NEHEMIYA 2 - Kemethajüh (N) (Re-editing) Bible (BSI)

Nehemiya na Jerusalem wi kewa

¹ Asha mejü sengwi ghanan kesü wi Kadimi Artaxerxes na anün dsa keben wi hi kisengtssü pie nu ma wi wa. Ma hatu wi kutitanla hi ihathanathi keben npi mu,

² tsalina ma hi keü, “Mangkesa na nhathanathi keben muben nu? No naa nbenshe, tsalina nleben güccü benla metsi ben.” Hi messi ntsa saya

³ nu luneng, “Njenkebenwa, kesie kahangwa salo! Ibamyithu pi vhü ketheng nyunutiwa tsü yasa theng nu ma kaghapeng-jenkathu na anni pi mecang kea wi hi khatinu ihatha n-nala benya nu?”

⁴ Kadimiwa na keü, “No mangwa sa mvu ben nu?” Hi tang wi kebenwa Anyiza wi kekhie sa

⁵ nu tsaseng wi kadimi wi khi, “Keujüla Njenkebenwa na hi nen nu hi kekhie sacü mvu lethu, hi ya Judah yyi wi ibamyithu pi vhü ketheng pen wi wa thsülo, isanu hi anyunutiwa tsü sa nengya thsüle kesalina.”

⁶ Kadimiwa na kadijja gweghe donki keben wi hi kekhie tsü sa cüa. Ma hi matsü khathu ghena wa nu kusi gho neng ben khe keü nu hi ma kiza.

⁷ Tsaseng wi hi ma wi lesüzhü pi Eufrat Niduwa diyyi wi ahngwa cü nu mathu kecükegwe chi pi hi yala Judah yyi wi waya thsülo kesa pi hi cülo keü.

⁸ Hi ma zhükechi pi kadimi ji ayinong kehiewa Asaf cü nu ma kecükegwe chi pi Kekinyijjen ghikehiethu kaghapeng-jenkathu, anyunutiwa khwetithu, nu hi hang keten pen ajjen, hathu kesa ghena ma achan kahathu pi hi cülo kesa la keü. Anyiza na hi ssiketen ghena kadimiwa na hi kekhie tsüdi pi hi cüa.

⁹ Kadimiwa na süpahi kedithu nu goru kessithu akhang kesü pi hi gweghe kesunchi, nu Eufrat Niduwa wi wa. Ciwi hi kadimiwa na zhükechi tsüpi ahngthu cü.

¹⁰ Isala Beth Horon nyuti wina kegho Sanballat, nu Ammon diyyi wi kedi kesü Tobiya, manyi na anyi pahan na Israel nyithu ghena kemehaiwa kuli le ghodha le kesa zaya, nu manyi na aghepvü ntsa sa.

¹¹ Hi Jerusalem wi wa, nu ghanan kecheng

¹² Anyiza na hi Jerusalem ghena salo kechü-kenong kechi tsüpi thola nkiza. Isanu hi aghaja non wi shagha ipvüshangthu pahan ssiya nu amei wi shhu. Ikhang na asahang kesü hi ma miwi donki ketenwa gada tsü ketan ssiya.

¹³ Tsüna atsanjang keben wi hi niduwa Kaghapeng-jenka Yyiketijü wina anyunutiwa tsü teshi nu acülawa kaghagu Dragon Tssükebvüpen wina sa sen Bhanieku Kaghapeng-jenka wi cü. Hi wa anyunutiwa khwetithu na qanca keben nu anni pi kaghapeng-jenkathu mecang kesathu tsü hhainan.

¹⁴ Tsaseng wi hi anyunuti na nishuwa wa nu sa sen aghawa Kaghapeng-jenka Tssükebvüpen nu Kadimi cüceng wi wa. Hi ma miwi benketen gada tsüna ma keshhulen nmula,

¹⁵ tsalina hi ayyi wi cadu nu Kidron Yyiketijü wi wa nu akhwetiwa tsü ghang. Tsaseng wi hi keshi kewalen witsü kheneng gho nu Kaghapeng-jenka Yyiketijü wina anyunutiwa wi du neng.

¹⁶ Ciwi kedithu kesüla hi khiewa wa nu hi mangwa sa khe nchü. Hi tsü mangla pi inyi Judah nyithu nkiza —keqhaikedithu, accülikasathu, kedithu, nyelela kekuli tsü sa ketenthu kesüla.

¹⁷ Isala hi khili mathu wi kiza, “Ghangchilo, ithu na agükeccü khati wi ben khe, kepaghenanye Jerusalem na qancaben nu kaghapeng-jenkathu na yasa dha! Ithu na anyunutiwa khwetithu tsü sa neng nu ithu kejüghe keyawa tsüpi asakhen sa thsüa na.”

¹⁸ Nu hi Anyiza na hi ssi keten nu kiqa kecü, nu kadimiwa na mangwa pi hi kiza khe pi mathu kiza. Mathu na khineng, “Ithu na shagha nu tsü sa neng na!” Isanu mathu na kekuli sa wale kesa kidenya.

¹⁹ Khathansha wi Sanballat, Tobiya, nu Arab nyi kesü ma nyan Geshen hathu na ithu mangwa sale kiden ben khe zakeya wi mathu na ikhang nankeqhe nu khi, “Nthu na sa keben ha mangwa le meshen ben nu? Nthu na kadimiwa matang shun le ben kwe?”

²⁰ Hi luneng, “Tang wi kebenwa Anyiza na haicenkeya pi ikhang cüben. Ikhang na ma maghathu, nu ikhang na kekuli tsü sa wa tendha. Isala nthu tsü Jerusalem wi nthu keben mukeyau kemeshon mangla nmi, kheni wina nthu shei mukeya nmi.”