NEHEMIYA 3 - Kemethajüh (N) (Re-editing) Bible (BSI)

Jerusalem Khwetiwa Tsü Kesa neng

¹ Hatinu anyunutiwa khweti tsü sa neng Keqhaikedi ntsawa Eliashib nu ma pvüshang keqhaikedithu na khaghaneni Kaghapeng-jenka tsü sa neng, tsü satemetha, nu kaghapeng-jenkathu pi ma pen wi chia. Mathu na akhweti tsüna wala Meza Ducükezhü nu Hananel Ducükezhü kecu wi satemetha.

² Jerikho nyithu na tsü shiwa sa. Imri tsa Zakhur na tsü shiwa sa.

³ Hassena gei na Anga Kaghapeng-jenka tsü sa. Mathu na akukhithu nu kaghapeng-jenkathu pi ma pen wi chia, nu kaghapeng- jenkawa tsü kekhen ghena akhughonthu pi chia.

⁴ Hakkok tsa Uriya tsawa Meremoth na tsü shiwa sa. Meshezabel tsa Berekhiya tsawa Meshullam na tsü shiwa sa. Baana tsa Zadok na tsü shiwa sa.

⁵ Tekoa nyithu na tsü shiwa sa, isala anyuti wi anyi kemechanthu na kekuli kaghangthu na pi mathu dhenchi ketheng akwen pi kekulithu tsü nsa mvula.

⁶ Paseya tsa Joiada nu Besodeiya tsa Meshullam manyi na Jeshana Kaghapeng-jenka tsü sa neng. Manyi na akukhithu nu kaghapeng-jenkathu pi ma pen wi chia, nu kaghapeng-jenkawa tsü kekhen ghena akhughonthu pi chia.

⁷ Gibeon wina kegho Kelatiya, Meronoth wina kegho Jadon, nu Gibeon nu Mizpah nyithu na tsü shiwa wala Eufrat Niduwa wi ahng jjen kecu tsü sa.

⁸ Harhaiya tsa Uzziel, suna kecühwa na tsü shiwa sa. Hananiya, hankedemvu kesawa na tsü shiwa wala Kemeza Wikeshon kecu tsü sa.

⁹ Hur tsa Refaiya, Jerusalem Elakha pahanwa wi kekhang kesenwa na tsü shiwa sa.

¹⁰ Harumaf tsa Jedaya na tsü shiwa ma jjen ketsaki witsü sa. Hashabneiya tsa Hattush na tsü shiwa sa.

¹¹ Harim tsa Malkhijah nu Pahath Moab tsa Hasshub manyi na tsü shiwa nu Annibhon Ducükezhü tsü keni qho sa.

¹² Hallohesh tsa Shallum, Jerusalem Elakha pahanwa wi kekhang kesenwa na tsü shiwa sa. (Ma ngathu na kekuli sa qa.)

¹³ Hanun nu Zanoa nyunuti wi kahangthu na Yyiketijü Kaghapeng-jenkawa tsü sa neng. Mathu na kaghapeng-jenkathu pi ma pen wi chi, nu kaghapeng-jenka kekhen ghena akhughonthu pi chia, nu akhweti tsü meter 440 wala Bhanieku Kaghapeng-jenka kecu sapfüya.

¹⁴ Rekhab tsa Malkhijah, Beth Hakkherem, Elakha wi kekhang kesenwa na Bhanieku Kaghapeng-jenka tsü sa neng. Ma kaghapeng-jenkathu pi ma pen wi chi, nu kaghapeng-jenka kekhen ghena akhughonthu pi chia.

¹⁵ Kolhoze tsa Shallum, Mizpah Elakha wi kekhang kesenwa na Tssükebvüpen Kaghapeng-jenka tsü sa neng. Ma kedulenwa tsü khen, kaghapeng-jenkathu pi ma pen wi chi, nu akhughonthu pi chia. Shela cüceng witsü ma kadi sanku ketsaki wina akhweti sa sen wa David Nyunutiwa wina kedugho acükhaku kezhü witsü chia.

¹⁶ Azbuk tsa Nehemiya, Bethzur Elakha pahanwa wi kekhang kesenwa na tsü shiwa sa sen wa David shüjjen, acüceng nu kaghapeng kecu chia.

Levi Nyi Akhwetiwa Kesa Wi Kekulithu

¹⁷ Levi nyi hathu na tsü shiwa akhweti apen kecheng mejü sa; Bani tsa Rehum na tsü shiwa sa; Hashabiya, Keila Elakha pahanwa wi kekhang kesenwa na ma elakha mithon wina tsü shiwa sa!

¹⁸ Henada tsa Bavvai, Keila Elakha kepawa pahan miwi kekhang kesenwa na tsü shiwa sa!

¹⁹ Jeshua tsa Ezer, Mizpah miwi kekhang kesenwa na tsü shiwa aghitsanqai ketheng pen tuwi na wa akhweti kishenpen kecu sa:

²⁰ Zabbai tsa Baruk na tsü shiwa wala Keqhaikedi ntsawa Eliashib jjen wi kedulen kecu tsü sa.

²¹ Hakkoz tsa Uriya tsawa Meremoth na tsü shiwa wala Eliashib jjen kenten kecu sa.

Keqhaikedithu Na Akhwetiwa Kesa Wi Kekulithu

²² Keqhaikedi hathu na tsü shiwa akhweti apen kecheng mejü sa: Keqhaikedithu Jerusalem ketekevü wi keghothu na tsü shiwa sa;

²³ Benjamin nu Hasshub manyi na tsü shiwa manyi jjen tuwi tsü sa; Ananiya tsa Maaseiya tsawa Azariya na tsü shiwa ma jjen tuwi tsü sa;

²⁴ Henadad tsa Behnui na tsü shiwa Azariya jjen wina wala akhweti ccügwen kecu sa;

^25-26 Uzai tsa Palal na tsü shiwa akhweti ccügwen nu aghikehie pen ccühha kete meiwa kadijjen ducükezhü wi tsü sa; Parosh tsa Pedaiya na tsü shiwa wala nishuwa Atssü Kaghapeng-jenka kete nu Kekinyijjen ghikehiepen tsü kecu sa. (Hawa ha Kekinyijjen wi kekulithu na hang keten Ofel nyunutiwa tsü kete,)

Tsükesathu Kepa wi

²⁷ Tekoa nyithu na tsü shiwa, mathu ghena keniwa, Kekinyijjen ghikehiepen ducükezhü kedi tsü kejentan na wala Ofel kete akhweti tsü sa.

²⁸ Keqhaikedithu akhang kesü na tsü shiwa, Goru Kaghapeng- jenka na aghawa, mathu kesüsü ma jjen tuwi tsü sa.

²⁹ Immer tsa Zadok na tsü shiwa ma jjen tuwi sa. Shekaniya tsa Shemaiya, Nishuwa Kaghapeng-jenka kehiewa na tsü shiwa sa.

³⁰ Shelemiya tsa Hananiya nu Zalaf tsa tughowa Hanun manyi na tsü shiwa sa, manyi ghena keniwa. Berekhiya tsa Meshullam na tsü shiwa ma jjen tuwi tsü sa.

³¹ Malkhijah, suna kecühwa na tsü shiwa Kekinyijjen wi kekulithu nu asenliketi kesathu na senketen ajjen, tsüna Mifkad Kaghapeng-jenka kete na wala Kekinyijjen wi keshondhi agha nishuwa ccügwen kete kecu akhweti tsü sa.

³² Suna kecühthu nu asenliketi kesathu na asakhenwa, accügwen wi keshondhiwa wina wala khaghaneni Kaghapeng-jenka kecu tsü sa.