi no wi khieben, hi anyi hathu ghena kulikechi tsü tsüdila pi ighena kemehaiwa meshenchi cülo.