MIKA 3 - Kemethajüh (N) (Re-editing) Bible (BSI)

Mikah na Israel Ccülikesathu Kethen

¹ Kinalo, nthu Israel ccülikesathu! Nthu na ajüh tsentsa kesen-u,

² isala nthu na kemehaiwa nanmeghü nu nkemehaiwa tsü nenden. Nthu na inyithu kahang na ahyushi nu mathu gü wi azü mezü.

³ Nthu na inyithu ghan dsaden. Nthu na mathu hyushi, mathu gü pashü, nu tsüthu pi asa pi awwenpfü wi shvu le keten ti handhi.

⁴ Nthu na qai nu Apvüwa wi khie keten tsüwa na gho tendha, isala ma nthu lunengchi nben. Ma nthu kekhie kina nben, kepaghenanye nthu na nkemehaiwa sadha.

⁵ Atusenjüh-kechüthu na nyu mathu thün sapi kecüthu wi kecca khishi den, isala mathu thün nkesathu wi aghi pi khiteqhe isanu inyithu mechu den. Apvüwa na atusenjüh- kechü hathu wi khiben,

⁶ “Atusenjüh-kechüthu, nthu tsathangwa na wa khia tendha; aghani na nthu miwi dua tendha. Nthu na inyithu len tsütsonzzi kesalina nthu na atusenjüh-kechü kemanthi nmudha, nu nthu na atucüki mangla khiya nbendha.”

⁷ Atucüki kekhithu na mathu kekhi tsü sacen nkeya ghena kejüghe yaden. Mathu na kimenni yaden kepaghenanye Anyiza na mathu lunengchi nben.

⁸ Isala ighena tsü Apvüwa na ma ghamu nu kekhang pi hi pong cü, nu ajüh tsentsa kesen nu kempvüza pi hi cü nu Israel nyithu mathu kesami pi kiza thsüle sa thsü.

⁹ Ijüh kinalo, nthu Israel miwi kekhang kesenthu, nthu na ajüh tsentsa kesen nanmeghü nu kemeshon pi nkemeshon sa ketenthu.

¹⁰ Nthu na Anyiza nyunutiwa Jerusalem pi nyu kepathi nu ajüh tsentsa nkesen giketegü miwi saben.

¹¹ Anyunutiwa wi kekhang kesenthu na alaa ghena kekhangsen, keqhaikedithu na athün ghena Ayenwa tsü khimetha, nu atusenjüh-kechüthu na apisa ghena mathu ccücakechi mukeya khuchi; nu mathu tsüdila Apvüwa na mathu ssiten le nkaden. Mathu na khiben, “Apvüwa na ithu ssi keten ghena ithu miwi nkemehai mangla gho nben.”

¹² Tsalina nthu ghena Zion pon pi alli kesü ti sa, Jerusalem na yasa pi nbonki ketheng kesü sa, nu Kekinyijjen yyishiphon wa tsüna ayinong kesü saaben.