MIKA 2 - Kemethajüh (N) (Re-editing) Bible (BSI)

Ketha-u Pashaketenthu na Metuketen

¹ Njenla acho nkemehai kiden ketenthu ghena khatila qhethiketen saten nu! Khathansha wi aghanen na gho khe mathu na matsü kemehai muya meyi wan nu mathu na nkemehai kiden kethengwa tsü saden.

² Khathansha wi mathu na alli yamvu khe tsü pegheya; khathansha wi mathu na ajjen yamvu khe tsü khuyaden. Anyi kesü theghi nyelela keben lela yazishu sa meyala.

³ Tsalina Apvüwa na khiben, “Hi kededi sengho nthu miwi chile kiden bendha, nu nthu na mangla sa nu ciwi na bvüya nben. Nthu na agükeccü wi keben nthu ketanla nthu muyaben, nu tsaseng wi nthu na awisala alentsenya nben.

⁴ Tsü tsüna ghothu anyithu na nthu cüki tsü sennu kededi tsütsonca kesü saaben, nu mathu na nthu sanan kesa anonkegü khwi ha saaben: Ithu na yasatha sadha le! Apvüwa na ithu yyi sen bvüdha. Nu tsüpi ithu ghan pi atssüzü sa thsü kesathu cüdha.

⁵ Tsalina khathansha wi ayyiwa tsüpi Apvüwa nyithu cü neng kesa tsüna gho khe, ciwi nthu kesü shei la ben nben.

⁶ Anyithu na hi sansi nu hi wi khiben, “Ithu nsansi lalo; tsüthu cüki khipi ithu nkizala. Anyiza na ithu ya kimenni thsüa nben.

⁷ Nthu tsü Israel nyithu na kishen-keshi kekhu wi bendha le meshen ben kwe? Apvüwa na kethankehi meya ladha kwe? Ma ntsakhiwa hathu ha saben kwe? Ma kemeshonwa kuli ketenthu wi ccatssü nu ajühkhi nten kwe?”

⁸ Apvüwa na luneng, “Nthu na ghinyithu ti inyithu ssikaghashen. Anyithu na ajjen wi mangla nsashe meshen nu aghi wina kheneng ghoden, isala ciwi nthu na mathu hiebenla nu mathu sengwa na mathu gwomejuwa khuyaden.

⁹ Nthu na inyithu jawi nzathu tsü mathu jjen kemehai wina mathu jügüshiden, nu nthu na mathu tsangathu, anuphanla hi kemihhithu tsü zanyadha.

¹⁰ Shagha nu bvülo; hewi yazishu kesa nmiladha. Nthu kesamithu na apen ha sapi keyasa sadha.

¹¹ “Anyi hathu na atusenjüh- kechüwa milikemesa pi pong pvü nu nyu mechula hati khi kegoe keten tsü nenden, ‘Nthu ghena kisengtssü nu adikinatssü na lle shhugho benle kesa hi atusenjüh khiben.’

¹² “Isala hi nthu Israel nyi hang kebenthu tsüdi saghu yaden. Hi khaghanenithu na ma khang jawi ghoneng keten ti nthu saghu yaden. Amou kesü wi khaghaneni na pong keben ti kheneng kuti nthu yyi wi anyi kejon na benben.”

¹³ Anyiza na mathu len shachi nu kushiyyi wina mathu ssinu shhu yaben. Mathu na anyunuti khweti-jenka pvüghe shhu mathu kenen sa bvüaben. Mathu kadimiwa, Apvüwa na ma ketanla mathu ssi shhu yaden.