NAHUM 2 - Kemethajüh (N) (Re-editing) Bible (BSI)

Nineve Keqanca

¹ Nineve, nyu no vüyadha! No pachale keben kekhangwa na ghodha. Akhweti hieya! Alen hieya! Aghi ghena kidenya!

² (Apvüwa na aghinyithu na Israel npi shukeya tuwi ma nyankethangwa tsü saneng chile bendha.)

³ Ghinyi süpahithu na atsonhi kenmie pvü, nu makesüthsümeni kenmie pvüyadha. Mathu na kesalile kidenben! mathu gorugarithu na anni ti cwen sa chiben! mathu goruthu na kephenki ben!

⁴ Gorugarithu na alentonti wi ghameme bvü waden, anyunutiwa non wi whanan-ghonan saben. Mathu na annithegü ti wegü, nu atsancwe ti bvü ben.

⁵ Kedithu ciben; nu mathu na accü kemeshülila bvü shhugho ben. Nyu ssikesali ketenthu na akhweti wi bvü wa mathu tsonhi pvü nu kedonli le kesa ghena pi hagi.

⁶ Aghaku kete wi khweti-jenkathu na shadha; kadijjen wi qhethiketen na pongdha.

⁷ Kadijjawa ghan pi atssüzü sa; ma maghathu na nkhetsü ti anongü, nu ahathakina wi mathu leben whengben.

⁸ Atssü na acüceng pvüssi wa keben ti anyithu na Nineve wina shhugho ben! Mathu na “Nganlo! Nganlo!” maghaben, isala thola aseng nkheneng.

⁹ Rükatssü shuya! Suna shuya! Anyunutiwa tsüna keben pi pongdha!

¹⁰ Nineve na yasadha, yisha, nu teshidha! Kemessi ghena leben pachadha, akhu kenün, nu kezü nmidha; ammi phalagha sadha.

¹¹ Anyunutiwa wi kuti ssensitemi kuti sa, ciwi ssensitemi zzathu ghanja, ssensitemi bvüthu nu mathu zzathu na ciwi yazishu benya kesawa tsüna khili khiewa ben nu?

¹² Ssensitemi na ma tsse ghan nu mezüdhi pi nzawa nu ma zza cüden; ma asa tsü mezüdhi pi ma ku pong den.

¹³ Kemisintsa Apvüwa na khiben, “Hi nghinyiwa! Hi ngorugarithu mecang cüaden. Aghi wi nsüpahithu yathi, nu hi no nyu kepa wi khu keyathu tsüdi sennu bvüaden . N-nyilothu na kekhie hhai tsü khiela nza nengdha.”