MIKA 7 - Kemethajüh (N) (Re-editing) Bible (BSI)

Israel Kahangyen Nkemehai

¹ Ajü nmidha! Hi kaghama nyi kesü na kedsauton nyelela kemeshentsse tonthu wi ma bi mu nkeya ti sadha. Kemeshentsse bi nu khhaghabvü dsa kemehaithu tsüdila nyu na layadha.

² Ayyiwa wi kemeshon nyi kesüla nmi, Anyiza jühkeya nyi kesüla nmi. Anyi tsüdila nyu pathile matsü kegho hieben. Anyi tsüdila ma diyyi nyithu jügüden.

³ Mathu tsüdila nkemehai sapichüthu ketan. Kedithu nu pendhethu na alaa khieden. Anyi kekhangthu na ma mangwa yamvu ben khe mathu kiza, nu mathu gweghe acho kiden den.

⁴ Mathu jawi kemehai ntsa nu ajüh tsentsa kesenwa lela kepathu ti ma men nmi. Anyiza na mathu kehiethu, atusenjüh-kechüthu wina mathu kitsankechi ti anyithu meten cü keten tsathangwa tsüna gho tendha. Mathu na khili chükivvü ben.

⁵ Njenphonwa nu npvüshangwa n-nondila. No nwubvü wi lela mangwa khi khe kiden-keshaya.

⁶ Khili tsüwi ha atsathu na mathu bathu pi kejüphonthu ti sa, angathu na mathu jjathu matang, nu kinyibvü tegüthu na mathu nyiethu ssikitagha; anyi kesü ghinyithu tsüna ma ketanla ma theghi ja wina.

⁷ Isala hi Apvüwa hie benden; hi Anyiza nondithi hieben, ma hi hangsha yaben. Anyiza na ihhai kina cüben.

Apvüwa na Hangshakeya Senghoden

⁸ Ithu ghinyithu na ithu nankeqhe keya jjügi nmi. Ithu na khulidha, isala ithu na shagha neng shaben. Ithu na khili kejang wi ben, isala Apvüwa na kewegü pi ithu cüben.

⁹ Ithu na sami pi Apvüwa shundha, tsalina khili matsü keujü wi ithu na ma lebenketsu wi kethankehi meyathu yishü. Isala asakhen wi ma ithu sheipiya nu nyu na ithu miwi sazzi kethengthu tsü sapi meshon cüaben. Ma ithu ssi shhugho kethang wi chicü; ithu na hangben nu ma ithu hangsha keya muyaben.

¹⁰ Tsaseng wi ithu ghinyithu na ha muya nu kejüghe yaben, ithu nankeqhe nu hati keü kegho ghinyithu, “Apvüwa nthu Nyiza na khiewa ben nu?” Mathu na khang meyala nu pi alentontithu wi anisha ti cüten kesa ithu na muden.

¹¹ Jerusalem nyithu, anyunutiwa khwetithu tsü sapfü keten matsüwa na gho tendha. Tsü tsüwi nthu yyi na mizakayi yaden.

¹² Nthu nyithu na kahe nishuwa Assiriya, acülawa Ejipt, Eufrat Ghaku yegu, temeja tssükedone nu kelensie ayikhathu wina nthu wi ghoneng ben.

¹³ Isala tsü miwi hang kebenthu gheshighena ghena ayyiwa na ayyikeshü kesü saaben.

Apvüwa Nanketizen pi Israel miwi Kechi.

¹⁴ Apvüwa, n-nyithu no kessiya kesathu tsü kehiewa kesü salo. Mathu na aghansha kesü wi hang wa lela ciwi ayyi kemehai na mathu vüben. Mathu ya wa Bashan nu Gilead amou kemehai wi mathu na kheni sa kegho ti dsaya thsülo.

¹⁵ Apvüwa, no Ejipt wina ithu ssi keshhugho tsüwi kesa ti ithu ghena amankesathu kuli chilo.

¹⁶ Mizzatentithu na ha mu theng nu mathu kezü ben lela accükwenshü waben. Ahathakina wina mathu na apang nu akhuna pabhon yaben.

¹⁷ Mathu na amaghang ti ayyi wi ghapvü; mathu na mathu khweti kezhüthu wina gho kedheggü nu messi ben.

¹⁸ O Apvüwa, ciwi no ti kesa acenpvü kesüla nmi; no n-nyi hangkeyathu kesamithu tsü teshi pi cü. No anuphanla nlebentsu ben nten, isala no ghaliki kesa pi ithu keccüca tsü nenden.

¹⁹ No ithu nantizen neng chi cüaben. No ithu kesamithu cüten nu tsüthu kesun pi atssükedone shuku wi chiaben!

²⁰ No kheni ithu bamyithu wi khishi ketheng ti no nleben tsentsa kesa nu ghaliki keten pi n-nyi Abraham nu Jakob shicübvüghathu ccüca ben.