NEHEMIYA 10 - Kemethajüh (N) (Re-editing) Bible (BSI)

¹ Kemechan zensu kechi atuwa na Hakaliya tsa Nehemiya, ahngwa, nu tsashiwa Zedekiya na sa. Hathu ha la tsüdi sa:

^2-8 Keqhaikedithu: Seraiya, Azariya, Jeremiya, Pashhur, Amriya, Malkhijah, Hattush, Shebaniya, Mallukh, Harim, Meremoth, Obadiya, Daniel, Ginnethen, Baruk, Keshullam, Abijah, Mijamin, Maaziya, Bilgai, nu Shemaiya.

^9-13 Levi nyithu; Azaniya tsa Jeshua, Henadad gei wi Bihnui, Kadmiel, Shebaniya, Hodiya, Kelita, Pelaiya, Hanan, Mika, Rehob, Hashabiya, Zakkur, Sherebiya, Shebaniya, Hodiya, Bani, nu Beninu.

^14-27 Anyi ccülikesathu: Parosh, Pahath Moab, Elam, Zattu, Bani, Bunni, Azgad, Bebai, Adonijah, Bigvai, Adin, Ater, Hezekiya, Azzur, Hodiya, Hashum, Bezai, Harif, Anathoth, Nebi, Magpiyash, Meshullam, Hezir, Meshezabel, Zadok, Jaddua, Pelatiya, Hanan, Anaiya, Hoshea, Hananiya, Hasshub, Hallohesh, Pilha, Shobek, Rehum, Hashabna, Maaseiya, Ahiya, Hanan, Anan, Mallukh, Harim, nu Baana.

Cenkeyawa Tsü

²⁸ Ithu, Israel nyithu, keqhaikedithu, Levi nyithu, Kekinyijjen ghikehiethu, Kekinyijjen wi akhwi kesachüthu, Kekinyijjen wi kekuli nyithu, nu Anyiza Yenwa nie nu asang ithu yyi wi hang kebenthu wina mathu kepa saya kesathu tsüdi, ithu wubvüthu, nu ghanyi pala chüshiya kemehaithu, ithu tsüdi gweghe

²⁹ nu ithu ccülikesathu gweghela Anyiza na ma maghawa Mosa wina khukechi Anyiza Yenwa tsü nie nu hangden, nu keujüla ithu na tsü pakhhi lethu, tsü kutimen wi kishen-keshi pvüben kesa kekishen kesü saben; ithu na Apvüwa, ithu Pvüwa na pi ithu kekiza tsüdi nieden; nu ithu na ma yenthu nu ciwi nsathu keyishü tsüdi sa ben.

³⁰ Ithu na asang ithu yyi wi hang kebenthu ssinu keyali nben.

³¹ Keujüla asangthu na asu nyelela pala katsüha sen nu Sabbath nyelela atsathang kemetha kepa ghanan wi lela pi ithu wi jeü gho lethu, ithu na mathu wi tsüthu shü nben. Amapi tagüwa kaghapenla ithu na allica nben, nu amenkepvü tsüdila teshiaben.

³² Amapi kaghapenla ithu kesüsü rükatssü gram manga khuchi pi Kekinyijjen wi kededi ghena pvü kiqali ben.

³³ Ithu na Kekinyijjen wi kekinyi ghena hathu khuchiden: kemetha mesa, atsathangla asu pi kekinyi, asahangthu mecang pi atsathangla ahhanshathu kesa, Sabbath ghena kemetha kekinyi, Asha ketheü Kho, nu akho kepathu, kepa wi kemetha kekinyi, Israel kesamithu sen kebvü kekinyi, nu Kekinyijjen ghena katsüha lela nsenthu keyishü.

³⁴ Ithu, anyithu, keqhaikedithu nu Levi nyithu, na amapi kaghapen akezen wwi nu agei khawa na Ayenwa wi kesau ben khe tsü kenie wina ahhanshathu sapi Apvüwa ithu Nyiza kecü tsü kemecang chan khuchiben.

³⁵ Ithu na amapi kaghapenla asu wwiya tegüwa nu kedsau tonthu ma bi nyün tegüwa sen wa Kekinyijjen wi kekinyi kesü sa den.

³⁶ Ayenwa wi kesau keben ti ithu tsüdila atsa pvüghaya tegüwa ssinu Kekinyijjen wi keqhaikedithu wi wa nu ma satemetha pi Anyiza wi chiden. Ithu na amesü zza, khaghaneni zza, nyelela aneni zza, ca tegüwa la satemetha chiben.

³⁷ Ithu na amapi kaghapenla asu wwiya tegüwa wi pi kesa amesa, nu kekinyi kesa kepathu kisengtssü, oliv deli, nu kedsau kepapa kesa tsüdila sen nu Kekinyijjen wi keqhaikedithu wi waden. Ithu na allikeca nyithu wi mukeya nu ithu lli wi shigü keshhughothu wi mukeya gishü tagha wi kesü sen nu Levi nyithu wi waden.

³⁸ Gishü tagha wi kesü tsü kesaghu wi Aaron shicübvügha keqhaikedithu na Levi nyithu gweghe benben, nu Kekinyijjen wi kesen ghena Levi nyithu na gishü tagha wi kesü mathu na saghu keya tsüdi miwi gishü tagha wi kesü sen wa Kekinyijjen kebenketheng jjen wi chiaben.

³⁹ Israel nyithu nu Levi nyithu na asu, kisengtssü, nu oliv deli, khukechithu tsü sen nu kebenketheng jjen ciwi Kekinyijjen ghena ahyikhuthu pi chi, keqhaikedithu na kekuli sa keben, Kekinyijjen ghikehiethu, nu Kekinyijjen wi akhwi kesathu kebenjjen keben witsü waben. Ithu na ithu Nyiza jjenwa tsü n-ghangchila sa nben.